រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានស្នើប្រមុខរដ្ឋស្តីទីកែសម្រួលព្រំប្រទល់រាជធានីភ្នំពេញ និងខេត្តកណ្តាល ដោយកាយផ្ទៃដីទំហំ៣៧៦ហិកតាពីក្រុងតាខ្មៅ ខេត្តកណ្តាល ឲ្យស្ថិតក្រោមការគ្រប់គ្រងរបស់ខណ្ឌដង្កោរវិញ។
យោងតាមលិខិតរបស់សម្តេចតេជោ ហ៊ុន សែន នាយករដ្ឋមន្ត្រីដាក់ជូសម្តេចវិបុលសេនា ភក្តី សាយឈុំ ប្រមុខរដ្ឋស្តីទីបានបញ្ជាក់ថា ៖ «ខ្ញុំសូមគោរពជម្រាបជូនសម្តេចតប្រមុខរដ្ឋស្តីទី មេត្តាជម្រាបថារដ្ឋបាលរាជធានីភ្នំពេញ និងរដ្ឋបាលខេត្តកណ្តាល បានធ្វើលិខិតមកក្រសួងមហាផ្ទៃ ដើម្បីសុំកែសម្រួលព្រំប្រទល់រដ្ឋបាលរវាងរាជធានីភ្នំពេញ និងខេត្តកណ្តាល ដោយកាត់យកផ្ទៃដីទំហំ៣៧៦ហិកតា ពីក្រុងតាខ្មៅ ខេត្តកណ្តាល ឲ្យមកស្ថិតក្រោមការគ្រប់គ្រងរបស់ខណ្ឌដង្កោ រាជធានីភ្នំពេញ ស្របតាមស្មារតីនៃលិខិតលេខ១៩០ ស.ជ.ណ ចុះថ្ងៃទី២០ ខែកុម្ភៈ ឆ្នាំ២០១៥ របស់ទីស្តីការគណៈរដ្ឋមន្ត្រី ដើម្បីដោះស្រាយផលប៉ះពាល់ និងជួយសម្រួលដល់ការអនុវត្តគម្រោងប្លង់មេសម្រាប់អភិវឌ្ឍន៍ទីក្រុងរណបបឹងទំពុន និងបឹងជើងឯក ក៏ដូចជាជួយសម្រួលដល់ការគ្រប់គ្រងរដ្ឋបាល កិច្ចការអភិវឌ្ឍន៍ ការរក្សាសន្តិសុខសណ្តាប់ធ្នាប់ ការផ្តល់សេវាសាធារណៈ និងការងារសង្គមផ្សេងៗ»។
លិខិតរបស់សម្តេចតេជោ បានលើកឡើងទៀតថា ផ្អែកតាមរបាយការណ៍ស្តីពីលទ្ធផលនៃការធ្វើបច្ចុប្បន្នភាពព្រំប្រទល់ ស្ថិតិប្រជាពលរដ្ឋ និងការចុះពិនិត្យទីតាំងជាក់ស្តែងឃើញថា ការស្នើសុំកែសម្រួលខាងលើនេះ មានការប្រែប្រូលនូវទំហំផ្ទៃដីពី៣៧៦ហិកតា មកនៅត្រឹមទំហំ៣០២ហិកតា ៩៣៩១ម៉ែត្រការ៉េ ដោយកាត់យកភូមិស្ទឹងជ្រៅ និងភូមិព្រែកតាពៅ នៃសង្កាត់ដើមរមៀន ភូមិព្រែកអញ្ជេញ នៃសង្កត់ព្រែកឬស្សី ភូមិព្រៃឡុង នៃសង្កាត់តាក្តុល និងភូមិបត្តាជី នៃសង្កាត់ព្រែកហូរ សង្កាត់ចំនួន៤ ស្នើនឹង៥ភូមិ ដែលមានលំនៅឋានសរុប១៣៩ខ្នងផ្ទះ ស្មើនឹង១៧៧គ្រួសារ ប្រជាពលរដ្ឋចំនួន៧៥៣នាក់ ។
ទន្ទឹមនេះ រដ្ឋបាលខេត្តកណ្តាល បានគោរពស្នើសុំកាត់ផ្ទៃដីទំហំ២ហិកតា ៥១៥ម៉ែត្រការ៉េ (ចំណែកដីនៃវត្តបុទុមសាគរ នៅវត្តទួលក្របៅ) ពីសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ឲ្យមកស្ថិតក្រោមការគ្រប់គ្រងរបស់សង្កាត់ដើមមៀន ក្រុងតាខ្មៅ ខេត្តកណ្តាល ដើម្បីឲ្យផ្ទៃដីវត្តទាំងមូលស្ថិតក្រោមការគ្រប់គ្រងរបស់រដ្ឋបាលតែមួយ និងងាយស្រួល ក្នុងការចុះបញ្ជីវិញ្ញបនបត្រសម្គាលនូវអចលនវត្តជូនវត្ត។
លិខិតលើកឡើងទៀតថា យោងតាមច្បាប់ស្តីពីកាគ្រប់គ្រងរដ្ឋបាលរាជធានី-ខេត្ត-ក្រុង ស្រុក-ខណ្ឌ ត្រង់មាត្រា៦វាក្សខណ្ឌទី១ បានចែងថា «ការបង្កើត ការលុបចោល ការកែប្រែ ព្រំប្រទល់ និងការកំណត់ឈ្មោះខេត្ត ត្រូវសម្រេចដោយព្រះរាជក្រឹត្យតាមដំណើរបស់នាយករដ្ឋមន្ត្រី តាមសេចក្តីស្នើសុំពីរដ្ឋមន្ត្រីក្រសួងមហាផ្ទៃ»។
លិខិតដែលចុះហត្ថលេខាដោយសម្តេចតេជោ ហ៊ុន សែន បានគូសញ្ជាក់ថា ផ្អែកលើបទ បញ្ញាត្តិច្បាប់ និងមូលដ្ឋានដូចបានគោរពជម្រាបជូនខាងលើតាងនាមរដ្ឋាភិបាលនៃព្រះ រាជាណាចក្រកម្ពុជា ខ្ញុំសូមគោរពស្នើសុំសម្តេចប្រមុខរដ្ឋស្តីទី មេត្តាអនុញ្ញាត ដើម្បីកែសម្រួ លព្រំប្រទល់រដ្ឋបាលរវាងរាជធានីភ្នំពេញ និងខេត្តកណ្តាល ដោយកាត់យកភួមិចំនួន៥ គឺភូមិស្ទឹងជ្រៅ និងភូមិព្រែកតាពៅ នៃសង្កាត់ដើមរមៀន ភូមិព្រែកអញ្ជេញ នៃសង្កត់ព្រែក ឬស្សី ភូមិព្រៃឡុង នៃសង្កាត់តាក្តុល និងភូមិបត្តាជីនៃសង្កាត់ព្រែកហូរ ដែលមានផ្ទៃដីទំហំ៣០២ ហិកតា ៩៣៩១ម៉ែត្រការ៉េ ពីក្រុងតាខ្មៅ ខេត្តកណ្តាល មកឲ្យស្ថិតក្រោមការគ្រប់គ្រងរបស់សង្កាត់ជើងឯក ខណ្ឌដង្កោ រាជធានីភ្នំពេញ និងកាត់ទំហំ២ហិកតា៥១៥៥ម៉ែត្រការ៉េ (ចំណែកដីនៃវត្តបុទ មសាគរហៅវត្តក្របៅ) ពីសង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ ឲ្យមកស្ថិតក្រោមកាគ្រប់គ្រងរបស់សង្កាត់ដើមមៀន ក្រុងតាមខ្មៅ ខេត្តកណ្តាល ៕
ចែករំលែកព័តមាននេះ