រាជធានីភ្នំពេញ ៖ ម៉ូតូម៉ាកស្កុបពីមួយគ្រឿង ខណៈម្ចាស់ទុកនៅខាងមុខផ្ទះ រួចរវល់តែលក់ដូរភ្លេចខ្លួន ក៏ត្រូវជនសង្ស័យលួចជិះយកទៅបាត់ ថែមទាំងជិះចូលក្នុងការដ្ឋានកំពុងតែសាងសង់ប្រឡាយទឹកស្ទឹងមានជ័យ តែក៏ត្រូវសន្តិសុខសួរនាំធ្វើឱ្យជនសង្ស័យភ័យស្លន់ស្លោ និងជិះម៉ូតូរត់គេច រួចក៏ចូលទៅប្លុងចោលនៅក្នុងប្រឡាយទឹកស្អុយ…
រាជធានីភ្នំពេញ ៖ ម៉ូតូម៉ាកស្កុបពីមួយគ្រឿង ខណៈម្ចាស់ទុកនៅខាងមុខផ្ទះ រួចរវល់តែលក់ដូរភ្លេចខ្លួន ក៏ត្រូវជនសង្ស័យលួចជិះយកទៅបាត់ ថែមទាំងជិះចូលក្នុងការដ្ឋានកំពុងតែសាងសង់ប្រឡាយទឹកស្ទឹងមានជ័យ តែក៏ត្រូវសន្តិសុខសួរនាំធ្វើឱ្យជនសង្ស័យភ័យស្លន់ស្លោ និងជិះម៉ូតូរត់គេច រួចក៏ចូលទៅប្លុងចោលនៅក្នុងប្រឡាយទឹកស្អុយ រួចរត់គេចខ្លួនតាមប្រឡាយទឹកស្អុយបាត់ បង្កការភ្ញាក់ផ្អើលដល់សមត្ថកិច្ច និងម្ចាស់ម៉ូតូ តាមមករកឃើញវិញកាលពីម៉ោង៩និង៣០នាទីយប់ ថ្ងៃទី២៤ ខែកញ្ញា ឆ្នាំ២០២០ នៅចំណុចការដ្ឋានធ្វើប្រឡាយលូស្ទឹងមានជ័យ ស្ថិតក្នុងសង្កាត់ស្ទឹងមានជ័យ១ ខណ្ឌមានជ័យ ។
ជនរងគ្រោះជាម្ចាស់ម៉ូតូខាងលើឈ្មោះ ជា ដាលីន ភេទស្រី អាយុ២៥ឆ្នាំ មុខរបរលក់គ្រឿងម្ជូរ ស្នាក់នៅផ្ទះជួលផ្លូវ៣៧១ សឡា ភូមិទ្រា សង្កាត់ស្ទឹងមានជ័យ១ ខណ្ឌមានជ័យ ។ ចំណែកម៉ូតូដែលត្រូវលួចយកទៅប្លុងចោលនោះ ម៉ាកស្កុបពី សេរីឆ្នាំ២០២១ ពណ៌ស ពាក់ស្លាកលេខ ភ្នំពេញ 1IJ 4481 ។
តាមប្រភពពីសន្តិសុខដែលយាមនៅការដ្ឋានខាងលើបានឱ្យដឹងថា មុនពេលកើតហេតុ ក្នុងការដ្ឋានកំពុងតែមានរថយន្តស្ទូចសម្ភារៈទុកសាងសង់ប្រឡាយទឹក ហើយគាប់ជួនពេលនោះដែរ ក៏ស្រាប់តែមានបុរសម្នាក់ជាជនសង្ស័យបានជិះម៉ូតូចូលទៅក្នុងការដ្ឋាននោះ ដើម្បីចេញទៅច្រកម្ខាងទៀត។
សន្តិសុខខាងលើបន្តថា ប៉ុន្តែពេលជិះទៅដល់ច្រកម្ខាងទៀត ក៏ជួបនឹងសន្តិសុខ រួចក៏សួរនាំមិនឱ្យចេញ-ចូលនោះទេ ទាល់តែមានបទបញ្ជាពីមេ ក៏ស្រាប់តែបុរសជាជនសង្ស័យរូបនោះ ក៏បានជិះម៉ូតូត្រឡប់ក្រោយវិញទាំងស្ថានភាពភ័យស្លន់ស្លោ ។ ខណៈពេលនោះសន្តិសុខ ក៏ហៅឃាត់សួរនាំ ស្រាប់តែបុរសជាជនសង្ស័យ ក៏បានជិះម៉ូតូចូលទៅក្នុងប្រឡាយទឹកស្អុយ រួចទុកម៉ូតូចោលក្នុងទឹកស្អុយតែម្តង រីឯជនសង្ស័យបែរជារត់គេចខ្លួនតាមប្រឡាយទឹកស្អុយនោះបាត់ស្រមោលភ្លាមៗផងដែរ ។
ប្រភពដដែលបានបន្តទៀតថា បន្ទាប់ពីឃើញម៉ូតូប្លុងចោលក្នុងទឹកស្អុយហើយ ពួកគាត់ក៏បានរាយការណ៍ទៅប្រាប់សមត្ថកិច្ចមូលដ្ឋានឱ្យចុះទៅមើល ពេលនោះនាយរងប៉ុស្តិ៍នគរបាលស្ទឹងមានជ័យ១ បានចុះទៅមើលឃើញភិនភាគម៉ូតូ ដូចជារបស់ជនរងគ្រោះម្នាក់ដែលទើបតែបានទៅដាក់ពាក្យបណ្ដឹងនៅប៉ុស្តិ៍នគរបាលស្ទឹងមានជ័យ១ មុននឹងបន្តិចថា ម៉ូតូម៉ាកស្កុបពីមួយគ្រឿងត្រូវចោរលួច ។ ហើយពេលនោះដែរ សមត្ថកិច្ចក៏ទំនាក់ទំនងតាមទូរស័ព្ទទៅរកជនរងគ្រោះឱ្យមកមើលឃើញថា ពិតជាម៉ូតូរបស់ជនរងគ្រោះពិតប្រាកដមែន ។
ដោយឡែកម្ចាស់ម៉ូតូវិញបានឱ្យដឹងថា នៅម៉ោងជាង៨យប់ រូបនាងបានទុកម៉ូតូខាងមុខផ្ទះ ហើយរវល់តែរៀបចំអីវ៉ាន់ភ្លេចខ្លួនបន្តិច លុះក្រឡេកភ្នែកទៅមើលម៉ូតូម្តងទៀត ក៏ត្រូវជនសង្ស័យលួចយកទៅបាត់តែម្តង ។
ក្នុងហេតុការណ៍ខាងលើនេះ សមត្ថកិច្ចបានឱ្យរថយន្តក្នុងការដ្ឋានជួយស្ទូចម៉ូតូមកលើគោកវិញ រួចឱ្យម្ចាស់យកកាតគ្រីមកផ្ទៀងផ្ទាត់ជាមួយស្លាកលេខម៉ូតូថា ពិតជារបស់ជនរងគ្រោះពិតប្រាកដមែន ។
ក្រោយកើតហេតុ សមត្ថកិច្ចក៏បានធ្វើកំណត់ហេតុ រួចក៏ប្រគល់ម៉ូតូទៅឱ្យជនរងគ្រោះយកទៅប្រើប្រាស់វិញផងដែរ ៕
ចែករំលែកព័តមាននេះ