ដើម្បីក្លាយជាអ្នកបើករថយន្តលេខដៃដ៏ស្ទាត់ជំនាញ ហើយប្រកបដោយសុវត្ថិភាពបាន លុះត្រាតែអ្នកកាន់ចង្កូតមានជំនាញ និងបទពិសោធច្រើន ដែលជាកិច្ចការមិនងាយនឹងធ្វើបាននោះ ។ ម្យ៉ាងការឈ្វេងយល់ពីបច្ចេកទេសបើករថយន្តលេខដៃ ក៏ជារឿងល្អមួយដែរ ប្រសិនជាកាលៈទេសៈបន្ទាន់ណាមួយតម្រូវ ។ ខាងក្រោមនេះ គឺជាវិធីប្រើប្រាស់លេខទី២ របស់រថយន្តលេខដៃកុំឱ្យជួបបញ្ហា៖
១-ទម្លាប់ខ្លួនឯងជាមួយចង្កឹះលេខ និងទីតាំងរបស់វា ហើយក៏កុំភ្លេចផ្តោតអារម្មណ៍ជាមួយឈ្នាន់អំប្រាយ៉ាផងដែរ ។ ជាន់ឈ្នាន់អំប្រាយ៉ាផ្អឹបទៅនឹងកម្រាលជើង ដោយជើងខាងឆ្វេងរបស់អ្នក ហើយដេរបញ្ឆេះម៉ាស៊ីនតែម្តង ។ បំលាស់ទីចង្កឹះលេខទៅតំណែងទី១ ដែលមានចារនៅលើដងចង្កឹះលេខស្រាប់ ។
២-បន្ធូរឈ្នាន់អំប្រាយ៉ាថ្នមៗរហូតដល់រថយន្តចាប់ផ្តើមផ្លាស់ទីបន្តិចម្តងៗ ។ ក្នុងពេលជាមួយគ្នានោះដែរ ជាន់ឈ្នាន់ហ្គារ៍ថ្នមៗ ដើម្បីបំលាស់ទីរថយន្តទៅមុខក្នុងតំណែងលេខទី១ ។
៣-ស្តាប់សំទ្បេងម៉ាស៊ីន ហើយក្រទ្បេកមើលទៅលើនាទ្បិកាស្ទង់កម្រិតល្បឿន ឬតាប់ទ្បូ ប្រសិនជារថយន្តអ្នកមានបំពាក់វា ។ ពេលម៉ាស៊ីនបង្កើនល្បឿន ប្រហែលជា២.៥០០ជុំក្នុង១នាទី ទៅ៣.០០០ជុំក្នុងមួយនាទី គឺវាដល់ពេលបញ្ចូលលេខទៅក្នុងតំណែងទី២ហើយ។ ចំពោះរថយន្តភាគច្រើនកម្រិតល្បឿននៃការបញ្ចូលលេខទី២នេះ គឺស្ថិតក្នុងអត្រា១៥ម៉ាយក្នុងមួយម៉ោង (15mph) លើកុងទ័រល្បឿន ។ ដើម្បីបញ្ចូលលេខគឺដំទ្បើងហ្គារ៍ និងជាន់ឈ្នាន់អំប្រាយ៉ា ។ ពន្លែងឈ្នាន់អំប្រាយ៉ាយឺតៗ ខណៈពេលអ្នកជាន់ឈ្នាន់ហ្គារ៍។ នៅពេលនោះ អ្នកប្រាកដកំពុងតែបង្កើនល្បឿនក្នុងតំណែងលេខទី២ជាមិនខាន ។
៤-ប្រើប្រាស់លេខទី២នេះ ដើម្បីធ្វើដំណើរនៅជុំវិញតំបន់ដែលតម្រូវឱ្យបើកបរក្នុងអត្រាល្បឿនទាបឬសមល្មម ។ លោកអ្នកនឹងបញ្ចូលលេខទៅក្នុងតំណែងទី៣ ស្របពេលបង្កើនល្បឿន ឬក៏ត្រទ្បប់មកប្រើលេខទី១វិញ ប្រសិនជាដល់កន្លែងឈប់ ។ ម្យ៉ាងទៀត ប្រសិនជាអ្នកបើកចុះចំណោតជ្រៅ ឬខ្ពស់ប្រើលេខទី២ ដើម្បីជួយរក្សាល្បឿនរថយន្តកុំឱ្យបោះពួយទៅមុខលឿនពេក ។ លើសពីនេះ លោកអ្នកក៏អាចប្រើលេខទី២ នៅពេលបើកបត់ផ្លូវកាច់ជ្រុងក៏បានដែរ ដើម្បីជួយរក្សាល្បឿនរថយន្តឱ្យយឺតបន្តិច។
៥-ប្រើប្រាស់លេខទី២ សម្រាប់ពន្លឿននិងបង្កើនល្បឿន ។ ប្រសិនជាអ្នកចង់ធ្វើដំណើរក្នុងតំណែងលេខទី៣ ហើយត្រូវការពន្លឿនល្បឿនបង្ខំជែងរថយន្ត ឬយានដទៃ គឺទម្លាក់ហ្គារ៍មកលេខទី២ ដើម្បីបង្កើនល្បឿនឱ្យកាន់តែលឿន ក៏ជាការប្រសើរដែរ ៕
ចែករំលែកព័តមាននេះ