លោកស្រីមេលីនដា ហ្គេត ប្រពន្ធរបស់លោកប៊ីលហ្គេត បានប្រកាសក្នុងពេលថ្លែងសុន្ទរកថាស្ដីពីសុខភាពស្ដ្រីដែលរៀបចំឡើងនៅទីក្រុងវ៉ាស៊ីនតោនកាលពីថ្ងៃទី៧ មិថុនា ថា ប្រាក់បរិច្ចាគថ្មីដែលមានចំនួន១.៥០០លានដុល្លារនឹងយកទៅប្រើប្រាស់នៅតំបន់ថ្មីៗដែលធ្វើឱ្យប៉ះពាល់ដល់សុខភាពស្ដ្រី និងកុមារ នៅប្រទេសកំពុងអភិវឌ្ឍន៍សំរាប់ចាក់ថ្នាំបង្ការដល់កុមារការពារការរលាកសួត រាករូស ជំងឺគ្រុនចាញ់ វីរុស HIV ដោយមាន គំរោងចំណាយប្រាក់ក្នុងអំឡុងពេល៥ឆ្នាំ ខាងមុខ ។
ប្រពន្ធរបស់លោកប៊ីលហ្គេត សន្យាថានឹងជួបពិគ្រោះជាមួយអ្នកដឹកនាំនៅលើពិភព លោកទាំងក្នុងប្រទេសមានស្ដុកស្ដម្ភ និងប្រទេសក្រីក្រដើម្បីស្នើសុំឱ្យពួកគេចាត់ចែង ដល់ស្ដ្រី និងកុមារជារឿងចម្បងក្នុងគោលនយោបាយជាតិ ។
ក្នុងកិច្ចប្រជុំស្ដីពីសុខភាពស្ដ្រីកាលពីថ្ងៃ ទី៧ មិថុនា ក្នុងសេចក្ដីថ្លែងការណ៍របស់លោកបាន គីមូន អគ្គលេខាធិការអង្គការសហប្រជាជាតិ (UN) បានទាមទារឱ្យរដ្ឋាភិបាលនៅលើពិភពលោកសហការជាមួយអង្គការសហប្រជាជាតិដើម្បីជួយកែទំរង់សុខភាពរបស់ស្ដ្រី និងកុមារតាមទិសដៅ ដែលអង្គការសហប្រជាជាតិកំណត់ទុកក្នុងឆ្នាំ២០១៥ ។
លោកបាន គីមូន បានថ្លែងថា “យើង ត្រូវតស៊ូដើម្បីសុខភាពស្ដ្រីតាមធនធានសរុប និងពេលវេលាទាំងអស់ដែលយើងមាន។ នៅពេលយើងជួយសហការគ្នានឹងទទួលបាន ជោគជ័យក្នុងការជួយស្ដ្រី និងកុមារ”។
ចំណែករដ្ឋមន្ដ្រីក្រសួងការបរទេសអាមេរិក លោកស្រី ហ៊ីលឡារី គ្លីនតុន ថ្លែងថា អាមេរិកនឹងចូលរួមបរិច្ចាគចំនួន ៦៣.០០០ដុល្លារសំរាប់ជួយឧបត្ថម្ភប្រទេសផ្សេងៗក្នុងការទ្រទ្រង់ប្រព័ន្ធសុខាភិបាល ជាពិសេសលើផ្នែកសុខភាពរបស់ស្ដ្រី ទារក ទើបកើតដំបូង និងកុមារ ។
ក្នុងកិច្ចប្រជុំនោះមានតំណាងចូលរួមទាំង បុរស និងស្ដ្រីប្រហែល៣.៥០០នាក់ ដោយសង្ឃឹមថា អ្នកចូលរួមទាំងអស់នឹងរួមគ្នាអំពាវនាវឱ្យរដ្ឋាភិបាលផ្សេងៗ និងអ្នកបរិច្ចាគផ្នែកឯកជនជួយគ្នាបរិច្ចាគប្រាក់ឱ្យបាន១២.០០០លានដុល្លារសំរាប់ជួយលើផ្នែកផ្ដល់កំណើតនៅទូទាំងពិភពលោក ៕
ចែករំលែកព័តមាននេះ