Zidane ចាត់ទុកការប៉ះ Inter Milan រាត្រីនេះជាជំនួបវគ្គផ្តាច់ព្រ័ត្រ
អេស្ប៉ាញ ៖ លោក Zinedine Zidane គ្រូបង្វឹកក្រុម Real Madrid ចង់ឱ្យកូនក្រុមទាំងអស់របស់លោក ចាត់ទុកការប្រកួតវគ្គជម្រុះក្នុងពូលក្របខណ្ឌ…
អេស្ប៉ាញ ៖ លោក Zinedine Zidane គ្រូបង្វឹកក្រុម Real Madrid ចង់ឱ្យកូនក្រុមទាំងអស់របស់លោក ចាត់ទុកការប្រកួតវគ្គជម្រុះក្នុងពូលក្របខណ្ឌ Champions League ទល់នឹងក្រុមភ្ញៀវ Inter Milan នៅរាត្រីថ្ងៃអង្គារនេះ ដូចជាការប្រកួតវគ្គផ្តាច់ព្រ័ត្រ។
Real Madrid ធ្វើពុំបានល្អទាល់តែសោះ បន្ទាប់ពីរកបានត្រឹមតែ ១ពិន្ទុប៉ុណ្ណោះពីការប្រកួត ២លើក និងកំពុងនៅបាតតារាងពូល B ដោយបានចាញ់ក្រុមភ្ញៀវ Shakhtar Donetsk ៣-២ និងបន្តស្មើ ២-២ ទល់នឹងក្រុមម្ចាស់ផ្ទះ Borussia Moenchengladbach កាលពីសប្តាហ៍មុន។
លោក Zinedine Zidane បានថ្លែងក្នុងសន្និសីទសារព័ត៌មានមួយកាលពីថ្ងៃច័ន្ទថា «Inter គឺជាក្រុមដ៏ល្អ និងរឹងមាំមួយជាមួយទម្រង់នៃការលេងដ៏ល្អ។ ហើយការប្រកួតនេះ នឹងក្លាយជាការប្រកួតផ្តាច់ព្រ័ត្រសម្រាប់ពួកយើង»។
គ្រូបង្វឹកបារាំងវ័យ ៤៨ឆ្នាំដដែលបានបន្តទៀតថា «យើងតែងតែប្រាថ្នាចង់ឈ្នះអ្វីៗគ្រប់យ៉ាងដែលយើងបានចូលរួម។ យើងតែងតែចង់បង្ហាញថាយើងជាក្រុមដែលពូកែបំផុតមួយ ហើយវាក៏ជាអ្វីដែលពួកយើងចង់បានបន្ថែមទៀត»៕ (ដកស្រង់ចេញពី Reuters)
ចែករំលែកព័តមាននេះ