យោងតាមសារព័ត៌មានជប៉ុនថា យន្តហោះគ្មានមនុស្សបើក DRONE តូចមួយត្រូវបានគេប្រទះឃើញកាលពីថ្ងៃទី២២ មេសា នៅលើដំបូលនិវេសនដ្ឋានផ្លូវការរបស់នាយករដ្ឋមន្ត្រីជប៉ុន
យោងតាមសារព័ត៌មានជប៉ុនថា យន្តហោះគ្មានមនុស្សបើក DRONE តូចមួយត្រូវបានគេប្រទះឃើញកាលពីថ្ងៃទី២២ មេសា នៅលើដំបូលនិវេសនដ្ឋានផ្លូវការរបស់នាយករដ្ឋមន្ត្រីជប៉ុន លោកស៊ីនហ្សូអាបេ នៅទីក្រុងតូក្យូ ។
ប៉ូលិសក្រុងតូក្យូ បដិសេធមិនធ្វើរាល់អត្ថាធិប្បាយក្នុងពេលភ្លាមៗ ក៏ប៉ុន្តែប៉ូលិសជាច្រើនសិបនាក់ត្រូវបានបញ្ជូនទៅកាន់ដំបូលអគារនោះដែលមានការិយាល័យរបស់លោកអាបេ។ រូបភាពថតពីលើអាកាសរបស់ទូរទស្សន៍ NHK ដែលចាក់ផ្សាយបង្ហាញពីយន្តហោះនោះលើដំបូលអគារ និងវត្តមានប៉ូលិសយ៉ាងច្រើននៅទីនោះ ។
យន្តហោះតូចមានម៉ាស៊ីនប្រវែង៥០សង្ទីម៉ែត្រត្រូវបានប្រទះឃើញនាពេលព្រឹកលើដំបូលអគារកញ្ចក់ទំនើបមាន៥ជាន់នោះ ដែលគេស្គាល់ក្រោមឈ្មោះថា KANTEI ស្ថិតនៅចំកណ្តាលក្រុងតូក្យូ ។ ប៉ូលិសពុំបានរកឃើញគ្រឿងផ្ទុះក្នុងយន្តហោះនេះទេ តែវាមានបំពាក់កាមេរ៉ាមួយ ។ ក្រៅពីនេះមានដបជ័រមួយដែលហាក់ដូចជាកាំជ្រួចផ្តល់សញ្ញាគ្រោះថ្នាក់មួយ ។
លោកអាបេ ពុំមានវត្តមាននៅក្នុងអគារពេលមានឧប្បត្តិហេតុនោះឡើយ ។ លោក នាថ្ងៃទី២២ មេសា បានទៅចូលរួមក្នុងសន្និសីទកំពូលអាស៊ី-អាហ្វ្រិកនៅឥណ្ឌូណេស៊ី ។
ការប្រើប្រាស់យន្តហោះគ្មានមនុស្សបើកមានកាន់តែតិចទៅនៅជបុ៉ន ពិសេសដើម្បីថតរូបពីលើអាកាស រួចសម្រាប់ពេលនេះក៏ពុំទាន់មានច្បាប់រិតត្បិតដែរ ៕
ចែករំលែកព័តមាននេះ