រាជធានីភ្នំពេញ ៖ ប៉ុន្មានឆ្នាំចុងក្រោយនេះ ទីផ្សារប្រដាល់ហាក់មានការកើនឡើងខ្លាំងមែនទែន ឱ្យតែកីឡាករមានសមត្ថភាពពិតប្រាកដ មិនខ្វះទេសង្វៀនប្រកួតតាមស្ថានីយទូរទស្សន៍ដែលត្រូវការពួកគេ ។
កំណើនទីផ្សារប្រដាល់ក៏បានញ៉ាំងឱ្យក្លិបប្រដាល់កើតឡើងព្រោងព្រាតជាមួយនឹងការប្រកាសជ្រើសរើសកូនសិស្សឱ្យចូលហ្វឹកហាត់ក្នុងក្លិបដោយមិនទាមទារប្រាក់កម្រៃនិងចំណេះដឹងខ្ពស់ ធ្វើឱ្យអ្នកខ្វះលទ្ធភាពរកការងារធ្វើនាំគ្នាចូលហ្វឹកហាត់ដើម្បីទទួលបានឱកាសឡើងសង្វៀនប្រកួតរកប្រាក់កម្រៃចិញ្ចឹមជីវិតទៀតផង ។
មិនត្រឹមតែអ្នកខ្វះលទ្ធភាពរកការងារធ្វើចូលហ្វឹកហាត់ប៉ុណ្ណោះទេ សូម្បីកុមារតូចៗដែលចូលចិត្តកីឡាប្រដាល់ក៏គេឃើញមានមុខនៅក្នុងក្លិបប្រដាល់នានាកំពុងហ្វឹកហាត់យ៉ាងសកម្មធ្វើឱ្យមានការចាប់អារម្មណ៍ផងដែរ ។
ជាក់ស្ដែង ក្លិបប្រដាល់ដែលមានឈ្មោះថា សមាគមកីឡាប្រដាល់កងយោធពលខេមរភូមិន្ទដែលមានទីតាំងនៅស្ដាតចាស់ក៏ទទួលការចាប់អារម្មណ៍ខ្លាំងណាស់ដែរដោយសារក្នុងចំណោមកីឡាករជាង៦០នាក់មានជិត២០នាក់ស្ថិតក្នុងវ័យកុមារនិងកំពុងសិក្សានៅឡើយ។
ជួបអ្នកយកព័ត៌មានកោះសន្តិភាព កុមារា ធន់ សុផាត និងធន់ ជ័យ ដែលកំពុងហ្វឹកហាត់នៅក្នុងក្លិបប្រដាល់នោះបានរៀបរាប់ស្រដៀងគ្នា៖«ការហាត់ប្រដាល់គឺក្ដីស្រមៃរបស់ខ្ញុំ្ញ ប៉ុន្តែមិនមានន័យថា ខ្ញុំត្រូវតែឈប់រៀននោះទេ គឺគ្រាន់តែប្ដូរពេលរៀនតាមកាលវិភាគរបស់សាលាប៉ុណ្ណោះ។ តាមពិតទៅខ្ញុំមាននិស្ស័យនិងស្រឡាញ់ចូលចិត្តកីឡាប្រដាល់គុនខ្មែរនេះតាំងពីយូរមកហើយ ។ រាល់ថ្ងៃសៅរ៍និងអាទិត្យខ្ញុំតែងតែអង្គុយមើលការប្រកួតតាមកញ្ចក់ទូរទស្សន៍ជាប់ជានិច្ច ហើយខ្ញុំធ្លាប់គិតថា ថ្ងៃណាមួយខ្ញុំស្វែងរកក្លិបហាត់ប្រដាល់គុនខ្មែរឱ្យទាល់តែបាន ហើយទីបំផុតខ្ញុំក៏បានសម្រេចនូវក្ដីស្រមៃមួយនេះ»។
ធន់ សុផាត ដែលទើបតែមានអាយុ១០ឆ្នាំបន្តថា៖«បន្ទាប់ពីទទួលបានការឯកភាពពីឪពុក-ម្ដាយ ខ្ញុំសុខចិត្តផ្លាស់ប្ដូរសាលារៀនពីស្រុកកំណើតនៅឯខេត្តស្វាយរៀង មករៀននៅភ្នំពេញវិញដើម្បីបានហាត់ប្រដាល់នៅទីនេះអស់រយៈពេល២ឆ្នាំមកហើយ ។ តាំងពីចូលហាត់រហូតមកទល់ពេលនេះ ខ្ញុំធ្លាប់ឡើងប្រកួតតាមរយៈក្លិបបានចំនួន៧ដងរួចមកហើយ ។
ការហាត់ប្រដាល់មិនត្រឹមតែជួយឱ្យរាងកាយមាំមួន មានប្រាក់ចំណូលប៉ុណ្ណោះទេ ថែមទាំងមានអ្នកស្គាល់ច្រើនទៀតផង ។ ដូច្នេះខ្ញុំត្រូវតែប្រឹងប្រែងហ្វឹកហាត់បង្កើនសមត្ថភាពឱ្យក្លាយជាអ្នកប្រដាល់ល្បីមួយរូបដូចរៀមច្បងដទៃទៀតដែរ»។
លោក ធន់ សុភា ដែលជាគ្រូបង្វឹករបស់សមាគមកីឡាប្រដាល់កងយោធពលខេមរភូមិន្ទបានឱ្យដឹងថា សព្វថ្ងៃមានសិស្សកំពុងតែហ្វឹកហាត់ជាប្រចាំទាំងឈុតតូចនិងឈុតធំជាង៦០នាក់ ក្នុងនោះក្មេងតូចមានជិត២០នាក់ដែលពួកគេសុទ្ធតែកំពុងនៅរៀនទាំងអស់ ។
ពាក់ព័ន្ធនឹងពេលវេលាហ្វឹកហាត់វិញលោកប្រាប់ថា អ្នកដែលជាប់រៀនពេលព្រឹកត្រូវហាត់ពេលល្ងាចចំណែកអ្នកដែលជាប់រៀនពេលល្ងាចត្រូវហាត់ពេលព្រឹក រីឯអ្នកមិនរៀនគឺលោកមិនអនុញ្ញាតឱ្យចូលហ្វឹកហាត់ទេ ។ ម្យ៉ាងវិញទៀត ពួកគេទាំងអស់សុទ្ធតែត្រូវបានឪពុកម្ដាយយកមកផ្ញើត្រឹមត្រូវ ព្រមទាំងធ្វើកិច្ចសន្យាទៀតផង ។ លោកបញ្ជាក់ថា ការហ្វឹកហាត់លោកមិនយកប្រាក់នោះទេ ទោះបីឪពុកម្ដាយខ្លះលួចជូនប្រាក់ដល់លោកក៏លោកមិនយកដែរ ។
លោកសុខចិត្តលះបង់ពេលវេលាទាំងកម្លាំងកាយនិងកម្លាំងចិត្តបង្ហាត់ដល់ក្មេងៗទាំងនេះ ដោយសារតែរូបលោកចង់ចូលរួមអភិរក្សនិងអភិវឌ្ឍវិស័យក្បាច់គុនបូរាណខ្មែរឱ្យស្ថិតស្ថេរគង់វង្សជារៀងរហូត ។ មិនតែប៉ុណ្ណោះលោកចង់ឱ្យក្មេងៗទាំងនេះឃ្លាតចាកឆ្ងាយពីគ្រឿងញៀន និងចំណាយពេលវេលាដើរលេងឥតប្រយោជន៍ ងាកមកលេងកីឡាវិញដើម្បីសុខភាព ។ សម្រាប់ពេលវេលាហ្វឹកហាត់វិញគឺពេលព្រឹកចាប់ពីម៉ោង៦ដល់ម៉ោង៩ និងពេលល្ងាចចាប់ពីម៉ោង២និង៣០នាទីរសៀលដល់ម៉ោង៧យប់៕
ចែករំលែកព័តមាននេះ