សហរដ្ឋអាមេរិក ៖ ខណៈសល់ពេលមិនដល់៨ថ្ងៃទៀតផង ដល់ថ្ងៃបោះឆ្នោតប្រធានាធិបតីអាមេរិក លោកដូណាល់ត្រាំកាលពីថ្ងៃទី២៦តុលា បានរៀបចំធ្វើមីទ្ទីងឃោសនា៣នៅរដ្ឋផេនស៊ីលវេនៀ ដែលជារដ្ឋគន្លឹះមួយសម្រាប់ដណ្ដើមយកជោគជ័យ ក្នុងការបោះឆ្នោតនោះ ខណៈគូប្រជែងលោកចូបៃដេន ក៏ទៅឃោសនានៅរដ្ឋនោះដែរ ។
ក្នុងមីទ្ទីងមួយនៅទីក្រុងMARTINSBURGរដ្ឋផេនស៊ីលវេនៀលោកត្រាំថ្លែងថា ប្រសិនបើយើងឈ្នះនៅរដ្ឋនេះ នោះយើងនឹងជាអ្នកឈ្នះក្នុងការប្រកួត។ លោកព្យាករណ៍ពីជ័យជម្នះមួយក្នុងរដ្ឋនេះ ក៏ទោះបីការស្ទាបស្ទង់មតិភាគច្រើនបង្ហាញថា លោកចាញ់ប្រៀបលោកបៃដេនក្ដី។
ចំណែកលោកចូបៃដេនវិញក៏មានមុខក្នុងរដ្ឋនោះដែរ កាលពីថ្ងៃទី២៦តុលាដែលនៅទីនោះ លោកបានជួបជាមួយបណ្ដាអ្នកគាំទ្រលោក និងនិយាយជាមួយបណ្ដាអ្នកកាសែត។ បេក្ខជនគណបក្សប្រជាធិបតេយ្យថ្លែងថា លោកមិនទាន់ប្រាកដក្នុងចិត្តច្បាស់ពេកទេ តែលោកសង្ឃឹមថា បើព្រះលោកជួយ លោកនឹងជាអ្នកឈ្នះក្នុងរដ្ឋនោះដែលជារដ្ឋកំណើតរបស់លោក។លោកបៃដេនក៏បង្កើនការរិះគន់នានាប្រឆាំងលោកត្រាំ ពិសេសការគ្រប់គ្រងមិនបានរបស់គូប្រជែងរូបនោះ លើការឆ្លងរាលដាលនៃវីរុសCOVID-19 នៅសហរដ្ឋអាមេរិក។
តាមការស្ទាបស្ទង់មតិមួយរបស់REUTERS/IPSOSចេញផ្សាយនាថ្ងៃទី២៦តុលាថា លោកចូបៃដេន នៅរក្សាការនាំមុខរឹងមាំលើលោកត្រាំ ក្នុងរដ្ឋគន្លឹះវីស្កុនស៊ីននិងនាំមុខដ៏ខ្លីនិងមិនច្បាស់ក្នុងរដ្ឋគន្លឺះផេនស៊ីលវេនៀ ដែលរដ្ឋទាំង២នោះដើរតួនាទីសំខាន់ ក្នុងការបោះឆ្នោតប្រធានាធិបតីអាមេរិក។ REUTERS/IPSOSតែងធ្វើជាទៀងទាត់ការស្ទាបស្ទង់មតិ ក្នុងរដ្ឋគន្លឺះ៦គឹ រដ្ឋវីស្កុនស៊ីន ផេនស៊ីលវេនៀ មីជីហ្គេន ការ៉ូលីនខាងជើង ផ្លរីដានិងអារីហ្សូណា ដែលដើរតួនាទីសំខាន់បំផុតក្នុងការបោះឆ្នោត។
ក្នុងរដ្ឋវីស្កុនសីុនលោកបៃដេនមានអ្នកចង់បោះឆ្នោតឲ្យលោកបៃដេន៥៣% ទល់នឹង៤៤%សម្រាប់លោកត្រាំ។ នោះជាលទ្ធផលនៃការស្ទាបស្ទង់មតិ ពីថ្ងៃទី២០ទៅ២៦តុលា។ នៅរដ្ឋនោះការស្ទាបស្ទង់កាលពីសប្ដាហ៍មុន បង្ហាញថា អ្នកចង់បោះឆ្នោតឲ្យលោកបៃដេនមាន៥១% និងសម្រាប់លោកត្រាំ៤៣%។ ក្នុងចំណោមអ្នកស្ទាបស្ទង់ទាំងនេះ ១ភាគ៣និយាយថា ពួកគេបានបោះឆ្នោតមុនកាលកំណត់រួចហើយ។
ម្យ៉ាងទៀតលោកត្រាំសម្ដែងក្ដីរីករាយកាលពីថ្ងៃទី២៦តុលា ដោយសារព្រឹទ្ធសភាបានអនុម័តហើយ ការតែងតាំងរបស់លោកឲ្យលោកស្រី AMY CONEY BARRETTអ្នកអភិរក្សនិយមមួយរូប ជាចៅក្រមតុលាការកំពូលអាមេរិក ខណៈជិតដល់ថ្ងៃបោះឆ្នោត៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ