រាជធានីភ្នំពេញ ៖ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ឌុច សុខសារិន កាលពីព្រឹកថ្ងៃទី២៥ ខែវិច្ឆិកា ឆ្នាំ២០២០ បានលើកយកសំណុំរឿង«ឧបឃាត»…
រាជធានីភ្នំពេញ ៖ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ឌុច សុខសារិន កាលពីព្រឹកថ្ងៃទី២៥ ខែវិច្ឆិកា ឆ្នាំ២០២០ បានលើកយកសំណុំរឿង«ឧបឃាត» របស់អតីតមេដឹកនាំគណបក្សប្រឆាំង មកបើកសវនាការទៅតាមផ្លូវច្បាប់ ។ ប៉ុន្តែសវនាការនេះ ត្រូវបានលើកពេលទៅធ្វើនៅថ្ងៃទី១៥ ខែធ្នូ ឆ្នាំ២០២០ខាងមុខវិញ ដោយសារតែអវត្តមានមេធាវីការពារជនជាប់ចោទ ខណៈមេធាវីបានធ្វើលិខិតស្នើមកតុលាការឲ្យចេញដីកាកោះជាថ្មី និងតម្រូវឲ្យដាក់អាសយដ្ឋានចុងក្រោយរបស់កូនក្ដី ដែលមានជនជាប់៩នាក់ ។
ក្នុងការចាប់ផ្ដើមសវនាការនាព្រឹកនោះ តុលាការបានបង្ហាញថា លោក សំ សុគង់ ជាមេធាវីការពារក្ដីឲ្យជនជាប់ចោទទាំង៩នាក់ បានដាក់លិខិតស្នើសុំមកតុលាការឱ្យចេញដីកាកោះដោយដាក់អាសយដ្ឋានថ្មីចុងក្រោយរបស់កូនក្ដីខ្លួន ។
ចំណុចនេះបានធ្វើឲ្យតំណាងអយ្យការគឺលោក សេង ហៀង លើកឡើងថា ការស្នើសុំរបស់មេធាវីការពាក្ដីឲ្យជនជាប់ចោទ គឺជាចេតនាគេចវេះ ដោយសារជនជាប់ចោទទាំង៩នាក់មានអាសយដ្ឋាននៅក្នុងប្រទេសកម្ពុជា ហើយប្រព្រឹត្តបទល្មើសក៏នៅកម្ពុជាដែរ អយ្យការបានបំពេញនីតិវិធីកោះហៅតាមអាសយដ្ឋាននេះរួចអស់ហើយ ។ ដូច្នេះ ការលើកឡើងរបស់លោកមេធាវី សំ សុគង់ គឺជាចេតនាទុច្ចរិត គប្បីតុលាការមានវិធានការជាក់ស្ដែង ។
លោក សួង ចាន់ថន មេធាវីតំណាងរាជរដ្ឋាភិបាល បានលើកឡើងថា តុលាការបានបំពេញនីតិវិធីក្នុងការកោះហៅជនជាប់ចោទ និងមេធាវីការពារក្តីឲ្យជនជាប់ចោទរួចអស់ហើយថែមទាំងជនជាប់ចោទបានចេញសេចក្ដីថ្លែងការណ៍ជាបន្តបន្ទាប់ពីសវនាការនេះ ដូច្នេះតុលាការគប្បីបន្តនីតិវិធីជំនុំជម្រះក្តីបាន ។ទោះបីមានការលើកឡើងបែបនេះក្ដី ក្នុងការសម្រេចចុងក្រោយ ក្រុមប្រឹក្សាជំនុំជម្រះបានកំណត់យកថ្ងៃទី១៥ ខែធ្នូ ឆ្នាំ២០២០ខាងមុខ ដើម្បីបន្តសវនាការ ហើយតុលាការនឹងធ្វើរបាយការណ៍ពីឥរិយាបថរបស់មេធាវីការពារក្តីឲ្យជនជាប់ចោទទៅគណៈមេធាវីនៃព្រះរាជាណាចក្រកម្ពុជាផងដែរ ។ សវនាការនេះ ជនជាប់ចោទទាំង៩នាក់សុទ្ធតែស្ថិតនៅក្រៅប្រទេស ។
ជនជាប់ចោទក្នុងសំណុំរឿង«ឧបឃាត» មានអតីតថ្នាក់ដឹកនាំគណបក្សសង្គ្រោះជាតិ៩រូប ដែលត្រូវបានសាលាដំបូងរាជធានីភ្នំពេញលើយកមកជំនុំជម្រះទោសះរួមមាន ១-លោក សម រង្សុី ២-លោក អេង ឆៃអ៊ាង ៣-លោក ស្រី មូរ សុខហួរ ៤-លោក អ៊ូ ច័ន្ទរិទ្ធិ ៥-លោក ហូរ វ៉ាន់ ៦-លោក ឡុង រី ៧-លោក ម៉ែន សុថាវរិន្ទ្រ ៨-លោកស្រី ជូឡុង សូមួរ៉ា និង៩-លោក នុត រំដួល ។
អយ្យការសាលាដំបូងរាជធានីភ្នំពេញ បានចោទប្រកាន់បុគ្គលទាំង៩រូបខាងលើពីបទ «ឧបឃាត» តាមមាត្រា៤៥១នៃក្រមព្រហ្មទណ្ឌ ប្រព្រឹត្តកាលពីខែសីហា ឆ្នាំ២០១៩ នៅរាជធានីភ្នំពេញ ។
ស្របពេលគ្នាដែលសាលាដំបូងរាជធានីភ្នំពេញ បើកសវនាការជំនុំជម្រះលើសំណុំរឿង របស់លោក សម រង្ស៊ី និងបក្ខពួក៨នាក់ទៀត ពាក់ព័ន្ធនឹងសំណុំរឿង «ឧបឃាត» (ពាក់ព័ន្ធករណី ៩ វិច្ឆិកា) លោក គឹម សន្តិភាព អ្នកនាំពាក្យក្រសួងយុត្តិធម៌បានពន្យល់កន្លងមកថា ឆ្លងតាមរយៈសកម្មភាពនិងភ័ស្តុតាងជាបន្តបន្ទាប់ បានបង្ហាញឱ្យឃើញច្បាស់ថា សកម្មភាពរបស់ទណ្ឌិត សមរង្ស៊ី និងបក្ខពួកខ្លួន បានឈានចូលដល់ផែនការផ្តួលរំលំរបបរាជានិយមដែលមានអង្គព្រះមហាក្សត្រគ្រងរាជសម្បត្តិនាពេលបច្ចុប្បន្ន និងផ្តួលរំលំរាជរដ្ឋាភិបាលស្របច្បាប់នាពេលបច្ចុប្បន្ននេះ ដែលនេះជាសកម្មភាពប៉ុនប៉ងធ្វើរដ្ឋប្រហារមួយយ៉ាងពិតប្រាកដ ។
លោកបញ្ជាក់ថា «អំពើខាងលើនេះ គឺជាការប្រឆាំងនឹងរដ្ឋធម្មនុញ្ញ និងច្បាប់នៃកម្ពុជាយ៉ាងធ្ងន់ធ្ងរ ដែលកំណត់បានជាបទឧក្រិដ្ឋ ត្រូវផ្តន្ទាទោសក្នុងបទឧក្រិដ្ឋធ្ងន់ធ្ងរអាចអស់មួយជីវិត តាមក្រមព្រហ្មទណ្ឌនៃព្រះរាជាណាចក្រកម្ពុជា ។ ហេតុនេះ ស្ថាប័នមានសមត្ថកិច្ចគ្រប់លំដាប់ថ្នាក់ រួមទាំងស្ថាប័នអយ្យការ មានកាតព្វកិច្ចអនុវត្តច្បាប់យ៉ាងតឹងរ៉ឹង ដើម្បីបំផ្លាញនិងកម្ទេចចោលនូវរាល់ផែនការ និងអង្គការចាត់តាំងទាំងឡាយណាដែលគាំទ្រសកម្មភាពខុសច្បាប់នេះ ៕
ចែករំលែកព័តមាននេះ