រាជធានីភ្នំពេញ ៖ ការសម្រេចចិត្តលាឈប់ពីអាជីពហែលទឹករបស់កីឡាការិនី ហែមថុន វិទិនី បានធ្វើឱ្យអ្នកគាំទ្រមិនតិចទេ បង្ហាញអារម្មណ៍សោកស្ដាយ ស្របពេលនាងក៏នៅក្មេងវ័យមានលទ្ធភាពបន្តបម្រើវិស័យមួយនេះបានយូរអង្វែងទៅមុខទៀត ដែលមិនគួរចូលនិវត្តន៍នាពេលនេះសោះ ។ ភាពនឿយណាយ និងបញ្ហាជំងឺបានធ្វើឱ្យនាងសម្រេចចិត្តលាឈប់ដោយមិនបកក្រោយឡើយ ស្របពេលដែលនាងក៏បានប្រកាសថា ការបំពេញការងារធ្វើជាកីឡាការិនីជម្រើសជាតិ តម្រូវឱ្យនាងដាក់សម្ពាធខ្លួនឯងលើរបបអាហារ និងការហ្វឹកហាត់ខ្លាំងណាស់ ទើបនាងលែងចង់តស៊ូ។ ជាមួយនឹងការសម្រេចចិត្តបែបនេះធ្វើឱ្យម្នាក់ៗសោកស្ដាយ ខណៈដែលនាងធ្លាប់មានស្នាដៃរាប់មិនអស់ ទោះបីមិនធ្លាប់ទទួលបានមេដាយមាសលើឆាកអន្តរជាតិក្ដី។
កញ្ញា ហែមថុន វិទិនី បានថ្លែងប្រាប់ពីមូលហេតុនោះថា កញ្ញាបានលាលែងពីក្រុមជម្រើសជាតិហែលទឹក តាំងពីដើមខែតុលា ឆ្នាំ ២០១៩ ម្ល៉េះ ពោលគឺនៅពេលដែលមានការប្រកាសសមាសភាពកីឡាការិនីហែលទឹក ដើម្បីទៅចូលរួមស៊ីហ្គេម នៅហ្វីលីពីន ។ ជុំវិញការលាឈប់ពីជម្រើសជាតិនេះ កញ្ញាប្រាប់ថា សុខភាពគឺជាបញ្ហាតែមួយគត់ដែលធ្វើឱ្យនាងឈប់បន្ត។
កីឡាការិនីហែលទឹក ដែលធ្លាប់ចូលរួម ក្នុងព្រឹត្តិការណ៍កីឡាអូឡាំពិកតំណាងកម្ពុជា ដល់ទៅ៣លើករូបនេះបញ្ជាក់ថា នាងមាន បញ្ហាដុះសាច់ច្រមុះធ្ងន់ធ្ងរ ហើយអាចឈានដល់ប៉ះពាល់ប្រព័ន្ធប្រសាទផងដោយជំងឺមួយនេះត្រូវទទួលការព្យាបាលរយៈពេលវែង ឬមួយជីវិតតែម្តង ដែលតម្រូវឱ្យនាងត្រូវតែឈប់ធ្វើការជាមួយទឹកដើម្បីកុំឱ្យមានការរលាកបន្តទៀត ។
នាងបានថ្លែងថា ជំងឺដែលកំពុងកើតឡើងនោះ គឺមានបញ្ហាដក់ទឹកក្នុងច្រមុះ ដែលធ្វើឲ្យនាងមិនអាចចុះទឹកបានទៀត ហើយបណ្ដាលមកពីពេលកន្លងមក នាងបង្ខំចិត្តចុះទឹក ទាំងការហ្វឹកហាត់ និងទាំងក្នុងការប្រកួតនោះហើយ ទើបធ្វើឱ្យជំងឺមួយនេះកាន់តែធ្ងន់ធ្ងរ និង ព្យាបាលមិនជា ។
នាងលើកឡើងថា ក្រោយពេលចុះទឹកម្ដងៗ វានឹងធ្វើឲ្យសាច់ក្នុងច្រមុះ នាងរីក ដែលបណ្តាលឲ្យពិបាកក្នុងការដកដង្ហើម និងពិបាកគេង ស្របពេលដុំសាច់នោះ មិនអាចធ្វើការវះកាត់បានផង ទើបបញ្ហាចុះទឹកគឺជាបញ្ហាដ៏លំបាក ។ កញ្ញាបន្តថា គ្រូពេទ្យ បានប្រាប់នាងថា ច្រមុះរបស់នាងមានជំងឺអា លែក្ស៊ី ឬប្រតិកម្មជាមួយសារធាតុក្លដែលដាក់ ក្នុងអាងទឹកតែម្ដង ទើបឱ្យតែនាងចុះទឹកជំងឺមួយនេះធ្វើទុក្ខ ។ នាងសម្ដែងអារម្មណ៍សោកស្ដាយដែលត្រូវបោះបង់អាជីពដែលធ្លាប់តស៊ូ តែនាងក៏មិនអាចដើម្បីកីឡា ហើយបំផ្លាញសុខភាពរបស់ខ្លួនបន្តទៀតនោះដែរ ។
យ៉ាងណាក៏ដោយ អតីតកីឡាការិនីមានឈាមជ័រក្នុង ត្រកូលអ្នកកីឡាហែលទឹក ដែលជាចៅបង្កើតរបស់ព្រឹទ្ធាចារ្យ ហែម ថុន នឹងមិនទៅណាឆ្ងាយពីវិស័យដែលខ្លួនស្រឡាញ់តាំងពីតូចនេះឡើយ ដោយយកគោលដៅជីវិតក្នុងកីឡាហែលទឹក របស់ខ្លួននេះ ទៅកាន់ក្មេងជំនាន់ក្រោយតាមរយៈការបង្ហាត់បង្ហាញនូវតិចនិកខ្លះ តាមតែអាចធ្វើទៅបាន ដើម្បីជួយដល់អ្នកជំនាន់ក្រោយដែលចង់ក្លាយជាកីឡាការិនីហែលទឹកជំនាញ។ កញ្ញាថា បច្ចុប្បន្ននាងគឺជាគ្រូអប់រំកាយ និង កីឡាផង ដូច្នេះ គឺទោះជានាងមិនអាចហែលទឹកក្នុងនាមជាកីឡាការិនីដូចមុន តែក៏អាចចូលរួមបន្តជួយវិស័យនេះផងដែរ។
គួរបញ្ជាក់ផងដែរ កីឡាការិនី ហែមថុន វិទិនី មុនពេលលាឈប់នាងមានស្នាដៃជាច្រើនបន្សល់ទុក បើទោះជានាងមិនមែនជាម្ចាស់មេដាយអន្តរជាតិបានម្ដង នៅរាល់ការប្រកួតនៅក្រៅប្រទេស ។ នាងបានហ្វឹកហ្វឺនការហែលទឹកតាំងពីឆ្នាំ១៩៩៩ ក្នុងពេលដែលនាងអាយុ៥ឆ្នាំ និងបានជាប់ជម្រើសជាតិក្នុងឆ្នាំ២០០៣ បន្ទាប់ពីឆ្លងកាត់ការប្រកួតសាកល្បងសមត្ថភាពជាច្រើនលើក ។ ក្នុងឆ្នាំ២០០៥ នាងបានបង្ហាញខ្លួនក្នុងកម្មវិធីប្រកួតកីឡាហែលទឹកលើកដំបូងនៅថៃដោយទទួលត្រឹមលទ្ធផលបរាជ័យ ។
ឆ្នាំ២០០៦បានចេញទៅប្រកួតនៅប្រទេសកាតា ឆ្នាំ២០០៧ចេញទៅស៊ីហ្គេមនៅថៃ និងចេញទៅប្រកួតនៅប្រទេសជប៉ុននាអំឡុងខុសខែគ្នាក្នុងឆ្នាំដដែលដោយបានត្រឹមលទ្ធផលឈានដល់វគ្គទីពីរ។ ឆ្នាំ២០០៨ បានចេញទៅប្រកួតនៅប្រទេសចិន ឆ្នាំ២០០៩ចេញទៅបីប្រទេសព្រមគ្នាគឺសិង្ហបុរី ឡាវ និងអ៊ីតាលី ឆ្នាំ២០១០ចេញទៅទីក្រុង ក្វាងចូវ ប្រទេសចិនក្នុងកម្មវិធីអាស៊ានហ្គេម៤៥ ប្រទេស និងទៅទីក្រុងឌូបៃ ដោយទទួលត្រឹមលទ្ធផលមិនខុសមុន ។ ក្នុងពេលដែលចេញទៅឡាវកាលពីឆ្នាំ២០១២ ក៏មិនមានលទ្ធផលជោគជ័យ ។
ម្នាក់ៗ និយាយថា ហែមថុន វិទិនី មកពីមានឱកាសចេញផ្សាយតាមកញ្ចក់ទូរទស្សន៍ និងតាមសារព័ត៌មានច្រើនទើបកេរ្តិ៍ ឈ្មោះរបស់នាងស្ទុះឡើងតែមួយប៉ប្រិចភ្នែក ខណៈដែលការចាប់អារម្មណ៍ចំពោះនាងត្រូវគេផ្ដោតរឿងសម្រស់របស់នាងច្រើនជាងស្នាដៃដែលនាងមិនសម្រេចបាននៅក្រៅប្រទេស ។ អ៊ីចឹងហើយទើបសូម្បីតែក្នុងស្ប៉តរបស់ស្រាបៀរអង្គរបេះដូងខ្មែរ ក៏គេឃើញតារាហែលទឹកល្បីរូបនេះត្រូវគេជ្រើសជាតួឯកម្នាក់ក្នុងចំណោមកីឡាករនិងកីឡាការិនីទាំងឡាយដែលសុទ្ធតែមានស្នាដៃដណ្ដើមបានមេដាយនៅលើឆាកអន្តរជាតិ ។ ក្នុងនោះនាងក៏មានស្នាដៃទទួលបានមេដាយក្នុងស្រុករាប់មិនអស់ និងត្រូវបានគេចាត់ទុកថាគឺជាកីឡាការិនីឆ្នើមផ្នែកហែលទឹកលំដាប់ប្រទេសមុនពេលលាឈប់ផងដែរ។
ក្រៅពីមានកេរ្តិ៍ឈ្មោះល្បីល្បាញ នាងក៏ជាកីឡាការិនីដែលមានរូបសម្រស់ផូរផងគួរឱ្យសរសើរផងដែរ ។ នៅលើបណ្ដាញសារព័ត៌មានមួយបានទាំងប្រៀបធៀបសម្រស់នាងទៅនឹង សម្រស់តារាល្បីៗ រាល់ពេលនាងលេងខ្លួនស្រស់ស្អាតម្ដងៗនោះផង ៕
ចែករំលែកព័តមាននេះ