រាជធានីភ្នំពេញ ៖ បន្ទាប់ពីបានបង្ហាញតួលេខអំពីប្រាក់ឈ្នួលអប្បបរមាសម្រាប់កម្មករនិយោជិតនៅផ្នែកវាយនភណ្ឌ កាត់ដេរសម្លៀកបំពាក់ និងផលិតផលស្បែកជើងឆ្នាំ២០២១ចំនួន១៩២ដុល្លារអាមេរិក កាលថ្ងៃទី១០ កញ្ញា ថ្មីៗនេះលោក ហេងសួង បានបង្ហាញទស្សនៈរបស់ខ្លួនថា កម្ពុជាជាប្រទេសតែមួយគត់ដែលហ៊ានដំឡើងប្រាក់ឈ្នួលអប្បបរមាដល់កម្មករក្នុងវិស័យកាត់ដេរ ។
លោក ហេង សួរ មន្ត្រីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានសរសេរនៅលើហ្វេសប៊ុកផ្លូវការរបស់លោកថា នេះ គឺជាពាក្យពិត រឿងពិត ដែលមិនអាចប្រកែកបាននៅក្នុងកំឡុងពេលវិបត្តិសកលកូវីដ-១៩នេះ ។ ទោះបីយើងកើនតិច ប៉ុន្តែយើងមានកំណើន ហើយយើងគឺជាប្រទេសតែមួយគត់ ដែលហ៊ានដំឡើងប្រាក់ឈ្នួល ។
លោកសង្កត់ធ្ងន់ដូច្នេះថា «នេះ គឺជាពាក្យពិត រឿងពិត ដែលមិនអាចប្រកែកបាននៅក្នុងកំឡុងពេលវិបត្តិសកលកូវីដ-១៩នេះ ។ ទោះបីយើងកើនតិច ប៉ុន្តែយើងមានកំណើន ហើយយើង គឺជាប្រទេសតែមួយគត់ ដែលហ៊ានដំឡើងប្រាក់ឈ្នួល ។ កើនតិចប្រសើរជាងអត់! កើនតិចប្រសើរជាងក្សត់អត់កាងារធ្វើ» ។ លោកបន្តថា កម្ពុជាតូច ប៉ុន្តែកម្ពុជាមានថ្នាក់ដឹកនាំ គឺសម្តេចតេជោនាយករដ្ឋមន្ត្រី ហ៊ុន សែន ដែលមានចិត្តធំទូលាយ អាណិតស្រឡាញ់បងប្អូនកម្មករនិយោជិត ។ កម្ពុជាតូច ប៉ុន្តែកម្ពុជាមានថ្នាក់ដឹកនាំ មានចិត្តធំទូលាយ អាណិតស្រឡាញ់បងប្អូនកម្មករនិយោជិត ។
ពាក់ព័ន្ធ និងប្រាក់ឈ្នួលអប្បបរមាដល់កម្មករនិយោជិតនេះ បើតាមប្រធានសហជីពក្នុងស្រុកមួយរូបថាការចរចា ឬការទាមទារប្រាក់ឈ្នួលនៅឆ្នាំ២០២១មិនបានតួលេខខ្ពស់ ក្នុងកាលៈទេសៈកម្ពុជាក៏ដូចជា សកលលោកជួបវិបត្តកូវីដ-១៩នេះដោយសារហេតុផលធំៗចំនួន៣ ហើយក្នុងហេតុផលនោះថាហេតុវៀតណាមមិនបានដំឡើងប្រាក់ឈ្នួលដល់កម្មរកំពុងធ្វើការក្នុងវិស័យដូចទៅនិងកម្ពុជានេះទេ ។
លោក អាត់ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាមានប្រសាសន៍ថា ហេតុផលធំៗជាងពិបាកក្នុងការចរចាប្រាក់ឈ្នួលអប្បរមាឆ្នាំ២០២១គឺ៖១-បញ្ហាជំងឺកូវីដ១៩ ធ្វើឱ្យប៉ះពាល់ធ្ងន់ធ្ងរ, ២- បញ្ហាEBA និង៣)-ខាងនិយោជកលើកឡើងថាដោយសារតែប្រាក់ឈ្នួលនៅក្នុងតំបន់ប្រៀបធៀបប្រទេសដែលផលិតដូចយើង គឺប្រាក់ឈ្នួលវានៅទាបនៅឡើយហើយនៅឆ្នាំនេះ នៅតាមប្រទេសជាច្រើនដូចជានៅវៀតណាមគេអត់ឡើងទេ ។ ទាំងនេះជាហេតុផលនិងជាឧបស័គ្រក្នុងការចរចាប្រាក់ខែអប្បបរមាកម្មករនិយោជិតឆ្នាំ២០២១។
បើតាមប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជារូបនេះ ថាការតម្លើងឬការបន្ថែម២ដុល្លារអាមេរិកទៅលើចំនួនទឹកប្រាក់១៩០ដុល្លារអាមេរិកនេះ ឡើងបានឱ្យតែឡើងទេ ។
តាមពិតចំនួនទឹកប្រាក់២ដុល្លារអាមេរិកនេះមិនអាចដោះស្រាយបានទេសម្រាប់កម្មករ បើអតិផរណានៅឆ្នាំក្រោយនេះវាឡើងដល់៣,១% អីចឹងការឡើងនេះតិចណាស់។ លោកលើកឡើងថា« នៅពេលប្រាក់ខែតិច ហើយអតិផរណាវាឡើងអីចឹង យើងស្នើទៅរដ្ឋាភិបាលត្រូវពិនិត្យទៅមើលការបញ្ចុះតម្លៃទឹកអគ្គិសនី និងអាហារហូបចុកផ្សេងៗដើម្បីធានាថា លុយដែលបានមកនេះវាអាចចាយវាយបានសមរម្យ។ទន្ទឹមនិងនេះរាជរដ្ឋាភិបាលថានឹងមានការទាក់ទាញវិនិយោគនេះ យើងស្នើឱ្យរដ្ឋាភិបាលយកចិត្តទុកដាក់នូវអ្វីដែលខ្លួនបានសន្យានេះ»៕
ចែករំលែកព័តមាននេះ