រាជធានីភ្នំពេញ ៖ ការប្រកួតជ្រើសរើសជើងឯកលើសង្វៀនទូរទស្សន៍ប៉ុស្តិ៍លេខ៥កាលពីថ្ងៃទី៥ ខែកញ្ញា ឆ្នាំ២០២០ កីឡាករជើងខ្លាំង កំពែង ខ្មៅ បង្គោលក្រហមបានយកឈ្នះគូប្រកួតដោយពិន្ទុ ខណៈលទ្ធផលនោះទម្រាំរកឃើញក៏ពិបាកផងដែរ…
រាជធានីភ្នំពេញ ៖ ការប្រកួតជ្រើសរើសជើងឯកលើសង្វៀនទូរទស្សន៍ប៉ុស្តិ៍លេខ៥កាលពីថ្ងៃទី៥ ខែកញ្ញា ឆ្នាំ២០២០ កីឡាករជើងខ្លាំង កំពែង ខ្មៅ បង្គោលក្រហមបានយកឈ្នះគូប្រកួតដោយពិន្ទុ ខណៈលទ្ធផលនោះទម្រាំរកឃើញក៏ពិបាកផងដែរ ។ យ៉ាងណាមិញ លោកមិនមែនជាគូប្រកួតដណ្ដើមជើងឯកនោះទេ គឺគ្រាន់តែជាគូពិសេសកំដរសង្វៀនប៉ុណ្ណោះ។
ការប្រដាល់ជាថ្មីរបស់ប៉ុស្តិ៍លេខ៥ បានឈានដល់សប្ដាហ៍ទី២ហើយក្នុងការប្រកួតជើងឯកប្រភេទទម្ងន់៥៤គីឡូក្រាម ។ ការប្រកួតរដូវកាលនេះក្នុងមួយសប្ដាហ៍គឺមានតែមួយគូប៉ុណ្ណោះ មានន័យថា ក្នុងមួយសប្ដាហ៍គឺធ្លាក់តែមួយរូប និងបានឡើងតែមួយរូបខុសពីការប្រកួតរដូវកាលមុនៗដែលក្នុងមួយសប្ដាហ៍មានចំនួន២គូ ។
ការប្រកួតនៅសប្ដាហ៍នេះក៏មានភាពទាក់ទាញមិនខុសគ្នាផងដែរបើទោះជាអ្នកគាំទ្រនៅមិនទាន់ត្រូវបានអនុញ្ញាតឱ្យចូលទស្សនាការប្រកួតដោយផ្ទាល់ក្ដី ។ ជាក់ស្ដែងការប្រកួតរវាងកីឡាករ កំពែង ខ្មៅ មកពីសមាគមកីឡាប្រដាល់ក្រសួងកសិកម្ម និងកីឡាករ ថា សារុន មកពីក្លិបពុទ្ធសេរីវង្សខណ្ឌពោធិ៍សែនជ័យ ដែលជាក្លិបមួយនៅក្នុងសមាគមកីឡាប្រដាល់កងយោធពលខេមរភូមិន្ទ គឺបង្ហាញយ៉ាងច្បាស់ថា អ្នកទាំងពីរថ្វីត្បិតតែស្ថិតក្នុងស្ថានភាពកូវីដ១៩ ដែលមិនមានអ្នកទស្សនាផ្ទាល់លើកទឹកចិត្ត ក៏នៅតែប្រឹងប្រកួតអស់ពីសមត្ថភាព។
ការប្រកួតរបស់អ្នកទាំង២ផាំងទៅផាំងមកតាំងពីទឹកទី១ រហូតដល់រកឃើញលទ្ធផល ខណៈដែលកីឡាករម្ខាងៗក៏ប្រឹងអស់រៀងខ្លួន ធ្វើឱ្យអ្នកគាំទ្រតាមការផ្សាយផ្ទាល់ពេញចិត្ត។
កីឡាករ កំពែង ខ្មៅ បង្គោលក្រហមនៅក្នុងពេលនោះបានប្រើអស់សមត្ថភាព មិនថាកែង ម៉ាត់ និងជង្គង់វាយបុកទៅលើគូប្រកួតហើយបើទោះបីជាបង្គោលខៀវប្រើអស់សមត្ថភាពត្រឡប់មកវិញ ក៏បង្គោលក្រហមនៅតែធ្វើបានល្អជាង និងមានឱកាសប្រើស្នៀតបានចំគោលដៅជាង ទើបធ្វើឱ្យការប្រកួតបញ្ចប់ទៅដោយឈ្នះពិន្ទុ។
យ៉ាងណាក៏ដោយ កំពែង ខ្មៅ បានសារភាពថា ជ័យជម្នះដែលខ្លួនទទួលបានគឺជារឿងដ៏លំបាក បើទោះបីជាខ្លួនមានប្រវត្តិប្រកួតរាប់មិនអស់ នៅលើសង្វៀនប្រដាល់នោះយ៉ាងណាក៏ដោយ លោកបានទាំងសរសើរថា កីឡាករ ថា សារុន មានថ្វីដៃល្អ និងមានបច្ចេកទេសខ្លាំងគ្រប់ការវាយបកនោះផង ។ លោកបានថ្លែងនៅក្រោយការប្រកួតថា ថ្វីត្បិតតែលោកទទួលជ័យជម្នះ តែក៏ជាលទ្ធផលដែលបានទាំងការលំបាក និងពេញដោយការពុះពារផងដែរពេញរយៈពេល៥ទឹក ដែលមានន័យថា គូប្រកួតរបស់ខ្លួន ត្បិតតែប្រឡូកសង្វៀនមិនច្រើនមែនតែសម្រាប់សមត្ថភាពគឺមិនអាចមើលស្រាល ។
ជាមួយនឹងការលើកឡើងរបស់កីឡាករ កំពែង ខ្មៅ លោក សេង កដិកា អ្នករៀបចំការប្រកួតបានលើកឡើងថា សង្វៀនប្រដាល់ប៉ុស្តិ៍លេខ៥ នឹងពុះពារដំណើរការការប្រកួតរបស់ខ្លូនដោយមិនបិទចោលទៀតទេ បើទោះបីជាអំឡុងពេលនេះ លោកសារភាពថា Sponsors មានការប៉ះពាល់ហើយអ្នកចូលរួមឧបត្ថម្ភក៏មានការកាត់បន្ថយចំណាយដែលធ្វើឱ្យការរៀបចំប្រដាល់របស់ខ្លួនពិបាកក្នុងការផ្ដល់តម្លៃមួយខ្ពស់ដល់កីឡាករតាមការចង់បាន។
លោកលើកឡើងពីផលលំបាកថា ការរៀបចំប្រដាល់របស់ខ្លួនជាថ្មីទទួលបានកញ្ចប់ទាបជាងមុននិងមានការត្អូញត្អែរច្រើនពីអ្នកឧបត្ថម្ភកម្មវិធី និងថា ធាតុពិតប៉ុស្តិ៍លេខ៥ មិនអាចដំណើរការការប្រដាល់របស់ខ្លួនបានទៀតទេ តែស្ថាប័នរបស់លោកនៅតែពុះពារដើម្បីចូលរួមលើកស្ទួយវិស័យកីឡា ។ លោកថា កម្មវិធីដែលដំណើរការនៅក្នុងអំឡុងពេលនេះគឺជាបទពិសោធន៍មួយដ៏លំបាកតែក៏ធ្វើឱ្យក្រុមការងារទាំងមូលរឹងមាំផងដែរក្នុងពេលដែលមានជំងឺកូវីដ១៩ផ្ទុះឡើងនេះ។
ជាក់ស្ដែងសូម្បីតែការស្វែងរកកីឡាករឱ្យត្រូវនឹងរូបមន្ត៣២រូប ដែលធ្លាប់ធ្វើឡើង ក៏មិនអាចរកបាននោះដែរ ហើយគាប់ជួនជាប៉ុស្តិ៍លេខ៥ មិនចង់ដំណើរការរូបមន្តចាស់ដោយចេះតែយកកីឡាករមិនត្រូវសមត្ថភាពគ្នាមកឡើងរេញប្រកួតផងទើបធ្វើឱ្យការប្រកួតជ្រើសរើសជើងឯកលើកនេះ ប្ដូរពីរូបមន្ត៣២រូប មកត្រឹម១៦រូបវិញ ដោយប្ដូរការប្រកួតជម្រុះមួយសប្ដាហ៍២គូ មកត្រឹមមួយសប្ដាហ៍១គូវិញ ដើម្បីអាចដំណើរការកម្មវិធីបាន ។ លោកបញ្ជាក់ថា ការប្រកួតជ្រើសរើសជើងឯកលើកនេះនឹងធ្វើឱ្យជោគជ័យ ហើយប៉ុស្តិ៍លេខ៥ ក៏នឹងមានឆន្ទៈរៀបចំការប្រកួតមួយសង្វៀនទៀតដើម្បីពង្រីកឱកាសការងារឱ្យកីឡាករ និងគណៈកម្មការបន្ថែមពីលើជំហរមិនផ្អាកសង្វៀន៕
ចែករំលែកព័តមាននេះ