រាជធានីភ្នំពេញ ៖ លោកអគ្គបណ្ឌិតសភាចារ្យឧបនាយករដ្ឋមន្ត្រីអូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ប្រធានសហព័ន្ធកីឡាការ៉ាតេកម្ពុជា មានប្រសាសន៍ថា ទោះបីជាមានគ្រូខ្លាំងពូកែយ៉ាងណាក៏ដោយ បើកីឡាករ-កីឡាការិនីគ្មានទេពកោសល្យ គ្មានឆន្ទៈមោះមុត…
រាជធានីភ្នំពេញ ៖ លោកអគ្គបណ្ឌិតសភាចារ្យឧបនាយករដ្ឋមន្ត្រីអូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ប្រធានសហព័ន្ធកីឡាការ៉ាតេកម្ពុជា មានប្រសាសន៍ថា ទោះបីជាមានគ្រូខ្លាំងពូកែយ៉ាងណាក៏ដោយ បើកីឡាករ-កីឡាការិនីគ្មានទេពកោសល្យ គ្មានឆន្ទៈមោះមុត និងស្មារតីរឹងមាំសមជាអ្នកប្រយុទ្ធពិតប្រាកដទេ ក៏មិនអាចឈ្នះគេបានដែរ ។
លោកមានប្រសាសន៍បែបនេះនៅក្នុងឱកាសបិទការប្រកួតកីឡាការ៉ាតេជ្រើសរើសជើងឯកថ្នាក់ជាតិនៅមជ្ឈមណ្ឌលហ្វឹកហ្វឺនកីឡាការ៉ាតេក្នុងសាកលវិទ្យាល័យភូមិន្ទភ្នំពេញកាលពីរសៀលថ្ងៃទី២៥តុលា។
លោកអគ្គបណ្ឌិតសភាចារ្យបន្តថា ឥឡូវនេះសហព័ន្ធកីឡាការ៉ាតេកម្ពុជាបានសម្រេចទទួលយកគ្រូបង្វឹកមានគុណវុឌ្ឍិខ្ពស់ចំនួន២រូបគឺលោកHassan មកពីប្រទេសអ៊ីរ៉ង់ មានខ្សែក្រវាត់ខ្មៅ៨ដាន់ ។ លោកមានតួនាទីបង្ហាត់កីឡាករ-កីឡាការិនីជម្រើសជាតិផ្នែកប្រយុទ្ធ(Kumite)និងលោក Shokei Toyama មកពីប្រទេសជប៉ុនមានតួនាទីបង្ហាត់ផ្នែកកាតា(Kata)។
លោកគ្រូទាំងពីររូបនេះពិតជាមានឆន្ទៈខ្ពស់ចង់ជួយឱ្យកីឡាករ កីឡាការិនីកម្ពុជាដណ្ដើមបានមេដាយក្នុងការប្រកួតលើឆាកអន្តរជាតិ ជាពិសេសការប្រកួតកីឡាស៊ីហ្គេមឆ្នាំ៣០២៣ខាងមុខ ។ ដូច្នេះសហព័ន្ធមានសង្ឃឹមលើការខិតខំប្រឹងប្រែងរបស់គ្រូបង្វឹក កីឡាករ កីឡាការិនីជម្រើសជាតិដែលត្រូវយកចិត្តទុកដាក់ខ្ពស់ក្នុងការហ្វឹកហាត់ លះបង់ការឈឺចាប់ឱ្យដល់កម្រិត ដើម្បីទទួលបានគុណផលកីឡាការ៉ាតេកម្រិតខ្ពស់ ដណ្ដើមឱ្យបានមេដាយក្នុងការប្រកួតនៅលើឆាកអន្តរជាតិ ពិសេសការប្រកួតកីឡាស៊ីហ្គេមលើកទី៣១ចុងឆ្នាំនេះនៅទីក្រុងហាណូយប្រទេសវៀតណាម និងការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ។
លោកអគ្គបណ្ឌិតអូន ព័ន្ធមុនីរ័ត្ន បញ្ជាក់ថា សម្រាប់ការប្រកួតជ្រើសរើសជើងឯកកីឡាការ៉ាតេទូទាំងប្រទេសប្រចាំឆ្នាំ២០២០នេះ ពិតជាមានសារៈសំខាន់ខ្លាំងណាស់ មិនត្រឹមតែជួយលើកកម្ពស់សុខភាព បង្កើនមិត្តភាព និងសាមគ្គីភាពផ្ទៃក្នុង រវាងអ្នកហាត់ការ៉ាតេប៉ុណ្ណោះទេ តែបានរួមចំណែកយ៉ាងធំក្នុងការវាស់ស្ទង់កម្រិតបច្ចេកទេសរបស់កីឡាករ កីឡាការិនីម្នាក់ៗ។ ផ្ដល់ភាពងាយស្រួលដល់គ្រូបង្វឹកអាចជ្រើសរើសបានកីឡាករឆ្នើមៗសម្រាប់ត្រៀមចូលរួមប្រកួតនៅក្នុងព្រឹត្តិការណ៍កីឡាជាតិនិងអន្តរជាតិ ។
ហេតុដូច្នេះហើយលោកបានស្នើសុំទៅដល់ថ្នាក់ដឹកនាំ លោកគ្រូអ្នកគ្រូ និងកីឡាករ កីឡាការិនីទាំងអស់ បន្តរក្សាសាមគ្គីភាពផ្ទៃក្នុង សហការគ្នាបង្កើនភាពស្និទ្ធស្នាល ស្វាហាប់ក្នុងការងារជំនាញឱ្យកាន់តែខ្លាំងក្លា និងឆន្ទៈមោះមុតបន្ថែមទៀតដើម្បីឆ្ពោះទៅដណ្ដើមជោគជ័យក្នុងការប្រកួតកីឡាស៊ីហ្គេមឆ្នាំ២០២៣ ខាងមុខ។
បើផ្អែកតាមអនុសាសន៍របស់សម្ដេចតេជោ នាយករដ្ឋមន្ត្រី ក្រសួងមួយត្រូវជួយគាំទ្រចលនាកីឡាមួយ ។ ដូចនេះលោកបានប្រកាសថាក្រសួងសេដ្ឋកិច្ចនិងហិរញ្ញវត្ថុគឺជាក្រសួងទ្រទ្រង់វិស័យការ៉ាតេជារៀងរហូត ។ ជាមួយគ្នានេះ លោកបានកោតសរសើរថា ការចូលរួមរបស់កីឡាករ កីឡាការិនីឆ្នាំនេះមានការកើនឡើងជាងឆ្នាំមុនៗ ទោះបីប្រទេសកម្ពុជាស្ថិតនៅក្នុងបរិបទកូវីដ-១៩ក៏ដោយ ៕
ចែករំលែកព័តមាននេះ