ខេត្តបាត់ដំបង ៖ បន្ទាប់ពីទទូលបានព័ត៌មានថា ព្រះសង្ឃជាច្រើនអង្គដែលគង់នៅ«វត្តត្រស់» ស្ថិតនៅភូមិត្រស់ ឃុំអូរតាគី ស្រុកថ្មគោល កំពុងប្រឈមនឹងជំនន់ទឹកភ្លៀងកាត់ផ្ដាច់ទាំងផ្លូវ ផ្ដាច់ទាំងចង្ហាន់ផង ធ្វើឲ្យព្រះសង្ឃវត្តនេះ ជួបនូវសភាពអត្តខាត់យ៉ាងខ្លាំង លោក កាំង កុសល ប្រធានការិយាល័យលិខិតឆ្លងដែនសាខាបាត់ដំបង បានប្រគោកប្រកាសភ្លាមៗនៅព្រឹកថ្ងៃទី២១ តុលា ដើម្បីរៃអង្គាសនូវទេយ្យទានពីសប្បុរសជនមួយចំនួន ដឹកយកទៅប្រគេនដល់ព្រះសង្ឃដែលគង់នៅក្នុងវត្តនេះ។
អាជ្ញាធរមូលដ្ឋានបានរាយការណ៍ថា ទឹកជំនន់បានវាយលុកផ្ដាច់ផ្លូវប្រវែងជាង២គីឡូម៉ែត្រ ដែលតភ្ជាប់ពីផ្លូវជាតិលេខលេខ៥ ឆ្ពោះទៅកាន់ «វត្តត្រស់» ដែលស្ថិតក្នុងភូមិ ឃុំខាងលើ ធ្វើឲ្យលិចលង់ទីវត្តអារាមមួយនេះយ៉ាងធ្ងន់ធ្ងរ ដែលមិនអាចឲ្យព្រះសង្ឃនិមន្តចេញបិណ្ឌបាត្រចង្ហាន់ខាងក្រៅបានឡើយ ធ្វើឲ្យព្រះសង្ឃនៅក្នុងវត្តប្រឈមនឹងការដាច់ចង្ហាន់ តែបានពុទ្ធបរិស័ទចំណុះជើងវត្តជួយផ្គត់ផ្គង់ជាប្រចាំ ។
ក្រោយពីទទូលបាននូវព័ត៌មានដ៏អត្តខាត់នេះ លោក កាំង កុសល ប្រធានការិយាល័យលិខិតឆ្លងដែន សាខាបាត់ដំបង ( ការិយាល័យធ្វើប៉ាស្ព័រ ) និង លោក នក់ គួយហុង ហៅ ម៉េង ជាអាជីវករលក់ដូរ បានមូលមតិគ្នារៀបចំជាទេយ្យទានបន្តិចបន្ទូចនាំយកទៅប្រកេនដល់ព្រះសង្ឃដល់«វត្តត្រស់»នេះភ្លាមៗតែម្ដង។ លោក កាំង កុសល បានប្រាប់ថា ទឹកជំនន់មិនត្រឹមតែកាត់ផ្លូវប្រវែងជាង២គីឡូម៉ែត្រចូលទៅកាន់វត្តនេះទេ ទឹកជំនន់បានកាត់ផ្ដាច់ទាំងចង្ហាន់ព្រះសង្ឃថែមទៀត ដោយសារតែមិនអាចនិមន្តចេញបិណ្ឌបាត្របាន ។
លោក កាំង កុសល បានថ្លែងថា បន្ទាប់ពីលោកទទូលបានដំណឺងនេះភ្លាម រូបលោក និងលោកនក់ គួយហុង បានមូលមតិគ្នារៀបចំទិញគ្រឿងឧបភោគ បរិភោគ ដឹកយកទៅប្រកេនព្រះសង្ឃដល់វត្តភ្លាមៗតែម្ដង។ លោកបានបញ្ជាក់ថា ទេយ្យទានទាំងនោះរួមមានអង្ករចំនួន២០០គ.ក មីចំនួន០៦កេស ទឹកត្រី និងទឹកស៊ីអីវចំនួន១០យូរ ស្ករសចំនួន១០គ.ក តែចំនួន៤កញ្ចប់ធំ ទឹកសុទ្ធវីតាល់ចំនួន០២កេស និងថវិកាចំនួន៥០ម៉ឺន
រៀល ។
ជាមួយនឹងទេយ្យទានសង្គ្រោះបឋមពីសប្បុរសជនខាងលើនេះ ព្រះតេជគុណ ហេង សុខន ព្រះគ្រូចៅអធិការវត្ត និងជាព្រះគ្រូអនុគណស្រុកថ្មគោល បានមានសង្ឃដីកាថា នេះជាលើកដំបូងដែលវត្តរបស់ព្រះអង្គទទួលបានជំនួយឧបត្ថម្ភ ក្នុងអំឡុងជំនន់ទឹកភ្លៀងវាយប្រហារលិចលង់យ៉ាងធ្ងន់ធ្ងរជិត០២សប្ដាហ៍កន្លងទៅនេះ។ ព្រះគ្រូចោអធិការវត្តដែលមានព្រះជន្ម៨៤វស្សាទៅហើយនោះ បានបញ្ជាក់ថា ព្រះសង្ឃនៅក្នុងវត្តទាំងអស់ មិនទាន់ខ្វះខាតចង្ហាន់ធ្ងន់ធ្ងរទេ។ ប៉ុន្តែដោយសារមួយរយៈនេះ ស្បៀងអាហារមួយចំនួនដែលមានសេសសល់នៅក្នុងវត្ត ត្រូវព្រះអង្គចែកទានដល់ពលរដ្ឋក្រីក្រនៅក្នុងភូមិ ដែលរងគ្រោះដោយទឹកជំនន់ដែរ ទើបធ្វើឲ្យព្រះសង្ឃនៅក្នុងវត្តជួបភាពអត្តខាត់នៅពេលនេះ តែយ៉ាងណា មានពុទ្ធបរិស័ទចំណុះជើងវត្ត នៅជួយធ្វើចង្ហាន់យកមកប្រគេនព្រះសង្ឃបានរាល់ថ្ងៃ បើទោះជាមិនគ្រប់គ្រាន់ក្ដី។
ជុំវិញសង្ឃដីកាព្រះតេជគុណចៅអធិការវត្តត្រស់នេះ ពុទ្ធបរិស័ទ ដែលកំពុងធ្វើចង្ហាន់ប្រគេនព្រះសង្ឃនៅក្នុងវត្ត ក៏បានលើកឡើងប្រហាក់ប្រហែលដែរថា តាំងពីមានជំនន់ទឹកភ្លៀងលិចលង់ដល់ក្នុងវត្ត និងលិចបាត់ផ្លូវ ព្រះសង្ឃមិនអាចនិមន្តចេញបិណ្ឌបាត្រចង្ហាន់បានឡើយ ទើបអ្នកភូមិនាំគ្នារៃអង្គាសបច្ច័យ ឬ ធ្វើចង្ហាន់យកទៅប្រកេនព្រះសង្ឃដល់ក្នុងវត្តតែម្ដង។ អ្នកភូមិនិយាយថា ទឹកជំនន់មិនត្រឹមកាត់ផ្ដាច់ផ្លូវចូលវត្តប្រវែងជាង០២គ.ម៉ និង ផ្លូវនានានៅក្នុងភូមិស្ទើរទាំងស្រុងប៉ុណ្ណោះទេ ថែមផ្ដាច់ទាំងចង្ហាន់ព្រះសង្ឃទៀតផង ដោយសារមិនអាចចេញនិមន្តបិណ្ឌបាត្របាន។
ចំពោះទេយ្យទានបន្តិចបន្តួច ដែលសប្បុរសជននាំយកទៅប្រគេនខាងលើនេះ ព្រះតេជគុណ ព្រះវិបុលមុនី ហេង សុខន បានមានសង្ឃដីកាបញ្ជាក់ថា អំណោយទាំងនេះ ព្រះអង្គ និង បែងចែកខ្លះៗជូនដល់គ្រួសារក្រីក្រ ដែលរងគ្រោះដោយទឹកជំនន់។ ព្រោះនេះជាវប្បធម៌ចែករំលែក ដែលប្រមុខរាជរដ្ឋាភិបាលតែងធ្វើបែបនេះ ជាមួយពលរដ្ឋកន្លងមក បើទោះជាទេយ្យទាននោះតិចតួចស្ដូចស្ដើងក្ដី។
ព្រះអង្គក៏សូមថ្លែងអំណរគុណផងដែរ ដល់ម្ចាស់ទេយ្យទាន ដែលបានជួយឧបត្ថម្ភនៅពេលព្រះសង្ឃកំពុងជួបនូវភាពអត្តខាត់បែបនេះ ៕
ចែករំលែកព័តមាននេះ