ខេត្តកំពង់ឆ្នាំង ៖ ព័ត៌មានដែលទទួលបាននៅព្រឹកថ្ងៃទី០៣ ខែវិច្ឆិកា នេះថា ការឃាត់ខ្លួនអ្នកញៀនល្បែងពិតប្រាកដ គឺបានតែចំនួន១០នាក់ទេ ក្នុងនោះម្នាក់ជាម្ចាស់ផ្ទះឈ្មោះ ជុំ ថ អាយុ៣៨ឆ្នាំ មានទីលំនៅភូមិពន្លៃ ឃុំពន្លៃ ស្រុកបរិបូរណ៌ ។ ចំណែកអ្នកផ្សេងទៀត គ្រាន់តែជាអ្នកចូលទៅផឹកការហ្វេធម្មតាប៉ុណ្ណោះ ។ ចំពោះអ្នកដែលញៀនល្បែងពិតប្រាកដចំនួន៩នាក់ និងម្ចាស់ផ្ទះ១នាក់ រួមនិងវត្ថុតាង ត្រូវបានសមត្ថកិច្ចកសាងសំណុំរឿង បញ្ជូនទៅតុលាការនៅព្រឹកនេះ ។
សូមរំលឹកថា ដោយមានការសម្របសម្រួលពី ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង និងមានការបញ្ជាពីលោកឧត្តមសេនីយ៍ទោ ស្នងការនគរបាលខេត្ត កាលពីរសៀលថ្ងៃទី០២ វិច្ឆិកា កម្លាំងសមត្ថកិច្ចនគរបាលចម្រុះមួយក្រុម ដឹកនាំដោយលោក ប៉ុល វុទ្ឋី ស្នងការរងនគរបាលខេត្ត បានឆ្មក់ចុះបង្ក្រាបល្បែងស៊ីសងជល់មាន់តាមអនឡាញមួយកន្លែងនៅក្នុងភូមិពន្លៃ ឃុំពន្លៃ ស្រុកបរិបូណ៌ ។
បើតាមប្រភពពីប្រជាពលរដ្ឋដែលនៅជុំវិញកន្លែងលេងល្បែងស៊ីសងជល់មាន់តាមអនឡាញខាងលើបានឱ្យដឹងថា៖ ទីតាំងជល់មាន់លើកញ្ចក់ទូរទស្សន៍នេះ កើតមានយូរមកហើយ ពុំដែលឃើញមានសមត្ថកិច្ចណាបានចុះធ្វើការបង្ក្រាបឡើយ ។ នេះមិនត្រឹមតែលេងល្បែងភ្នាល់ដាក់លុយច្រើនសន្ធឹកសន្ធាប់ប៉ុណ្ណឹងទេ ទីតាំងខាងលើក៏បានបង្ការរំខានដល់អ្នករស់នៅជិតខាង ពីសម្លេងហ៊ោកញ្ជ្រៀវ ឈ្នះចាញ់ និង ខៀវ ក្រហម ហែលហូរចេញពីហាងកាហ្វេ បង្កប់ល្បែងស៊ីសងនេះផងដែរ ។
យោងតាមសមត្ថកិច្ចនគរបាលការិយាល័យ ព្រហ្មទណ្ឌកំរិតស្រាល នៃស្នងកការដ្ឋាននគរបាល ខេត្តកំពង់ឆ្នាំងបានបញ្ជាក់ថា៖ ជាលទ្ឋផលបឋម នៃការបង្ក្រាប ទីតាំងបើកល្បែងជល់ មានតាមអនឡាញខាងលើនេះ គឺឃាត់ខ្លួនបានចំនួន១៧នាក់ និងម៉ូតូចំនួន ២១គ្រឿង។ ក្រុមអ្នកញៀនល្បែង និងមធ្យោបាយ ទាំងអស់បានបញ្ជូនមកកាន់ស្នងការដ្ឋាន នគរបាលខេត្តនៅរសៀលថ្ងៃដដែល ដើម្បីកសាងសំណុំរឿង។
ចែករំលែកព័តមាននេះ