ខេត្តកំពង់ឆ្នាំង ៖ រដ្ឋមន្ត្រីក្រសួងអភិវឌ្ឍន៍ជនបទ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តកំពង់ឆ្នាំង ឯកឧត្តម បណ្ឌិតសភាចារ្យ អ៊ុក រ៉ាប៊ុន មានប្រសាសន៍ថា៖ ផលលំបាកបានធ្លាក់មកលើប្រជាពលរដ្ឋ យើងទាំងអស់គ្នាបន្ទាប់ពីជំងឺកូវីដបានកម្រើកឡើងវិញ។ ជាមួយគ្នានេះប្រមុខរាជរដ្ឋាភិបាលក៏បានយកចិត្តទុកដាក់ក្នុងការទប់ស្កាត់ការពារការរីករាលដាលជំងឺនេះយ៉ាងយកចិត្តទុកដាក់ខ្លាំងណាស់ដែរ ក្នុងដំណាក់កាលចុងក្រោយនេះ។
មានប្រសាសន៍បែបនេះនៅក្នុងពិធីជួបសំណេះសំណាល និងចែកស្រូវពូជ១៧១តោន និងពូជបន្លែដល់ប្រជាពលរដ្ឋរងគ្រោះដោយទឹកជំនន់ ចំនួន១ ៧១០គ្រួសារ នៅក្នុងបរិវេណវត្តត្រពាំងជុំ ក្នុងភូមិតាសុខ ឃុំសែប ស្រុកកំពង់ត្រឡាច នាព្រឹកថ្ងៃទី១២ ខែវិច្ឆិកា ឆ្នាំ២០២០។ ឯកឧត្តមបណ្ឌិតសភាចារ្យ បានបន្តថា ខ្ញុំសូមពាំនាំនូវបណ្តាំផ្តាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដែលសម្តេចទាំងពីរ តែងតែនឹករឭក និងគិតគូរសុខទុក្ខរបស់បងប្អូនប្រជាពលរដ្ឋ។
ជាក់ស្តែងថ្ងៃនេះស្រូវពូជចំនួន១៧១តោន និងពូជបន្លែមួយចំនួនទៀតក៏ជាអំណោយដ៏ថ្លៃថ្លារបស់សម្តេចទាំងពីរជូនដល់បងប្អូនប្រជាពលរដ្ឋ រងគ្រោះដោយទឹកជំនន់ ចំនួន១ ៧១០ គ្រួសារ នៅក្នុងខេត្តកំពង់ឆ្នាំង។ នេះមិនមែនជាលើកទី១ទេ ដែលអំណោយជាស្រូវពូជ និងពូជបន្លែ ដែលបានចែកជូនបងប្អូន ប្រជាពលរដ្ឋ រងគ្រោះ ដោយទឹកជំនន់ គឺបានធ្វើឡើងជាបន្តបន្ទាប់ នៅគ្រប់បណ្តាខេត្តក្រុងដែលជួបនូវវិបត្តិទឹកជំនន់ ដូចជាគ្នានេះដែរ។ ឯកឧត្តមរដ្ឋមន្ត្រីក្រសួងអភិវឌ្ឍន៍ជនបទ បានបញ្ជាក់ទៀតថា៖ ក្នុងគ្រាដែលបងប្អូនប្រជាពលរដ្ឋ ជួបការលំបាក ដោយទឹកជំនន់ ឬជួបនូវគ្រោះធម្មជាតិផ្សេង តើមាននរណាខ្លះដែលបានគិតគូសុខទុក្ខ និងជួយដល់បងប្អូនប្រជាពលរដ្ឋ គឺមានតែគណបក្សប្រជាជន មួយប៉ុណ្ណោះ ដែលបានគិតគូរពីបញ្ហានេះ។
បច្ចុប្បន្នរាជដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំ បានធ្វើឱ្យប្រទេសជាតិមានការរីកចម្រើន និងយ៉ាងខ្លាំងក្លាគួរជាទីមោទនៈ។ អត្រាភាគរយ នៃប្រជាពលរដ្ឋក្រីក្រ បានចុះអន់ថយជាលំដាប់ពីមួយឆ្នាំទៅមួយឆ្នាំ រហូតដល់បច្ចុប្បន្ន នៅកម្រិតទាបបំផុត ដែលធ្វើឱ្យអន្តរជាតិទទួលស្គាល់ និងស្ងើចសរសើរ។ ជាចុងក្រោយឯកឧត្តមរដ្ឋមន្ត្រីក៏បានផ្តាំផ្ញើដល់បងប្អូនប្រជាពលរដ្ឋ ក្រោយពីទទួលបានស្រូវពូជ និងពូជបន្លែនេះទៅ ត្រូវយកចិត្តទុកដាក់ធ្វើការដាំដុះ និងថែទាំឱ្យបានល្អ ដើម្បីផ្គត់ផ្គង់ជីវភាពគ្រួសារ។ សូមបងប្អូនប្រជាពលរដ្ឋ ប្រុងប្រយត្ន័ឱ្យបានខ្ពស់ ក្នុងការថែរក្សាសុខភាព ដោយលាងដៃ និងសាប៊ូ អាល់កុល ឬជែល និងត្រូវមានគម្លាតពីគ្នាយ៉ាងហោចណាស់ឱ្យបាន១ម៉ែត្រ និងត្រូវពាក់ម៉ាស់ ដើម្បីការពារការ ឆ្លងជំងឺកូវីត-១៩។
យោងតាមរបាយការណ៍របស់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានឱ្យថា៖ ប្រជាពលរដ្ឋរងគ្រោះដោយទឹកជំនន់ ទាំង ១ ៧១០គ្រួសារ ដែលត្រូវទទួលបានស្រូវពូជ និងពូជនបន្លែនៅថ្ងៃនេះមាន៖ មកពីស្រុកបរិបូរណ៍ចំនួន២២៥គ្រួសារ ,ស្រុកជលគីរី ៥៦៧គ្រួសារ, ស្រុកកំពង់លែង១៥២គ្រួសារ, ស្រុកកំពង់ត្រឡាច ៣២២គ្រួសារ, ស្រុករលាប្អៀរ ៤១៤ គ្រួសារ និងក្រុងកំពង់ឆ្នាំង ចំនួន៣០គ្រួសារ ដោយក្នុងមួយគ្រួសារមួយគ្រួសារទទួលបានស្រូវពូជ ១០០ គីឡូក្រាម ឃីត គ្រាប់ពូជបន្លែ១កញ្ចប់ ដែលមាន បន្លែគ្រប់ប្រភេទចំនួន ៧មុខ៕ ដោយ ៖ ពៅ សុខហ៊ាន
ចែករំលែកព័តមាននេះ