រាជធានីភ្នំពេញ ៖ ដេប៉ូខ្សាច់ចំនួន៥ទីតាំង ដែលស្ថិតនៅតាមបណ្ដោយផ្លូវជាតិលេខ៥ ក្នុងមូលដ្ឋានខណ្ឌឫស្សីកែវ ត្រូវ អាជ្ញាធរខណ្ឌឫស្សីកែវ បានចុះណែនាំ ដើម្បីអោយម្ចាស់ សម្អាតកង់…
រាជធានីភ្នំពេញ ៖ ដេប៉ូខ្សាច់ចំនួន៥ទីតាំង ដែលស្ថិតនៅតាមបណ្ដោយផ្លូវជាតិលេខ៥ ក្នុងមូលដ្ឋានខណ្ឌឫស្សីកែវ ត្រូវ អាជ្ញាធរខណ្ឌឫស្សីកែវ បានចុះណែនាំ ដើម្បីអោយម្ចាស់ សម្អាតកង់ ក្របឲ្យបានត្រឹមត្រូវ និងលាងសម្អាតផ្លូវ ព្រមទាំងចុះធ្វើអនាម័យ និងចូកដីខ្សាច់នៅតាមផ្លូវ ដើម្បីលើកកម្ពស់សោភ័ណភាព និងអនាម័យ រាជធានីភ្នំពេញ ឲ្យកាន់តែប្រសើរឡើង ។
ការចុះណែនាំដេប៉ូខ្សាច់ និងធ្វើអនាម័យ ចូកខ្សាច់នៅតាមដងផ្លូវនេះ ធ្វើឡើងកាលពីព្រឹកថ្ងៃទី០៩ ខែកក្កដា ឆ្នាំ២០២៥ ដឹកនាំដោយលោក ឌន ដាវុឌ នាយករងរដ្ឋបាលខណ្ឌឫស្សីកែវ និងមានការចូលរួមពីកម្លាំងនគរបាល កងរាជអាវុធហត្ថខណ្ឌ កម្លាំងសណ្តាប់ធ្នាប់ខណ្ឌ កម្លាំងសណ្តាប់សង្កាត់ និងមានការចូលរួម ក្រុមហ៊ុន ៨០០ ស៊ូពើ ផងដែរ ។
តាមរដ្ឋបាលខណ្ឌឫស្សីកែវ បានអោយដឹងថា ដេប៉ូខ្សាច់ ចំនួន៥ទីតាំង ដែលកន្លងមក បានដឹកខ្សាច់ជ្រុះពេញផ្លូវ ត្រូវបានអាជ្ញាធរចុះណែនាំ ដោយតម្រូវឱ្យធ្វើកន្លែងលាងសម្អាតកង់ឡាន តាមលក្ខណៈបច្ចេកទេសត្រឹមត្រូវ មុននឹងធ្វើចរាចរលើដងផ្លូវ, ត្រូវគ្របឡានដឹកខ្សាច់ឱ្យបានជិតត្រឹម ត្រូវជៀសវៀងធ្លាក់ដីខ្សាច់លើដងផ្លូវ បណ្តាលខូចសោភ័ណភាព សណ្តាប់ធ្នាប់សាធារណៈ ប៉ះពាល់ដល់អ្នកធ្វើដំណើ, ត្រូវលាងសម្អាតផ្លូវឱ្យបានស្អាតជាប្រចាំ នៅទីតាំងដេប៉ូខ្សាច់រៀងៗខ្លួន ។
នៅព្រឹកនេះដែល អាជ្ញាធរ ក៏បានដឹកនាំក្រុមហ៊ុន ៨០០ ស៊ូពើ និងកម្លាំងសណ្តាប់ធ្នាប់ខណ្ឌ សង្កាត់ ធ្វើការសម្អាត អនាម័យ បរិស្ថាន តាមដងផ្លូវចាប់ពីចំណុចស្តុបគីឡូម៉ែត្រលលេខ៩ ក្នុងភូមិស្វាយប៉ាក សង្កាត់ស្វាយប៉ាក រហូតទៅដល់ក្រោមស្ពានលីយ៉ុងផាត់ ព្រំប្រទល់ខណ្ឌព្រែកព្នៅ ដោយចូកសម្អាតកំណកដីតាមទ្រូវផ្លូវ និងសំរាមរាយប៉ាយ ។
សូមបញ្ជាក់ថា កន្លងមកដេប៉ូខ្សាច់ ចំនួន៥កន្លែង នៅក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ បានដឹកខ្សាច់យ៉ាងគគ្រឹកគគ្រេងនៅតាមដងផ្លូវ ដោយពុំគ្រប និងលាងសម្អាតផ្លូវឡើយ ជាហេតុធ្វើអោយខ្សាច់ ជ្រុះពេញផ្លូវនិងទឹកហូរធ្លាក់ពេញផ្លូវ នៅពេលមេឃក្តៅ ដីខ្សាច់ហុយទ្រលោម បង្កអោយមានការក្តៅក្រហាយពីប្រជាពលរដ្ឋ ដែលធ្វើដំណើរឆ្លងកាត់។ កន្លងមក អាជ្ញាធរសង្កាត់ ខណ្ឌ បានចុះទៅណែនាំជាច្រើនលើកមកហើយ តែម្ចាស់ដេប៉ូខ្សាច់នៅតែមិនស្តាប់តាមការណែនាំឡើយ ៕
ចែករំលែកព័តមាននេះ