ប្រសិនបើអ្នកជាសហគ្រិនមួយរូប អ្នកប្រហែលជាកំពុងតែបង្ខំខ្លួនឲ្យខិតខំធ្វើការជារៀងរាល់ថ្ងៃហើយ ព្រោះអ្នកមានការប្តេជ្ញាច្បាស់លាស់ចង់មើលឃើញអាជីវកម្មរបស់អ្នកជោគជ័យ ឬមកពីការផ្លាស់ប្តូរផ្សេងៗក្នុងទីផ្សារដែលទាមទារពេលវេលាពីអ្នកច្រើនជាងមុន។
ប៉ុន្តែការវក់វីនឹងការងារខ្លាំងពេលអាចនឹងប៉ះពាល់ដល់សុខភាពរបស់អ្នក និងអាជីវកម្មរបស់អ្នកផងដែរ។ ដោយហេតុដូចនេះហើយទើបអ្នកត្រូវតែព្យាយាមស្វែងរកលំនឹងរវាងការងារ និងជីវិតផ្ទាល់ខ្លួន។ អ្នកអាចសម្រេចបានគោលដៅនេះបានដោយរៀនធ្វើការដោយឆ្លាតវៃជាងមុនដោយធ្វើតាមចំណុចខាងក្រោមនេះ៖
១. ធ្វើការដើម្បីសម្រេចគោលដៅ
ចំនួនម៉ោងធ្វើការរបស់អ្នកមិនជះឥទ្ធិពលលើប្រសិទ្ធភាពការងាររបស់អ្នក និងភាពជោគជ័យនៃអាជីវកម្មរបស់អ្នកទាំងស្រុងទេ។ ទោះជាការខិតខំប្រឹងប្រែងមានសារៈសំខាន់ពិតមែនក្តី វាអាចប៉ះពាល់ដល់អ្នកបាន។ ដោយហេតុដូចនេះទើបអ្នកគួរផ្តោតស្មារតីលើគោលដៅវិញ។ អ្នកអាចកំណត់នូវគោលដៅច្បាស់លាស់សម្រាប់ថ្ងៃនីមួយៗ និងព្យាយាមធ្វើការដើម្បីសម្រេចតាមគោលដៅទាំងនោះ។
២. កំណត់អ្វីដែលសំខាន់សម្រាប់អ្នកឲ្យបានច្បាស់លាស់
កំហុសឆ្គងធំមួយរបស់មនុស្សដែលវក់វីនឹងការងារគឺពួកគេព្យាយាមធ្វើកិច្ចការគ្រប់សព្វបែបយ៉ាង។ ពេលដែលពួកគេមិនអាចសម្រេចវាបាន ពួកគេនឹងមានអារម្មណ៍ខឹង និងព្យាយាមធ្វើការដោយលះបង់ពេលសម្រាក ដែលបង្កជាផលប៉ះពាល់ដល់ផ្លូវកាយ និងផ្លូវចិត្ត។
ដើម្បីជៀសវាងកំហុសឆ្គងនេះ អ្នកត្រូវតែកំណត់កិច្ចការដែលមានសារៈសំខាន់សម្រាប់អ្នកឲ្យបានច្បាស់លាស់ ដូច្នេះអ្នកនឹងអាចទុកកម្លាំងនិងពេលវេលាសម្រាប់ធ្វើកចិ្ចការទាំងនោះច្រើនជាងកិច្ចការដទៃដែលមិនមានប្រយោជន៍ ឬសំខាន់សម្រាប់អ្នក។
៣. រៀនបែងចែកការងារឲ្យអ្នកដទៃ
ចំណុចសំខាន់មួយក្នុងការបង្កើនប្រសិទ្ធភាពការងារគឺការបែងចែកតួនាទីជាមួយអ្នកដទៃ។ ការធ្វើដូច្នេះអនុញ្ញាតឲ្យអ្នកផ្តោតស្មារតីលើកិច្ចការដែលទាមទារពេលវេលា និងកម្លាំងពីអ្នកច្រើន ខណៈដែលអនុញ្ញាតឲ្យអ្នកដទៃរៀនសូត្រកាន់តែច្រើនផងដែរ ៕
ចែករំលែកព័តមាននេះ