ខេត្តកណ្តាល ៖ តាមសេចក្តីរាយការណ៍បឋមបានឲ្យដឹងថា កាលពីវេលាម៉ោង១២ថ្ងៃត្រង់ថ្ងៃទី២៦ ខែវិច្ឆឹកា ឆ្នាំ២០២០ មានករណី.ហិង្សដោយចេតនាមួយ បង្កឡើងដោយជនជាតិខ្មែរអ៊ិស្លាម២ក្រុម មានជម្លោះកាប់ចាក់គ្នាផ្អើលពេញភូមិ បណ្តាលឲ្យក្រុមម្ខាងរងរបួស២នាក់ នឹងក្រុមម្ខាងត្រូវបានសមត្ថកិច្ចចាប់ដាក់ខ្នោះ២នាក់ផងដែរ គ្រាន់តែរឿងអូសរទេះប៉ះចង្ក្រាន ចំណុចមុខផ្ទះជនរងគ្រោះ ភូមិចាមក្រោម ឃុំព្រែកថ្មី ស្រុកកោះធំ ខេត្តកណ្ដាល ។
ភាគីខាងអ្នករងរបួស ក្នុងនោះម្នាក់ឈ្មោះ សេន រ៉ូស្សា ហៅង៉េត ភេទស្រី អាយុ២៣ឆ្នាំ មានទីលំនៅ ភូមិចាមក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរលក់ដូរ និងម្នាក់ទៀតឈ្មោះ ស្មាន ម៉ារី ភេទស្រីអាយុ ៥០ឆ្នាំ មានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរលក់ដូរ ។
ចំណែក២នាក់ដែលត្រូវសមត្ថកិច្ចឃាត់ខ្លួន ក្នុងនោះម្នាក់ឈ្មោះ ឡឹប អ៊ី ភេទប្រុស អាយុ៣៦ឆ្នាំ មានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរនេសាទត្រី និងម្នាក់ទៀតឈ្មោះ ឡឹប អ៊ីសា ភេទប្រុស អាយុ៣១ឆ្នាំ មានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្ដាល មុខរបរ លក់ដូរ ។ ក្នុងនោះសមត្ថកិច្ចបានដកហូតវត្ថុតាងដូចជាកាំបិតប៉័ងតោ ដងឈើ ១ និងដែកសរសៃ១ដើម ទំហំ១០លី ប្រវែង៤តឹក ។
តាមសេចក្តីរាយការណ៍បានឱ្យដឹងថា ដើមចមដែលបណ្តាលឱ្យបុរសស្ត្រីទាំង២ក្រុមខាងលើឈ្លោះកាប់ចាក់គ្នាផ្អើលពេញភូមិនោះ ត្រូវបានគេដឹងថា ដំបូងឡើយឈ្មោះ ស្មាន់ ម៉ារី កំពុងអង្គុយធ្វើត្រីនៅខាងមុខផ្ទះ ចំណែកឈ្មោះ សេន រ៉ូស្សា ជាប្តីនៅមើលកូនក្នុងផ្ទះ ។ ពេលនោះឈ្មោះ ស្មាន់ ម៉ារី បានទាក់ពាក្យសម្ដីគ្នាជាមួយឈ្មោះ ត្រេស ណុប ភេទស្រី ជាអ្នករស់នៅជិតខាង ដែលបានចោទគាត់(ស្មាន់ ម៉ារី) ថា បានអូសរទេះត្រីប៉ះបែកចង្ក្រានរបស់ខ្លួន តែឈ្មោះ ស្មាន់ ម៉ារី បានប្រកែក នឹងឆ្លើយថា ចាំគាត់សួរក្មួយឈ្មោះ ឡឹប អ៊ី (ជនសង្ស័យ) សិន បើវាអូសរទេះប៉ះចង្ក្រានរបស់(ត្រេស ណុប)ឯងមែន គាត់និងចេញប្រាក់សង ។
តាមសេចក្តីរាយការណ៍បានបន្តថា គ្រាន់តែឮពាក្យសំដីអ្នកទាំងពីរកំពុងមានជម្លោះគ្នាភ្លាម ស្រាប់តែឈ្មោះ ស្មាន់ ណុប ត្រូវជាម្ដាយរបស់ជនសង្ស័យ បាននិយាយស្ដីបន្ទោសទៅឈ្មោះស្មាន់ ម៉ារីខ្លាំងៗ រឿងបែកចង្ក្រាននោះ បន្ទាប់មកឈ្មោះ ស្មាន់ ម៉ារី ក៏ឈប់ទាស់គ្នាជាមួយឈ្មោះ ត្រេស ណុប ទៅ ។
តាមសេចក្តីរាយការណ៍បានបន្តទៀតថា លុះបន្តិចក្រោយមកស្រាប់តែឈ្មោះ ស្មាន់ ម៉ារី បែជាទៅទាក់ពាក្យសម្ដីខ្លាំងៗ ជាមួយឈ្មោះ ស្មាន់ ណុប (ត្រូវជាបងស្រី បង្កើត) វិញ ហើយឈ្មោះ សេន រ៉ូស្សា ក៏បានចូលទៅឃាត់ម្ដាយ កុំឲ្យឈ្លោះគ្នា ទើបធ្វើឲ្យជនសង្ស័យឈ្មោះ ឡឹប អ៊ី និង ឈ្មោះឡឹប អ៊ីសា ដែលនៅក្បែរនោះ តបពាក្យសម្ដីដាក់គ្នាបង្កើតជាជម្លោះ កាន់តែខ្លាំងធ្វើឲ្យជនសង្ស័យឈ្មោះ ឡឹប អ៊ី ទាញយកកាំបិតប៉័ងតោ កាប់ទៅលើឈ្មោះ ស្មាន់ ម៉ារី ១កាំបិតចំឆ្អឹង ខ្នងផ្នែកខាងឆ្វេង និងកាប់ត្រូវឈ្មោះ សេន រ៉ូស្សា១កាំបិតចំថ្ពាល់ បណ្ដាលឲ្យរងរបួសចេញឈាមទាំង២នាក់ ។ ដោយឃើញភាគីទាំង២កំពុងចាក់កាប់គ្នាដូច្នោះ ឈ្មោះ ឡឹប អ៊ីសា ក៏បានយកដែកសរសៃថ្នាំងអំពៅគប់ទៅលើឈ្មោះ ស្មាន់ ម៉ារី ដែរ តែមិនត្រូវទេ ភ្លាមនោះភាគីខាងរងរបួសបាននាំគ្នារត់គេចចេញ ហើយបានទៅដាក់ពាក្យប្ដឹងនៅប៉ុស្ដិ៍រដ្ឋបាលព្រែកថ្មីតែម្ដង ។
ក្រោយពីទទួលបានបណ្ដឹងនោះភ្លាម កម្លាំងនគរបាលប៉ុស្ដិ៍រដ្ឋបាលព្រែកថ្មីបានចុះដល់កន្លែងកើតហតុ នឹងបានធ្វើការឃាត់ខ្លួនជនសង្ស័យទាំង២នាក់ និងកាំបិតប៉័ងតោ១ រួមទាំងដែកសរសៃ ដែលជាវត្ថុតាងពាក់ពន្ធបទល្មើស នាំមកកាន់ប៉ុស្ដិ៍រដ្ឋបាល និងបញ្ជូនទៅកា ន់អធិការដ្ឋាននគរបាលស្រុកកោះធំ ដើម្បីបន្តនីតិវិធី ។
នេះជារឿងមួយដែលពួកគាត់រស់នៅជិតខាងគ្នាមិនចេះយោគយល់គ្នា ទីបំផុត២នាក់រងរបួស និង២នាក់ជាប់ខ្នោះ គ្រាន់តែរឿងអូសរទេះប៉ះចង្ក្រាន ៕ (កែសម្រួលដោយ ៖ ធីតា)
ចែករំលែកព័តមាននេះ