អន្តរជាតិ ៖ ក្រុមហ៊ុនយក្សអាល្លឺម៉ង់ PUMA បានប្រកាសជាផ្លូវការ ពីការចុះហត្ថលេខាក្នុងនាមជាដៃគូឧបត្ថម្ភរបស់កីឡាករ Neymar ដែលបានចែកផ្លូវជាមួយក្រុមហ៊ុនអាមេរិក Nike កាលពី ២ សប្តាហ៍មុន។
ខ្សែប្រយុទ្ធក្រុម PSG និងជម្រើសជាតិប្រេស៊ីលវ័យ ២៨ឆ្នាំរូបនេះ បានសំរេចចិត្តបញ្ចប់ភាពជាដៃគូ ដែលមានតម្លៃជាង ១០០ដុល្លារជាមួយក្រុមហ៊ុន Nike បន្ទាប់ពីរួមរស់នឹងគ្នាអស់រយៈពេល ១៥ឆ្នាំ។ ប៉ុន្តែកាលពីថ្ងៃសៅរ៍កន្លងទៅ Puma បានធ្វើការប្រកាសលើបណ្តាញសង្គមផ្លូវការរបស់ខ្លួនថា «ស្វាគមន៍ការមកកាន់គ្រួសាររបស់យើង Neymar #KingIsBack»។
ជាមួយគ្នានេះផងដែរ Neymar បានបញ្ជាក់អំពីការសម្រេចចិត្តរបស់ខ្លួន ក្នុងការជ្រើសរើសយកក្រុមហ៊ុន PUMA ធ្វើជាដៃគូសហការថ្មីរបស់ខ្លួនថា «ខ្ញុំធំដឹងក្តីដោយបានមើលវីរៈបុរសបាល់ទាត់ដ៏អស្ចារ្យដូចជា Pele, Cruyff, Matthaus, Eusebio និង Maradona ពួកគាត់គឺស្តេចនៃកីឡាបាល់ទាត់។ ខ្ញុំមានបំណងចង់នាំយកមកនូវកេរ្តិ៍ដំណែលដែលអត្តពលិកទាំងនោះ បានបង្កើតនៅលើទីលាន។ ហើយពួកគាត់សុទ្ធតែបានសហការជាមួយ PUMA ដើម្បីបង្កើតវេទមន្តរបស់ពួកគាត់ក្នុងនាមជាស្តេចបាល់ទាត់»។
ប្រភពជិតស្និតបានប្រាប់គេហទំព័រ ESPN ថា មានតែនាយកប្រតិបត្តិ ៤នាក់ប៉ុណ្ណោះ ដែលអាចដឹងអំពីកិច្ចព្រមព្រៀងនេះ ជាមួយកីឡាករ Neymar ហើយវាក៏គឺជារឿងអាថ៌កំបាំងដ៏ធំរបស់ក្រុមហ៊ុនផងដែរ ដែលពួកគេបានព្យាយាមចុះហត្ថលេខាលើកីឡាកររូបនេះ អស់រយៈពេលជាច្រើនខែ៕
ចែករំលែកព័តមាននេះ