ខេត្តមណ្ឌលគិរី ៖ ដោយមានការណែនាំពីអគ្គនាយកដ្ឋានកាំកុងត្រួល លោក ចាន់ វាសនា ប្រធានសាខាកាំកុងត្រួលខេត្តមណ្ឌលគិរីបានសហការជាមួយមន្ទីរពាណិជ្ជកម្មខេត្តមណ្ឌលគិរី ចុះអង្កេត និងត្រួតពិនិត្យទំនិញ ចំណីអាហារ
ខេត្តមណ្ឌលគិរី ៖ ដោយមានការណែនាំពីអគ្គនាយកដ្ឋានកាំកុងត្រួល លោក ចាន់ វាសនា ប្រធានសាខាកាំកុងត្រួលខេត្តមណ្ឌលគិរីបានសហការជាមួយមន្ទីរពាណិជ្ជកម្មខេត្តមណ្ឌលគិរី ចុះអង្កេត និងត្រួតពិនិត្យទំនិញ ចំណីអាហារ ពិសេសគ្រឿងសមុទ្រ និងផ្លែឈើនៅតាមតូបនានាក្នុងផ្សារក្រុងសែនមនោរម្យ កាលពីព្រឹកថ្ងៃទី៣១ មីនា ២០១៥។
ការចុះត្រួតពិនិត្យទំនិញ គ្រឿងសមុទ្រ និងផ្លែឈើ នៅតាមហាង និងតូបនានានៅក្នុងផ្សារសែនមនោរម្យ ឃើញមានតូបលក់មឹកដែលមានប្រភពយកពីខេត្តកំពត ក្នុងនោះមន្ត្រីកាំកុងត្រួល បានដកយកមឹកមួយគំរូដើម្បីយកទៅពិសោធន៍ ទន្ទឹមនឹងនោះដែរ មន្ត្រីកាំកុងត្រួលបានចុះត្រួតពិនិត្យតាមតូបលក់ផ្លែឈើគ្រប់ប្រភេទ ហើយបានយកគំរូផ្លែឈើទាំងនោះរួមមាន ប៉ោមមួយគំរូ សារីពីរគំរូ ត្របែក មួយគំរូ ល្មុតមួយគំរូ ត្រពាំងបាយជូរមួយគំរូ ដើម្បីបញ្ចូនទៅមន្ទីរពិសោធន៍របស់អគ្គនាយកដ្ឋានកាំកុងត្រួល។
បន្ទាប់មកក៏បានត្រួតពិនិត្យគ្រឿងភេសជ្ជៈគ្រប់ប្រភេទនៅតាមហាង ដើម្បីពិនិត្យពីគុណភាព សុវត្ថិភាព ទំនិញវេចខ្ចប់ស្រាប់ ដើម្បីស្វែងរកទំនិញដែលខូចគុណភាព ឫទំនិញហួសកាលបរិច្ឆេទប្រើប្រាស់ និងបានបិទរូបភាពនៅតាមតូប និងហាងនីមួយៗ ដើម្បីផ្សព្វផ្សាយ អប់រំអំពីសុខភាពដល់ប្រជាពលរដ្ឋឲ្យយល់ដឹងបន្ថែមទៀត។
នាឱកាសបុណ្យចូលឆ្នាំថ្មីប្រពៃណីជាតិជិតចូលមកដល់នាពេលខាងមុខនេះ លោក ចាន់ វាសនា ប្រធានសាខាកាំកុងត្រួលខេត្តមណ្ឌលគិរី បានណែនាំ និងអប់រំដល់អាជីវករទាំងអស់ឲ្យយល់ដឹងអំពីអនាម័យ និងការរៀបចំមុខទំនិញដាក់តាំងលក់ ឲ្យមានសណ្តាប់ធ្នាប់នៅតាមប្រភេទទំនិញនីមួយៗ និងទំនិញគ្រឿងសំអាងដាក់ឲ្យដាច់ចេញពីគ្នាពីគ្រឿងបរិភោគ ពិសេស លោកបានសំណូមពរដល់ប្រជាពលរដ្ឋទាំងអស់សូមពិចារណាមុននឹងជ្រើសរើសផលិតផលម្ហូបអាហារមកបរិភោគ៕
ចែករំលែកព័តមាននេះ