ប៉ាគីស្ថាន ៖ ជារឿងគួរឱ្យអាណិតអាសូរមួយ ហើយក៏គួរឱ្យស្ងើចសរសើរផងដែរ ដែលបុរសជនជាតិប៉ាគីស្ថានម្នាក់ពិការដៃទាំងសងខាងតាំងពីកំណើត ប៉ុន្តែបច្ចុប្បន្នគាត់គឺជាអ្នកលេងស្នូកឃ័រពូកែបំផុតម្នាក់ នៅក្នុងតំបន់ដែលខ្លួនរស់នៅ និងកំពុងតែល្បីល្បាញខ្លាំងលើប្រព័ន្ធផ្សព្វផ្សាយក្នុងស្រុកផងដែរ។
លោក Muhammad Ikram មានអាយុ ៣២ឆ្នាំបច្ចុប្បន្នរស់នៅទីក្រុង Samundri ក្នុងខេត្ត Punjab ទទួលបានការស្ងើចសរសើរមិនដាច់ពីមាត់ពីប្រជាជន ជាពិសេសអ្នកលេងស្នូកឃ័រជាច្រើន។ បើទោះបីជាពិការដៃទាំងសងខាងក៏ពិតមែន ប៉ុន្តែ Ikram បានចំណាយពេល៨ឆ្នាំ ប្រើប្រាស់ចង្កាលេងស្នូកឃ័រយ៉ាងស្ទាត់ជំនាញ ព្រមទាំងបានផ្តួលជើងខ្លាំងក្នុងទីក្រុង ដែលខ្លួនរស់នៅរាប់មិនអស់។
Ikram បាននិយាយថា «ខ្ញុំបានជួបអ្នកលេងស្នូកឃ័រល្អៗជាច្រើន ដែលប្រាប់ខ្ញុំថា ខ្ញុំជាមនុស្សពូកែ ហើយខ្ញុំនឹងអាចនាំមកនូវកិត្តិនាមដ៏អស្ចារ្យដល់ប្រទេសប៉ាគីស្ថាន»។
ជាកូនប្រុសម្នាក់ក្នុងចំណោមបងប្អូន ៩នាក់ដែលកើតក្នុងគ្រួសារក្រីក្រមួយ Ikram មិនបានទទួលការរៀនសូត្រឡើយ។ ហើយការកំសាន្តដ៏សំខាន់របស់គាត់ គឺមើលអ្នកដទៃលេងស្នូកឃ័រ ដែលជាល្បែងមួយគ្មាននរណាម្នាក់ស្រមៃថា គាត់អាចលេងបាននោះទេ។ ប៉ុន្តែដោយសារតែការស្រលាញ់ មិនបានធ្វើឱ្យរូបគាត់បោះបង់ចោលការហ្វឹកហាត់ រហូតក្លាយជាអ្នកលេងដ៏ពូកែមកដល់ពេលនេះ ។
លោក Mian Usman Ahmed ម្ចាស់ក្លិបកំសាន្តស្នូកឃ័រ Cuemaster បាននិយាយថា «គេបានមកកាន់ក្លិបខ្ញុំ ដើម្បីសុំខ្ញុំលេង។ យើងក៏បានអនុញ្ញាតឱ្យគេលេង។ ហើយបច្ចុប្បន្ន Ikram បានឈ្នះពានរង្វាន់ជាច្រើនពីការប្រកួតក្នុងស្រុក នៅរយៈពេល២ឆ្នាំកន្លងមកនេះ»។
បំណងដ៏ធំបំផុតរបស់ Ikram គឺចង់លេងនៅក្រៅប្រទេស ប្រសិនបើគេទទួលបានការគាំទ្រ ដោយរូបគេចង់ឱ្យអ្នកបរទេសស្គាល់អំពីខ្លួន និងការលេងរបស់ខ្លួន៕ (ដកស្រង់ចេញពី AFP)
ចែករំលែកព័តមាននេះ