អំឡុង​បុណ្យចូលឆ្នាំ​ថ្មី​អ្នកទេសចរ​កើនឡើង​នៅ​នៅ​មណ្ឌលគិរី​និង​រតនគិរី


ខេត្តរតនគិរី​+​មណ្ឌលគិរី ៖ ក្នុង​អំឡុង​បុណ្យចូលឆ្នាំ​ថ្មី​ប្រពៃណី​ជាតិ ក្នុង​រយៈពេល​៣​ថ្ងៃ​ពី​ថ្ងៃ​ទី​១៤​ដល់ទី​១៦ មេ​សា ឆ្នាំ​២០១៥ មាន​អ្នកទេសចរ​ច្រើន​ទៅ​ទស្សនា​កម្សាន្ត​នៅ​តាម​រមណីយដ្ឋាន​នានា​ក្នុង​ខេត្តរតនគិរី និង​មណ្ឌលគិរី ។

បើ​យោង​តាម​របាយការណ៍​ពី​មន្ទីរ​ទេសចរណ៍​ខេត្តរតនគិរី​ឱ្យ​ដឹង​ថា អ្នកទេសចរ​សរុប​ក្នុង​ឱកាស​បុណ្យចូលឆ្នាំ​ថ្មី​មាន​ចំនួន​៦៥.៧២០​នាក់ ក្នុង​នោះ​មាន​អ្នកទេសចរ​ជាតិ ចំនួន​៦៥.២៣៧​នាក់ និង​អ្នកទេសចរ​អន្តរជាតិ​៤៨៣​នាក់ ។ អ្នកទេសចរ​សរុប​កើនឡើង​៦,៩៩% បើ​ប្រៀបធៀប​នឹង​ឆ្នាំ​២០១៤ ។

នៅ​តាម​រមណីយដ្ឋាន និង​ក្រុង​បាន​លុង ក្នុង​ឱកាស​បុណ្យចូលឆ្នាំ​ថ្មី​ប្រពៃណី​ជាតិ​មាន​រៀបចំ​លេងល្បែង​ប្រជាប្រិយ និង​រាំវង់ រាំក្បាច់ ព្រមទាំង​តាំងពិព័រណ៍​វត្ថុ​អនុស្សាវរីយ៍ និង​ម្ហូបអាហារ​សម្រាប់​លក់ដូរ​ជូន​អ្នកទេសចរ​ជាតិ និង​អន្តរជាតិ ។ ក្នុង​បរិវេណ​មន្ទីរ​វប្បធម៌​និង​វិចិត្រសិល្បៈ​ខេត្ត បាន​ដាក់​តាំង​ភ្លើង​ចម្រុះ​ពណ៌​លម្អ​តាម​ដងផ្លូវ​ជាតិ​លេខ​៧៨ និង​តាម​ដងផ្លូវ សំខាន់​ៗ ក្នុងស្រុក ព្រមទាំង​បាន​រៀបចំ​ពិធី​យ៉ាង​អធិកអធម ទទួល​អបអរសាទរ​ឆ្នាំ​ថ្មី ព្រមទាំង​បាញ់​កាំជ្រួច​តូច ធំ ភ្លឺរ​ន្ទោ​ល​ចម្រុះ​ពណ៌​ពេញ​ផ្ទៃ​វេហា ។

នៅ​តាម​រមណីយដ្ឋាន​មានការ​សម្តែង​របាំ​គង​របស់​ជនជាតិ​ដើម​ភាគតិច ចាក់​ធុងបាស់​រាំ​កម្សាន្ត និង​លេងល្បែង​ប្រជាប្រិយ​ដូច​ជា​វាយក្អម បោះអង្គញ់​ជាដើម ។ ទាំងនេះ​សុទ្ធ​សឹង​ជា​ការ​ផ្តើម​ឡើង​ពី​លោក​ថង សា​វុន អភិបាលខេត្ត ដើម្បី​អបអរសាទរ​ទទួល​ឆ្នាំ​ថ្មី​ប្រពៃណី​ជាតិខ្មែរ​យើង និង​ក៏​ដូច​ជា​ទទួល​អ្នកទេសចរ​ជាតិ និង​អន្តរជាតិ​ក្នុង​ដំណើរ​កម្សាន្ត​នៅ​ខេត្តរតនគិរី ។

នៅ​តាម​រមណីយដ្ឋាន​មានការ​គ្រប់គ្រង​បរិស្ថាន សណ្តាប់ធ្នាប់​បាន​ល្អ​ប្រសើរ​ដោយ​រៀបចំ​ចំណតរថយន្ត និង​ម៉ូតូ​ឱ្យ​មាន​របៀបរៀបរយ ប៉ុន្តែ​ការ​គ្រប់គ្រង​កាក​សំណល់​នៅ​ពុំ​ទាន់​បាន​ល្អ​១០០០%​នៅឡើយ ។

តម្លៃ​ដឹក​ជញ្ជូន​អ្នក​ដំណើរការ​កើនឡើង​បន្តិចបន្តួច​ក្នុង​ឱកាស​ពិធី​បុណ្យចូលឆ្នាំ​ថ្មី គឺ​កើនឡើង​ពី​៥​ម៉ឺន​រៀល​ទៅ​៦​ម៉ឺន​រៀល ។ ថ្លៃ​ស្នាក់​នៅ​សណ្ឋាគារ និង​ផ្ទះសំណាក់​កើនឡើង​៥​ដុល្លារ លើស​តម្លៃ​ធម្មតា ។ ទោះជា​យ៉ាងណា​ក្តី មាន​បន្ទប់​គ្រប់គ្រាន់​សម្រាប់​ទទួលភ្ញៀវ ចំពោះ​តម្លៃ​ម្ហូបអាហារ​នៅ​តាម​រមណីយដ្ឋាន​មានការ​ប្រែប្រួល​បន្តិចបន្តួច ។

ដោយឡែក​បញ្ហា​សន្តិសុខ សុវត្ថិភាព​វិញ​មាន​គ្រោះថ្នាក់​ចរាចរ​៤​លើក បណ្តាល​ឱ្យ​មាន​អ្នក​ស្លាប់​ចំនួន​១០​នាក់ របួសធ្ងន់​៧​នាក់ របួសស្រាល​៨​នាក់ ខូចខាត​ម៉ូតូ​៤​គ្រឿង រថយន្ត​២​គ្រឿង ។ គ្រោះថ្នាក់​ចរាចរ​ប្រៀប​នឹង​ឆ្នាំ​មុន​ថយ​ចុះ ។

នៅ​ខេត្តមណ្ឌលគិរី​វិញ អ្នកទេសចរ​និយម​ចូល​ចិត្ត​គយគន់​ទេសភាព​ធម្មជាតិ ស្រូប​យក​ខ្យល់អាកាស​បរិសុទ្ធ​លើ​កំពូលភ្នំ ក៏​ដូច​ជា​ទស្សនា និង​ងូតទឹក​ជ្រោះ​ដ៏​ស្រស់​ត្រកាល ដូច្នេះ​ហើយ​ពួក​គាត់​មិន​ជិនណាយ​ពី​ខេត្តមណ្ឌលគិរី​ឡើយ ។ ក្រៅពី​នោះ ខេត្តមណ្ឌលគិរី​ក៏​ទាក់ទាញ​អ្នកទេសចរ​អន្តរជាតិ​ផង​ដែរ ដោយ​ការ​ជិះ​ដំរី​កម្សាន្ត​ក្នុង​ព្រៃ ទស្សនា និង​ឈ្វេងយល់​ពី​ទំនៀមទម្លាប់​វប្បធម៌​ក៏​ដូច​ជា​ការ​រស់នៅ​របស់​ជនជាតិ​ដើម​ភាគតិច ។

រមណីយដ្ឋាន​ទឹកជ្រោះ​ប៊ូ​ស្រា​នៅ​តែ​ជា​គោលដៅ​ទី​១ សម្រាប់​អ្នកទេសចរ​កម្សាន្ត​ក្នុង​ខេត្តមណ្ឌលគិរី ។ ក្រៅពី​នេះ​នៅ​មាន​រមណីយដ្ឋាន​ច្រើន​កន្លែង​ទៀត​រង់ចាំ​ទទួល​អ្នកទេសចរ​ពី​គ្រប់​មជ្ឈដ្ឋាន ដូច​ជា​រមណីយដ្ឋាន​វប្បធម៌​ភ្នំ​ដោះ​ក្រមុំ ជា​កន្លែង​សក្ការបូជា​ដ៏​សក្តិ​សិទ្ធិ រមណីយដ្ឋាន​សមុទ្រ​ឈើ រមណីយដ្ឋាន​ទឹកជ្រោះ​ដំណាក់​ស្តេច ទឹកជ្រោះរ​មនា ទឹកជ្រោះ​ជ្រៃ​ធំ ទឹកជ្រោះ​ក្បាល​ព្រះ ចម្ការ​កាហ្វេ ភ្នំ​ណាំ​លៀ​ជាដើម ។

ប្រធាន​មន្ទីរ​ទេសចរណ៍​ខេត្តមណ្ឌលគិរី​លោក​ងិ​ន សុ​វិមាន ឲ្យ​ដឹង​ថា ក្នុង​រយៈពេល​បី​ថ្ងៃ​នា​ឱកាស​បុណ្យចូលឆ្នាំ​ថ្មី​ប្រពៃណី​ជាតិខ្មែរ​មាន​អ្នកទេសចរ​ទៅ​ខេត្តមណ្ឌលគិរី​សរុប​ចំនួន​១២.៩៨៤​នាក់ ក្នុង​នោះ​ភ្ញៀវ​ជាតិ​ចំនួន​១២.៦៨៩​នាក់ និង​ភ្ញៀវ​អន្តរជាតិ​ចំនួន​២៩៥​នាក់ ។ តួលេខ​នេះ​បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន​មានការ​កើនឡើង​៩,៥៦% ក្នុង​នោះ​ភ្ញៀវ​ជាតិ​កើនឡើង​៩,៤៥% ភ្ញៀវ​អន្តរជាតិ​កើនឡើង​១៤,៧៨% ។

លោក​ប្រធាន​មន្ទីរ​ទេសចរណ៍​ឲ្យ​ដឹង​ថា ចំពោះ​សន្តិសុខ និង​សុវត្ថិភាព​ក្នុង​ការ​ធ្វើ​ដំណើរ​របស់​អ្នកទេសចរ​ក្នុង​ខេត្តមណ្ឌលគិរី មិន​មាន​ជួប​ប្រទះ​បញ្ហា​អ្វី​ឡើយ ៕

Facebook Google Twitter Email

ទេសចរណ៍

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ