រាជធានីភ្នំពេញ ៖ អ្នកប្រដាល់ជើងខ្លាំងមឿន សុខហ៊ុច មកពីក្លិបពុទ្ធសេរីវង្សពោធិសែនជ័យ បានណាត់ជួបសាកកម្លាំងជាមួយអ្នកប្រដាល់ជើងខ្លាំង សួន ចាន់នី មកពីក្លិបបក្សីស្លាបដែកនៅលើសង្វៀនស៊ីអិនស៊ីនាថ្ងៃអាទិត្យទី៦ កញ្ញា…
រាជធានីភ្នំពេញ ៖ អ្នកប្រដាល់ជើងខ្លាំងមឿន សុខហ៊ុច មកពីក្លិបពុទ្ធសេរីវង្សពោធិសែនជ័យ បានណាត់ជួបសាកកម្លាំងជាមួយអ្នកប្រដាល់ជើងខ្លាំង សួន ចាន់នី មកពីក្លិបបក្សីស្លាបដែកនៅលើសង្វៀនស៊ីអិនស៊ីនាថ្ងៃអាទិត្យទី៦ កញ្ញា ស្អែកនេះ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករទាំងពីរមួយណាជាជើងខ្លាំងពិតប្រាកដ។
មឿន សុខហ៊ុច រហូតមកទល់ពេលនេះស្ទើរតែរកគូប្រកួតលែងបានទៅហើយ ដូច្នេះហើយទើបលើកនេះរូបគេត្រូវបានគណៈកម្មការរៀបចំការប្រកួតធ្វើការផ្គូផ្គងឱ្យជួបប្រកួតជាមួយសួន ចាន់នី ដែលជាជើងខ្លាំងមួយរូបនៅក្នុងពិភពប្រដាល់ ដែលមិនធ្លាប់ជួបគ្នាពីមុនមកនោះទេ។
គូនេះបើតាមការវាយតម្លៃពីអ្នកតាមដានការប្រកួតគឺអាចស៊ីសងគ្នាបាន ។ សួន ចាន់នីមានប្រៀបខាងកម្ពស់ប៉ុន្តែល្វែងខាងក្រោមរបស់គេរាងទន់ជ្រាយជាងមឿន សុខហ៊ុច ដាច់តែម្ដង។ អ្នកដែលធ្លាប់ជួបមឿន សុខហ៊ុច ជាច្រើននាក់កន្លងមកសុទ្ធបតែទទួលមេរៀនយ៉ាងជូរចត់
បំផុត ។ លើកនេះអ្នកគាំទ្រកំពុងតែរង់ចាំមើលថាតើមឿន សុខហ៊ុច អាចបំបាក់សួន ចាន់នី ដូចគូប្រកួតមុនៗបានឬអត់ក្នុងពេលវិជ្ជាគុនសួនចាន់នីខ្លាំងមិនអាចមើលស្រាលបានបែបនេះនោះ។
នៅក្នុងសប្ដាហ៍នេះក្រៅពីគូឯកមួយគូនេះទៅនៅមានគូពិសេសចំនួន៤គូទៀតដូចជា កីឡាករ យ៉ន ពិសី មកពីក្លិបសាលវ័ន្តកីឡា ត្រូវជួបប្រកួតជាមួយកីឡាករ ធន់ វណ្ណឌី មកពីសមាគមកីឡាប្រដាល់កងយោធពលខេមរភូមិន្ទ ។ កីឡាករ ថៃ រ៉េត មកពីក្លិបទីបញ្ជាការទ័ពពិសេស ប្រកួតជាមួយកីឡាករ ឯម ដារ៉ូ មកពីក្លិបថ្មគោលពោធិសែនជ័យ ។
កីឡាករសេក គឹមគា មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករ ង៉ុន ផាន់ណា មកពីក្លិបនាគរាជចតុមុខ និងគូបើកឆាកកីឡាករ ផាត សុផែន មកពីក្លិបឃ្លាំងមឿងកីឡា ប្រកួតជាមួយកីឡាករ សូត្រ សុខឃីមមកពីក្លិបបក្សីស្លាបដែក ៕
ចែករំលែកព័តមាននេះ