ប្រទេសចិន-ឥណ្ឌា ៖ ប្រទេសចិនកាលពីថ្ងៃទី៨ ខែកញ្ញា ឆ្នាំ២០២០ បានចោទប្រកាន់កងទ័ពឥណ្ឌាថា បានឆ្លងកាត់ដោយខុសច្បាប់ព្រំដែនរបស់ខ្លួន ក្នុងតំបន់ជួរភ្នំហ៊ីម៉ាឡៃយ៉ា និងបានធ្វើការបាញ់ព្រមាននានា ។
ក្នុងសេចក្ដីប្រកាសមួយចេញផ្សាយនាថ្ងៃទី៨ កញ្ញា ក្រសួងការពារប្រទេសចិនបានចោទឥណ្ឌា
ថា ធ្វើការបង្កហេតុខាងយោធាធ្ងន់ធ្ងរ ។ សេចក្ដីប្រកាសនោះអះអាងថា កងទ័ពចិនការពារព្រំដែនបានបង្ខំចិត្តចាត់វិធានការតបតវិញសមស្រប ដើម្បីឲ្យសភាពការណ៍មានស្ថេរភាពនៅលើទីលាន ។ សេចក្ដីប្រកាសនោះមិនបានបញ្ជាក់ពីប្រភេទនៃវិធានការតបតទាំងនោះឡើយ ។
ជម្លោះព្រំដែនរវាងមហាយក្សអាស៊ីទាំង២ស្ថិតនៅជាប់ជិតខាងគ្នា កាលពីពាក់កណ្ដាលខែមិថុនា កើតមានការប្រទូស្តរ៉ាយគ្នាខ្លាំងដ៏កម្រមួយ ត្រង់កន្លែងមានកម្ពស់ជាង៤.០០០ម៉ែត្រ រវាងកងទាហានឥណ្ឌានិងចិននៅ LADAKH ។
ការប៉ះទង្គិចគ្នាខ្លួនទល់ខ្លួននោះបណ្ដាលឲ្យទាហានឥណ្ឌាស្លាប់២០នាក់ហើយខាងចិនមិនដឹងពីចំនួនអ្នករងគ្រោះឡើយ ។
ការបាត់បង់ជីវិតរបស់ទាហានឥណ្ឌាទាំងនេះនាំឲ្យមានរលកនៃការក្ដៅក្រហាយក្នុងប្រទេស ។បន្ទាប់ពីការប៉ះទង្គិចគ្នាបណ្ដាអ្នកទទួលខុសត្រូវនៃកងទ័ពចិន និងឥណ្ឌា បានជួបចរចាគ្នា ហើយបានព្រមព្រៀងគ្នាធ្វើឲ្យមានភាពធូរស្រាលនៃសភាពការណ៍ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ