ខេត្តសៀមរាប ៖ ស្ត្រីម្នាក់ទើបសម្រាលកូនបាន២ខែ បានធ្វើសកម្មភាពចូលក្នុងបន្ទប់របស់ស្ត្រីជាអ្នកជិតខាងម្នាក់ទៀតលួចទ្រព្យសម្បត្តិ និងគ្រឿងអលង្ការអស់ជាច្រើន រួចបំរុងគេចខ្លួន តែត្រូវឪពុករបស់ស្ត្រីរងគ្រោះចាប់បាន និងនាំយកទៅប្រគល់ឱ្យសមត្ថកិច្ចមូលដ្ឋាន ដើម្បីចាត់ការតាមច្បាប់ ។
ហេតុការណ៍ឃាត់ខ្លួនស្ត្រីជាជនសង្ស័យម្នាក់ខាងលើបានធ្វើឡើងកាលពីថ្ងៃទី២៤ ខែ វិច្ឆិកា ឆ្នាំ២០២០ នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ។
ជនសង្ស័យឈ្មោះ ទ្រី រ៉ូមីហ្សឺ ហៅ ធី នីតា ភេទស្រី អាយុ១៨ឆ្នាំ ជាខ្មែរអ៊ិស្លាម (ស្ត្រីជាជនសង្ស័យរូបនេះទើបសម្រាលកូនបាន២ខែ ហើយកូននោះបានបាត់បង់ជីវិតទៅវិញ) មានទីលំនៅបច្ចុប្បន្នក្នុងភូមិឃុំកើតហេតុខាងលើ ដោយមានផ្ទះនៅជិតគ្នាជាមួយជនរងគ្រោះ ។ ចំណែកជនរងគ្រោះឈ្មោះ សំ ស្រីដែន ហៅ ហ្វាស៊ីរ៉ា ភេទស្រី អាយុ២៨ឆ្នាំ ជាជនជាតិខ្មែរអ៊ីស្លាម មុខរបរបុគ្គលិកផ្សារទំនើប មានទីលំនៅក្នុងភូមិ-ឃុំកើតហេតុខាងលើ ។
បើតាមប្រភពពីសមត្ថកិច្ចការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបានឱ្យដឹងកាលពីវេលាម៉ោង៨និង៣០នាទីព្រឹកថ្ងៃទី២៥ វិច្ឆិកា ឆ្នាំ២០២០ កន្លងទៅនេះថា មុនពេលកើតហេតុ ខណៈពេលជនរងគ្រោះមិនបាននៅផ្ទះ ដោយសារមានធុរៈចេញទៅខាងក្រៅបាត់ ស្រាប់តែស្ត្រីជាជនសង្ស័យបានធ្វើសកម្មភាពចូលទៅក្នុងបន្ទប់គេងរបស់ស្ត្រីរងគ្រោះ ដែលមិនបានចាក់សោទ្វារ ដោយបានលួចយកទ្រព្យសម្បត្តិ រួមមាន កងដៃឈុតប្លាទីនចំនួន១០កង តម្លៃ៧០០ដុល្លារ, ខ្សែដៃប្លាទីនច្រវាក់ឆាប១ខ្សែ មានទម្ងន់៥ជី តម្លៃ៥០០ដុល្លារ, ចិញ្ចៀនប្លាទីនម៉ូតផ្កាច័ន្ទត្បូងពណ៌សមួយវង់ តម្លៃ៧០ដុល្លារ, ipad ១គ្រឿង ពណ៌មាស តម្លៃ៥២០ដុល្លារ, ប្រាក់ដុល្លារចំនួន៤០ដុល្លារ, ប្រាក់បាតថៃចំនួន២០០បាត និងប្រាក់ចំនួន១.៨០០.០០០រៀល ដោយទ្រព្យសម្បត្តិទាំងអស់ ជនរងគ្រោះទុកនៅក្នុងទូខោអាវ មិនបានចាក់សោនោះទេ ។
តាមប្រភពពីសមត្ថកិច្ចបានបន្តថា ក្រោយពេលធ្វើសកម្មភាពរួច ស្ត្រីជាជនសង្ស័យ បម្រុងដើរចេញមកក្រៅ ដើម្បីគេចខ្លួនដែរ តែត្រូវឪពុករបស់ស្ត្រីរងគ្រោះបានឃើញទាន់ក៏ឃាត់ខ្លួនភ្លាមៗ រួចប្រគល់ឱ្យសមត្ថកិច្ចមូលដ្ឋានតែម្ដង។
ក្រោយពេលខ្លួន ស្ត្រីជាជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចប្រាកដមែន។
បច្ចុប្បន្ន ស្ត្រីជាជនសង្ស័យត្រូវបានកម្លាំងព្រហ្មទណ្ឌជំនាញខេត្កសាងសំណុំរឿងបញ្ជូនទៅតុលាការខេត្តនៅរសៀលថ្ងៃទី២៥ ខែវិច្ឆិកា ឆ្នាំ២០២០ ដើម្បីចាត់ការតាមផ្លូវច្បាប់។ ចំណែកទ្រព្យសម្បត្តិដែលដកហូតបាន ត្រូវប្រគល់ជូនទៅម្ចាស់ដើមវិញគ្រប់ចំនួនអស់ហើយ ។
សូមបញ្ជាក់ថា បន្ទាប់ពីសមត្ថកិច្ចយកមកឃុំខ្លួន ស្ត្រីជាជនសង្ស័យខាងលើមានអាការៈ ចេះតែវិលមុខ និងអស់កម្លាំង សន្លប់ជាច្រើនលើក ត្រូវបានសមត្ថកិច្ចបញ្ជូនមកព្យាបាលនៅមន្ទីរពេទ្យអស់មួយយប់មួយថ្ងៃ រហូតដល់វេលាម៉ោង២រសៀលថ្ងៃទី២៥ ខែវិច្ឆិកា ឆ្នាំ២០២០ កម្លាំងនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត បញ្ជូនខ្លួនមកកាន់តុលាការខេត្ត ដើម្បីចាត់ការបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ