រាជធានីភ្នំពេញ ៖ បន្ទាប់ពីមានការតែងតាំង កញ្ញា លី គីមអាន ជាម្ចាស់ជ័យលាភីក្នុងការប្រកួតប្រជែងគូរូបតុក្កតាតំណាងស៊ី ហ្គេម (Mascot) ដែលយកសុភាទន្សាយជាគំរូ ធ្វើជាទូតសុច្ឆន្ទៈ កីឡាការិនីរូបនេះ បានបង្ហាញពីការតាំងចិត្តយ៉ាងខ្លាំង ថានឹងពុះពារផ្សព្វផ្សាយពីព្រឹត្តិការណ៍នេះឱ្យខ្លាំង បើទោះបីជានាងមិនមែនជាតារាល្បីក្ដី ។ ការប្រកាសតែងតាំងនាងឱ្យក្លាយជាទូតសុច្ឆន្ទៈកីឡាសុីហ្គេមឆ្នាំ២០២៣បានធ្វើឱ្យកីឡាការិនីរូបនេះទទួលបាននូវការចាប់អារម្មណ៍យ៉ាងខ្លាំង ជាពិសេសនៅក្នុងស្រទាប់មហាជន។
ក្នុងពិធីទទួលថវិកាលើកទឹកចិត្តចំនួន៥ពាន់ដុល្លារពីជ័យលាភីគូរូបតុក្កតាតំណាងស៊ីហ្គេម
២០២៣ កាលពីពេលកន្លងទៅកញ្ញាលី គីមអាន ថ្លែងថា កញ្ញារំភើបនិងសប្បាយចិត្ត ហើយនេះគឺជាអ្វីដែលនឹកស្មានមិនដល់របស់កញ្ញា ចាប់តាំងពីក្លាយជាកីឡាការិនីមួយរូប ។ នាងប្រកាសថា នឹងដើរតួជាអ្នកផ្សព្វផ្សាយពីព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះឱ្យអស់លទ្ធភាព ដូចជាចូលរួមបំផុស និងបង្ហោះចែកចាយពីការរៀបចំទាំងឡាយ និងពីគម្រោងប្រកួតជាដើម ។
កញ្ញា លី គីមអាន បានបង្ហាញអារម្មណ៍រំភើប សប្បាយរីករាយយ៉ាងខ្លាំង ក្រោយត្រូវបានគណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍ ជ្រើសរើសឲ្យក្លាយជាម្ចាស់ជ័យលាភីក្នុងការប្រកួតប្រជែងគូរូបតុក្កតាតំណាងស៊ីហ្គេមឆ្នាំ២០២៣ ដែលមានបេក្ខជនជាច្រើនរូបចូលរួមប្រកួត
ប្រជែង ។
នាងថា ពេលដាក់ពាក្យចូលរួមដំបូង ក្នុងនាមជាកីឡាការិនីតេក្វាន់ដូ WT កម្រិតខ្សែក្រវាត់ខ្មៅពីរដាន់ កញ្ញាមិនរំពឹងថា នឹងអាចក្លាយជាម្ចាស់ជ័យលាភីនោះទេ ដ្បិតនាងក៏ពុំសូវជំនាញខាងប្រើប្រាស់កម្មវិធីគូក្រាហ្វិក ។
ដកស្រង់សម្ដីនៅក្នុងពេលនោះនាងបាននិយាយថា «តាមពិតទៅខ្ញុំមិនមែនរៀនខាងក្រាហ្វិកទេគឺខ្ញុំរៀនខាងស្ថាបត្យកម្ម តែខ្ញុំចេះក្រាហ្វិកតិចតួចដោយសារកម្មវិធីវាប្រើដូចគ្នា។ ខ្ញុំប្រកួតកីឡាខ្ញុំចង់តំណាងឲ្យជាតិមិនមែនតែត្រឹមក្នុងប្រទេសទេគឺក្រៅប្រទេសតែខ្ញុំគ្មានឱកាស នៅពេលខ្ញុំឃើញការប្រកួត (Logo និង Mascot) ធ្វើឲ្យស៊ីហ្គេមទាំងមូលខ្ញុំមានអារម្មណ៍រំភើបខ្ញុំក៏បានដាក់ពាក្យចូលរួមប្រកួត» ។
កីឡាការិនីតេក្វាន់ដូ WT រូបនេះ អះអាងទៀតថា ភាពជោគជ័យនេះ មិនមែនកើតឡើងពីគំនិតផ្ទាល់ខ្លួនរបស់នាងតែម្នាក់ឯងនោះទេ គឺមានការរួមចំណែក និងផ្តល់ គំនិតពីមិត្តភក្តិ និងផ្តល់កម្លាំងចិត្តពីក្រុមគ្រួសារ ។ នាងបានបន្ថែមថា មុនសម្រេច ជ្រើសរើសយករូបនេះ CAMSOC បានឲ្យ ខ្លួនកែប្រែជាច្រើនលើកច្រើនសាពាក់ព័ន្ធ សម្លៀកបំពាក់ និងកាយវិការ ។
នាងនៅតែថា គំនូរមួយផ្ទាំងដែលនាង និងក្រុមការងារពុះពារដោយការតាំងចិត្ត បានជួយឲ្យនាងក្លាយជាទូតសុច្ឆន្ទៈ ប្រចាំព្រឹត្តិការណ៍កីឡាស៊ីហ្គេមលើកទី៣២ ឆ្នាំ ២០២៣ ដែលនេះគឺជាក្តីស្រមៃរបស់នាងដែលប៉ងចង់បាន ពោលគឺតំណែងជាតំណាងឲ្យជាតិនៅលើឆាកអន្តរជាតិ។
គួរបញ្ជាក់ផងដែរ កញ្ញា លី គីមអាន គឺជា ម្ចាស់ជ័យលាភី ក្នុងការប្រកួតប្រជែងគូរូប តុក្កតា តំណាងស៊ីហ្គេម (Mascot) ដែល យកសុភាទន្សាយជាគំរូ ។
ក្រៅពីថវិកាលើកទឹកចិត្តចំនួន៥ពាន់ដុល្លារ ជ័យលាភីនេះជួយឲ្យ កីឡាការិនីតេក្វាន់ដូ WT រូបនេះ ក្លាយជាទូត សុច្ឆន្ទៈប្រចាំព្រឹត្តិការណ៍កីឡាស៊ីហ្គេមលើកទី ៣២ ឆ្នាំ២០២៣ ជាក្តីស្រមៃដែលនាងបានប៉ងចង់បានតំណាងឲ្យជាតិនៅលើឆាកអន្តរជាតិ ។ កូនច្បងក្នុងគ្រួសារដែលមានបងប្អូន៣នាក់នៅ រាជធានីភ្នំពេញ រូបនេះ អះអាងថា នាងចង់ ធ្វើអ្វីមួយតំណាងឲ្យប្រទេសជាតិ ។ ដូច្នេះ សម្រាប់តំណែងនេះ ជួយឲ្យរូបនាងអាច សម្រេចក្តីស្រមៃខ្លួនបានយ៉ាងមោទនភាព។
សម្រាប់តំណែងជាទូតសុច្ឆន្ទៈ នេះ នាងអាច ចូលទស្សនាការប្រកួតគ្រប់ប្រភេទកីឡាក្នុង ព្រឹត្តិការណ៍កីឡាស៊ីហ្គេម ឆ្នាំ២០២៣ ។ លើសពីនេះ នាងអាចត្រូវបាន CAMSOC បញ្ជូនទៅចូលរួមទស្សនាការប្រកួតស៊ីហ្គេមនៅក្រៅ ប្រទេស ឬផ្សព្វផ្សាយពីកីឡាស៊ីហ្គេម របស់កម្ពុជា ជាដើម ។ និស្សិតបញ្ចប់ថ្នាក់ បរិញ្ញាបត្រផ្នែកស្ថាបត្យកម្ម រូបនេះ ប្តេជ្ញាថា នាងនឹងជួយផ្សព្វផ្សាយពីកីឡាស៊ីហ្គេមរបស់ កម្ពុជាយ៉ាងរីករាយ បើថ្នាក់ដឹកនាំ CAMSOC ត្រូវការ ។ រូប Mascot ដែលជួយឲ្យកញ្ញា លី គីមអាន ទទួលបានជ័យលាភី គឺ រូបសុភា ទន្សាយពីរដែលគ្រងសម្លៀកបំពាក់គុនល្បុក្កតោ ដែលជាក្បាច់គុនបុព្វបុរសខ្មែរ ។
តួអង្គទន្សាយឈ្មោលឈ្មោះបុរី ដៃស្តាំ កាន់ភ្លើងគប់បង្ហាញ ពីការចាប់ផ្តើមនៃព្រឹត្តិការណ៍កីឡាស៊ីហ្គេម ខណៈតួអង្គទន្សាយញីឈ្មោះរំដួល ដៃទាំងពីរលើកសំពះដើម្បីបង្ហាញពីការស្វាគមន៍ប្រតិភូគ្រូបង្វឹក និងអត្តពលិកអន្តរជាតិដែលមកចូលរួមការប្រកួតកីឡាស៊ីហ្គេមរបស់កម្ពុជា ។ នេះជាលើកទី១ហើយសម្រាប់កញ្ញា លី គីមអាន ដែលបានទទួលជ័យលាភីក្នុងការប្រកួតគូរូបដ្បិតនាងមិនធ្លាប់ចូលរួមប្រកួតបែបនេះកន្លងមកនោះទេ។
ប៉ុន្តែកីឡាតេក្វាន់ដូខ្សែក្រវាត់ខ្មៅកម្រិតពីរដាន់ រូបនេះធ្លាប់ដណ្តើមបានមេដាយថ្នាក់ជាតិជាច្រើនក្នុងការប្រកួតកីឡាតេក្វាន់ដូWT ៕
ចែករំលែកព័តមាននេះ