រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងឲ្យដឹងនៅថ្ងៃទី២១ ខែកញ្ញា នេះថា កិច្ចព្រមព្រៀងពាណិជ្ជកម្មសេរីកម្ពុជា-ចិន (Free Trade Agreement-FTA) ដែលបានបញ្ចប់រួចរាល់ និងត្រៀមចុះហត្ថលេខានាពេលខ្លីខាងមុខនឹងដើរតួជាកត្តាសំខាន់មួយជួយឱ្យកម្ពុជាក្លាយជាគោលដៅសម្រាប់ក្រុមហ៊ុនអាមេរិក ។
ថ្លែងនាឱកាសជួបពិភាក្សាការងារជាមួយនឹងក្រុមប្រឹក្សាធុរកិច្ចសហរដ្ឋអាមេរិក-អាស៊ាន តាមប្រព័ន្ធវីដេអូ នៅវិមានសន្តិភាព សម្ដេចនាយករដ្ឋមន្ត្រី បានមានប្រសាសន៍ថា «ខ្ញុំសង្ឃឹមថា ច្បាប់ និងកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងដើរតួជាកត្តាដ៏សំខាន់មួយជួយធ្វើឱ្យកម្ពុជាក្លាយជាគោលដៅសម្រាប់ក្រុមហ៊ុនអាម៉េរិក ដែលកំពុងរកទីតាំងផលិតកម្មថ្មីនៅតំបន់អាស៊ីអាគ្នេយ៍ ។ បន្ថែមលើនេះរាជរដ្ឋាភិបាលក៏បានដាក់ចេញជាបន្តបន្ទាប់នូវវិធានការ កែទម្រង់មុតស្រួចនានាសំដៅដោះស្រាយបញ្ហាប្រឈមសំខាន់ៗ ដែលបណ្ដាវិនិយោគិន និងធុរជនកំពុងជួបប្រទះក្នុងគោលបំណងបង្កើនភាពប្រកួតប្រជែងរបស់កម្ពុជា តាមរយៈការបង្កភាពងាយស្រួល និងការបង្កើត បរិយាកាសអំណោយផលដល់ការធ្វើអាជីវកម្ម និងការវិនិយោគនៅក្នុងប្រទេស» ។
សម្តេចតេជោបានបន្តថា «ជាទិសដៅទៅមុខកម្ពុជានឹងដាក់ឱ្យអនុវត្តនូវវិធានការអន្តរាគមន៍សមស្រប និងទាន់ពេល គួបផ្សំនឹងការគិតគូរជាយុទ្ធសាស្ត្រ តាមរយៈការដាក់ចេញនូវគោលនយោបាយហិរញ្ញវត្ថុសាធារណៈ, គោលនយោបាយរូបិយវត្ថុ និងវិធានការកែទម្រង់រចនាសម្ព័ន្ធ សំដៅសម្រេចឱ្យបាននូវគោលបំណងជាអាទិភាពចំនួន២ រួមមាន៖ ការរក្សាលំនឹងសេដ្ឋកិច្ច និងសង្គម និងការជំរុញកំណើនសេដ្ឋកិច្ចឡើងវិញ» ។ សម្តេចតេជោ បានលើកឡើងថា ធុរកិច្ចអាមេរិកមួយចំនួន ដែលមានវត្តមាននៅកម្ពុជា ក៏បានទទួលនូវផលប្រយោជន៍ពីវិធានការទាំងនេះ។
ទន្ទឹមនេះ ទោះបីជាមានបញ្ហាជំងឺកូវីដក៏ដោយ តែសម្តេចមានមោទនភាពចំពោះកំណើនទំហំពាណិជ្ជកម្មទ្វេភាគីរវាងប្រទេសទាំងពីរ ដែលនៅក្នុងរយៈពេល៨ខែ ឆ្នាំ២០២០នេះ បានកើនឡើងប្រមាណជិត១៧ភាគរយ ធៀបនឹងរយៈពេលដូចគ្នានៃឆ្នាំកន្លងទៅ ។
ជាក់ស្តែងកន្លងមក សម្តេចបានបញ្ជាក់ថា ដើម្បីទាក់ទាញវិនិយោគិនបន្ថែម ជាពិសេសនៅពេលជំងឺកូវីដ-១៩ មានភាពធូរស្រាលនោះ កម្ពុជាកំពុងរៀបចំកែលម្អច្បាប់វិនិយោគ និងប្រព័ន្ធលើកទឹកចិត្តថ្មី ដែលមានលក្ខណៈគ្រប់ជ្រុងជ្រោយ និង មានភាពទាក់ទាញសម្រាប់ឧស្សាហកម្មប្រភេទអេឡិចត្រូនិក, បង្គុំ, កសិ-ឧស្សាហកម្ម, គ្រឿងបន្លាស់, ឧស្សាហកម្មគាំទ្រ និង ឧស្សាហកម្មផ្សេងទៀត។
សូមរម្លឹកថា ក្រុមការងារកម្ពុជា-ចិនបានបញ្ចប់ការចរចាពាណិជ្ជកម្មសេរី ហើយថ្នាក់ដឹកនាំនៃប្រទេសទាំងពីរគ្រោងនឹងចុះហត្ថលេខាឆាប់ៗខាងមុខនេះ ។ ដូច្នេះប្រសិនបើកិច្ចព្រមព្រៀងពាណិជ្ជកម្មសេរី កម្ពុជា-ចិន ចូលជាធរមាន នោះទំនិញជាង៣០០មុខរបស់កម្ពុជានឹងត្រូវនាំទៅចិន ដែលភាគច្រើន គឺជាផលិផលកសិកម្ម និងផលិតផលសម្រេចចេញពីឧស្សាហកម្មកែច្នៃ។ ក្នុងចំណោមមុខទំនិញជាង៣០០មុខនេះ គឺផលិតផលកសិកម្ម៩៥ភាគរយត្រូវបានរួចពន្ធសម្រាប់ការនាំចេញទៅចិន ៕
ចែករំលែកព័តមាននេះ