រាជធានីភ្នំពេញ ៖ អ្នកលក់ជ្រូកខ្វៃ នៅអមផ្លូវ ១៦៦ ក្នុងផ្សារអូរឬស្សី (ច្រកទី៧) រំពឹងខ្ពស់ថា ឆ្នាំនេះ ពួកគាត់អាចលក់ដាច់ច្រើនជាងឆ្នាំមុនៗ…
រាជធានីភ្នំពេញ ៖ អ្នកលក់ជ្រូកខ្វៃ នៅអមផ្លូវ ១៦៦ ក្នុងផ្សារអូរឬស្សី (ច្រកទី៧) រំពឹងខ្ពស់ថា ឆ្នាំនេះ ពួកគាត់អាចលក់ដាច់ច្រើនជាងឆ្នាំមុនៗ ។
ជាក់ស្តែងនៅចំណុចបរិវេណផ្សារអូរឬស្សី ច្រកទី៧ ដែលស្ថិតនៅកែងផ្លូវលេខ ១៦៦ កែងផ្លូវ ១៣៩ គឺភាគច្រើនមួយជួរនេះ សម្បូរទៅដោយអាជីវករលក់ ជ្រូកខ្វៃ ដែលបងប្អូនប្រជាពលរដ្ឋមកពីបណ្តាខណ្ឌផ្សេងៗ មករកទិញឬកុំម្មង់ទុកដើម្បីត្រៀមសែនបុណ្យប្រពៃណីចិន ។
អាជីវករលក់ដូរជ្រូកខ្វៃ ក្នុងផ្សារអូរឬស្សីខាងលើ បានឲ្យដឹងថា បងប្អូនប្រជាពលរដ្ឋដែលកាត់សែស្រឡាយចិនជាច្រើន នៅតែបន្តការអញ្ជើញមកទិញ មិនខុសពីឆ្នាំមុនៗ ដែលធ្លាប់លក់ដូរ កន្លងមកនោះទេ ។ ដោយភ្ញៀវមកទិញយ៉ាងច្រើនកុះករតែម្តង សម្រាប់បងប្អូន ដែលកាត់សែស្រឡាយខ្មែរ-ចិន ប្រារព្ធពិធីបុណ្យសែនចូលឆ្នាំចិន អាចមករកទិញ ឬ កម្មង់ជ្រូកខ្វៃ ពីបងប្អូនអាជីវករលក់ នៅច្រកទី៧ បាន។ រីឯតម្លៃវិញ មិនមានការតម្លើងថ្លៃនោះដែរ ពោលធ្លាប់លក់រាល់ថ្ងៃតម្លៃណា ថ្ងៃសែនចូលឆ្នាំចិនក៏លក់ក្នុងតម្លៃនោះដែរ ។
អាជីវករដែលលក់ដូរ ជ្រូកខ្វៃ បញ្ជាក់ចុងក្រោយថា ពួកគាត់រំពឹងខ្ពស់ថា ឆ្នាំនេះអាច និង មានភ្ញៀវមកទិញច្រើនជាងឆ្នាំមុនៗផងដែរ ព្រោះថាសន្ទុះនៃការទិញជ្រូកខ្វៃរបស់ពួកគាត់ គិតត្រឹមថ្ងៃទី ១០ នេះ មាន បងប្អូនបានដាក់កម្មង់ជាបន្តបន្ទាប់ រហូតទៅដល់ ៧ក្បាលទៅហើយ ដែលភាគច្រើនភ្ញៀវគាត់កម្មង់ទុកថ្ងៃសែនចូលឆ្នាំចិន ដោយនេះមិនទាន់បូកបញ្ចូលចំនួនជ្រូកដែលភ្ញៀវមកទិញផ្ទាល់នោះទេ ។
គួររំលឹកផងដែរថា ចាប់ថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៦ខាងមុខ ជាពេលវេលា ដែលបងប្អូនខ្មែរកាត់សែស្រឡាយសិន តែងតែចាត់ទុកជាថ្ងៃសំខាន់ក្នុងការរៀបចំសែនព្រេនជូនជីដូនជីតា ដើម្បីសុំលាភពរជ័យ និងសេចក្តីសុខចម្រើន ទាំងការរកស៊ីទទួលទាន និងការរស់នៅ ៕
ចែករំលែកព័តមាននេះ