យោងតាមកាសែតថៃផ្សាយថ្ងៃទី២៤ សីហា បានឱ្យដឹងថា អ្នកស្រុកជាច្រើននាក់ក្នុងខេត្តអ៊ូដនឌីត បានចោមរោមមើលហេតុការណ៍ពស់ ខៀវ១ក្បាល (ពស់តុកកែ) មានទំហំប៉ុនចង្អុលដៃប្រវែង៤០សង្ទីម៉ែត្រ កំពុងរឹតតុកកែដែលមានប្រវែង១៥សង្ទីម៉ែត្រ ដើម្បីស៊ីថ្លើមទៅតាមទំលាប់ក្នុងសភាវៈជាសត្វ ប៉ុន្តែបែរជាតុកកែបានធ្វើការប្រយុទ្ធជាមួយពស់ទៅវិញ ។ តាមកាសែតថៃនោះឱ្យដឹងថា ហេតុការណ៍ផ្ទុយគ្នានេះបានកើតឡើងនៅស្នាក់ការឃុំហាតសងគ្វេ ស្រុកតារុន ខេត្តអ៊ូដនឌីត ។
ការប្រយុទ្ធគ្នារវាងពស់ខៀវ និងតុកកែបានកន្លងផុតជាងកន្លះម៉ោង តុកកែ ក៏មានលក្ខណៈទន់ជ្រាយ ដោយការរឹបរឹតរបស់ពស់ ធ្វើឱ្យអ្នកស្រុកមានការភ្ញាក់ផ្អើល ព្រោះពស់មានឥរិយាបថលេបតុកកែទាំងមូល ប៉ុន្តែជាចុងក្រោយ ពស់ខៀវមិនអាចលេបតុកកែបាន និងយល់ព្រមបន្ធូរបន្ថយការរឹតខ្លួន ។ ស្របពេលជាមួយគ្នានេះដែរ តុកកែក៏យល់ព្រមចុះចាញ់ ដោយហាមាត់ឱ្យពស់ខៀវលូនចូលទៅស៊ីថ្លើមតាមសំរួល និងក្នុងខណៈពេលដែលពស់ស៊ីថ្លើមរួចពួកវាទាំង២ ក្បាលក៏បំបែកផ្លូវគ្នារៀងៗ ខ្លួនដោយគ្មានរបួស ។
លោកពុងថេប ឆាយអន មេឃុំហាតសងគ្វេ បានឱ្យដឹងថា លោកធ្លាប់ឃើញហេតុការណ៍ពស់ខៀវស៊ីថ្លើមតុកកែម្តងរួចមកហើយ ប៉ុន្តែកាលណោះតុកកែបានហាមាត់ និងព្រមឱ្យពស់ស៊ីថ្លើមតាមសំរួល ដោយគ្មានការប្រយុទ្ធគ្នាដូចដែលបានឃើញលើកនេះទេ ។ ជាធម្មតា តុកកែបានយំ និងឱ្យពស់ខៀវស៊ីថ្លើមក្នុងរដូវប្រាំង ប៉ុន្តែលើកនេះជារដូវវស្សា និងបានប្រយុទ្ធតស៊ូគ្នានៅកណ្តាលវាលខុសនឹងភាពប្រក្រតី ធ្វើឱ្យអ្នកស្រុកនាំគ្នាជឿថា នឹងកើតមានប្រផ្នូលអ្វីមួយនៅក្នុងខេត្តអ៊ូដនឌីតក៏ថាបាន ជាពិសេសគឺគ្រោះភ័យធម្មជាតិដែលប្រទេសជាច្រើនកំពុងជួបប្រទះ ។
ជាធម្មតាហេតុការណ៍បែបនេះ សត្វទាំង២ប្រភេទនឹងមិនធ្វើឱ្យមនុស្សឃើញឡើយ ប៉ុន្តែការមើលឃើញលើកនេះបានកើតឡើងនៅកណ្តាលវាលដែលជារឿងមួយគួរឱ្យចំលែកបំផុត និងមិនធ្លាប់មាន ៕
ចែករំលែកព័តមាននេះ