រាជធានីភ្នំពេញ ៖ រថយន្តស៊េរីទំនើបមួយគ្រឿងបុកម៉ូតូស្គូពីដែលជិះដោយនារី២នាក់ពីក្រោយ បណ្តាលអោយរងរបួសធ្ងន់ ដែលហេតុការណ៍នេះបានកើតឡើងក្នុងខណ្ឌចំការមន ហើយរថយន្តបង្កបានព្យាយាមបើកគេចរហូតដល់ខណ្ឌមានជ័យ ក៏ទុករថយន្តនោះចោលរួចអ្នកបើកបររថយន្តបានរត់គេចខ្លួនបាត់ ។
ហេតុការណ៍ខាងលើនេះកើតឡើងកាលពីវេលាម៉ោង៣និង២០នាទីទៀបភ្លឺថ្ងៃទី២១ ខែវិច្ឆិកា ឆ្នាំ២០២០ ជិតរោងចក្រគួងហុង ផ្លូវព្រះមុនីវង្ស សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
រថយន្តស៊េរីទំនើបខាងលើ ពណ៌ស ពាក់ស្លាកលេខ ភ្នំពេញ 2BB-1926 បើកបរដោយបុរសមិនស្គាល់អត្តសញ្ញាណ រត់គេចខ្លួនបាត់ ។ ចំណែកម៉ូតូមួយគ្រឿងខាងលើម៉ាកស្គូពី ពណ៌ស ពាក់ស្លាកលេខ កណ្ដាល 1AC-0305 ជិះដោយនារី២នាក់ មិនស្គាល់អត្តសញ្ញាណ បានរងរបួសធ្ងន់ ។
តាមប្រភពព័ត៌មានពីអ្នកឃើញហេតុការណ៍បានអោយដឹងថា មុនពេលកើតហេតុ គេបានឃើញនារីវ័យក្មេង២នាក់ជិះម៉ូតូមួយគ្រឿងម៉ាកស្គូពី ពណ៌ស ធ្វើដំណើរតាមផ្លូវព្រះមុនីវង្ស ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ស្រាប់តែមាន រថយន្តស៊េរីទំនើបមួយគ្រឿងខាងលើ ដែលបើកបរដោយបុរសម្នាក់រួមដំណើរជាមួយនិងនារីម្នាក់ បានធ្វើដំណើរតាមផ្លូវព្រះមុនីវង្ស ក្នុងទិសដៅស្របគ្នា ក្នុងល្បឿនលឿន ក៍ជ្រុលទៅបុកម៉ូតូម៉ាកស្គូពី.ពីក្រោយ បណ្តាលអោយអូសទាំងម៉ូតូនិងមនុស្សចម្ងាយ១០០ម៉ែត្រ និងធ្វើអោយនារីវ័យក្មេងនាក់នោះ រងរបួសធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត្រភ្លាមៗផងដែរ។
តាមប្រភពដដែលបានបន្តថា ដោយឡែករថយន្តវិញ នៅពេលបង្កគ្រោះថ្នាក់ហើយ មិនព្រមឈប់ទទួលខុសត្រូវនោះទេ គឺព្យាយាមបើកគេចទាំងរថយន្តខូចខាតផែ្នកខាងមុខ រហូតដល់ចំណុចជិតស្កុបចាក់អង្រែ តាមបណ្តោយផ្លូវជាតិលេខ២ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ក៏បានទុករថយន្តចោល ហើយនាំគ្នារត់គេចខ្លួនបាត់អស់តែម្ដង ។
ក្នុងហេតុការណ៍ខាងលើនេះ សមត្ថកិច្ចមូលដ្ឋានទាំង២ខណ្ឌបានទំនាក់ទំនងគ្នា ចុះទៅកន្លែងកើតហេតុ រួចហើយក៍ទាក់ទងខាងជំនាញចរាចរណ៍ក្រុងភ្នំពេញអោយចុះទៅធ្វើការវាស់វែង យករថយន្តនិងម៉ូតូទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយទៀត ៕ (កែសម្រួលដោយ ៖ ធីតា)
ចែករំលែកព័តមាននេះ