ខេត្តស្វាយរៀង ៖ សាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំខេត្តស្វាយរៀង នៅព្រឹកថ្ងៃទី២០ ខែតុលា ឆ្នាំ២០២០នេះ បានសហការជាមួយមន្ទីរពាណិជ្ជកម្មខេត្ត អាជ្ញាធរដែនដី ចុះពិនិត្យមុខទំនិញនៅផ្សារ វាលយន្ត ក្រុងស្វាយរៀង និងតូបអាជីវករលក់ដូរក្នុងមន្ទីពេទ្យខេត្តស្វាយរៀង ដើម្បីស្វែងរកសារធាតុគីមី និងទំនិញដែលហួសកាលបរិច្ឆេទប្រើប្រាស់។
បើតាមលោកផឹង និល បានឲ្យដឹងថា នៅព្រឹកនេះ ក្រុមត្រួតពិនិត្យ មន្ត្រីជំនាញយើងបានពិនិត្យគ្រឿងឧបភោគ បរិភោគនៅតាមស្តង់ក្នុងផ្សារតាំងលក់ទំនិញមួយចំនួន និងបានប្រើប្រាស់ឧបករណធ្វើ Test Kits បឋមលើម្ហូបអាហារចំនួន២៦គំរូ ដើម្បីស្វែងរកសារធាតុគីមីហាមឃាត់ដែលធ្វើឲ្យប៉ះពាល់ដល់សុខភាពប្រជាពលរដ្ឋ។ ជាពិសេសមន្ត្រី កបប យើងក៏បានផ្សព្វផ្សាយអនុក្រឹត្យលេខ ១៣៣ ស្តីអំពីផលិតផលចិញ្ចឹមទារក និងកុមារលើសំបកវេចខ្ចប់ម្សៅទឹកដោះគោផងដែរ។
លោកបានបញ្ជាក់ថា ជាលទ្ធផលក្រោយការចុះអនុវត្តការងារ មន្ត្រីជំនាញយើងបានរកឃើញទំនិញមានសារធាតុគីមី ដូចជាងៀតបបែលចំនួន ៧Kg មាន (គីមី Borax ) និងពពុះសណ្តែកចំនួន៥Kg មាន ( គីមី Borax ) ហើយមន្ត្រីជំនាញយើងបានធ្វើកំណត់ហេតុដកហូតទំនិញទាំងនោះយកមករក្សាទុក ដើម្បីធ្វើការដុតកម្ទេចចោលនៅពេលក្រោយ។
លោកបានបញ្ជាក់ថា សារធាតុគីមី បូរ៉ាក់ ដែលអាជីវករដាក់នៅលើមុខទំនិញ គឺមិនឲ្យងាយខូច ក៏ប៉ុន្តែបើអ្នកយកទៅបរិភោគ សារជាតិបូរ៉ាក់ទាំងនេះអាចធ្វើឲ្យប៉ះពាល់ដល់សុខភាពធ្ងន់ធ្ងរ ជាពិសេសក្មេងៗ និងមនុស្សចាស់ ព្រោះថាសារធាតុគីមីបូរ៉ាក់នេះ អាចនៅក្នុងឈាមមនុស្សរយៈពេល៣០ឆ្នាំ ហើយបើបរិភោគត្រឹមតែ៥ក្រាម អាចបង្កជាអាការៈក្អួតឈាមរហូតដល់បាត់បង់ជីវិតបាន។
លោក ផឹង និល បានអំពាវនាវដល់អាជីវករ ដែលជាអ្នកលក់ដូរត្រូវចូលរួមសហការជាមួយមន្ត្រីជំនាញ ដើម្បីធ្វើតេស្តរកសារធាតុគីមីហាមឃាត់ដាក់ក្នុងម្ហូបអាហារ និងទំនិញហួសកាលបរិច្ឆេទប្រើប្រាស់ ដើម្បីចូលរួមលើកកម្ពស់សុខុមាលភាពប្រជាពលរដ្ឋឲ្យបានល្អប្រសើរ៕
ចែករំលែកព័តមាននេះ