កូរ៉េខាងត្បូង ៖ ស្ថានទូតកម្ពុជា និងមជ្ឈមណ្ឌលគាំពារជនបរទេសទីក្រុងសុងណាំ បានឯកភាពគ្នា រៀបចំគម្រោងចំនួន២គឺ ការបង្រៀនធ្វើម្ហូបខ្មែរដល់បងប្អូនស្ត្រីខ្មែរយើង និងការបង្រៀនភាសាខ្មែរ ដល់កុមារកូនកាត់កូរ៉េ ដើម្បីបានផ្សព្វផ្សាយវប្បធម៌ខ្មែរដ៏រុងរឿងដល់សាធារណជន…
កូរ៉េខាងត្បូង ៖ ស្ថានទូតកម្ពុជា និងមជ្ឈមណ្ឌលគាំពារជនបរទេសទីក្រុងសុងណាំ បានឯកភាពគ្នា រៀបចំគម្រោងចំនួន២គឺ ការបង្រៀនធ្វើម្ហូបខ្មែរដល់បងប្អូនស្ត្រីខ្មែរយើង និងការបង្រៀនភាសាខ្មែរ ដល់កុមារកូនកាត់កូរ៉េ ដើម្បីបានផ្សព្វផ្សាយវប្បធម៌ខ្មែរដ៏រុងរឿងដល់សាធារណជន និងកូរ៉េ ព្រមទាំងបរទេសផងដែរ។ យោងតាមប្រសាសន៍ លោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េ ខាងត្បូង បានឱ្យដឹងនៅថ្ងៃទី២៨ ខែសីហា ឆ្នាំ២០២០នេះថា «គម្រោងនេះមិនត្រឹមតែជួយទៅលើសមត្ថភាព ចំណេះដឹងនោះទេ វាក៏អាចជួយដល់ជីវភាពដល់ស្ត្រីខែ្មរ ដែលគាត់កំពុងតែរស់នៅក្នុងប្រទេសនេះបន្ទាប់ពីគាត់មានស្វាមីជាជនជាតិកូរ៉េ គឺយើងចង់ឱ្យពួកគាត់រៀនធ្វើម្ហូបខ្មែរទៅតាមប្រពៃណី ទំនៀមទម្លាប់បែបខ្មែរ និងមានអនាម័យ ហើយមានគុណភាពខ្ពស់»។
បន្ថែមពីនេះទៅទៀតលោកបន្តថា ជនជាតិកូរ៉េ ប្រសិនបើគាត់បរិភោគ គាត់មិនចូលចិត្តការដាក់គ្រឿងទេសច្រើននោះទេ។ ហើយនៅប្រទេសកូរ៉េភោជនីយដ្ឋានខ្មែរយើង មិនក្រោម ៥០ហាងនោះទេ ទូទាំងប្រទេសកូរ៉េ ហើយមិនមានជនបរទេស ឬជនជាតិកូរ៉េណាចូលក្នុង ភោជនីយដ្ឋានទាំងនោះទេ គឺច្រើនតែខ្មែរយើងដូចគ្នា។ លោកឯកអគ្គរាជទូត បានបន្តថា «ដូចការធ្វើម្ហូបត្រឹមតែជាការធ្វើដើម្បីឱ្យបានហូបតែប៉ណ្ណោះ បើឱ្យតាមស្តង់ដារ គុណភាព ដែលអាចទទួលយកបាន សម្រាប់ទាំងជនបរទេស និងជនជាតិកូរ៉េ នៅមិនទាន់អាចទទួលយកបាននោះទេ។
ខ្ញុំចង់ជម្រាបជូនថា ពាក់ព័ន្ធនឹងកូនកាត់កូរ៉េ-ខ្មែរនេះ ខ្ញុំគិតថាមានយ៉ាងតិចក៏ ១៥០០០ ទៅ ១៦០០០ នាក់ដែរ ហើយពួកគាត់ទាំងអស់នេះ ភាគច្រើនគឺមិនចេះភាសាខ្មែរ ឬមិនអាចប្រើប្រាស់ភាសាខ្មែរបាននោះទេ»។ លោក ឡុង ឌីម៉ង់ បានមានប្រសាសន៍បន្ថែមទៀតថា ម្យ៉ាងវិញទៀត យើងចង់ឱ្យមានវគ្គបង្ហាត់បង្រៀន សម្រាប់កុមារដែលមានជាប់សាច់ឈាមជាជនជាតិខ្មែរ ឱ្យបានរៀនភាសាក្នុងវ័យតូចៗ ហើយយើងក៏យកអ្នកដែលបង្ហាត់បង្រៀនពួកគាត់ ជាអ្នកមានចំណេះជំនាញខាងកុមារតូចៗ ព្រោះថាបើមិនមានបទពិសោធន៍នោះទេ កុមារទាំងនោះអាចមានការធុញទ្រាន់បាន មានន័យថាត្រូវធ្វើឱ្យមានការទាក់ទាញទៅលើសិស្ស ហើយចង់ឱ្យពួកគាត់ចង់រៀនភាសាខ្មែរ។
ដូចនេះយើងកំពុងគិតគូរទៅលើសិស្សនិស្សិត ដែលមានជាង ៤០០ នាក់កំពុងសិក្សានៅទីនេះ និងមានអ្នកខ្លះអាចនឹងមានការចាប់អារម្មណ៍អាចជួយទៅលើការបង្រៀននេះ នឹងជាការជួយលើកកម្ពស់ខាងផ្នែកហិរញ្ញវត្ថុផងដែរ។ លោក ឡុង ឌីម៉ង់បានបញ្ជាក់បន្ថែមថា «អ៊ីចឹងអត្ថប្រយោជន៍វិលមកវិញ គឺមិនត្រឹមតែលើកកម្ពស់ វប្បធម៌ លើកម្ពស់តម្លៃស្ត្រីខ្មែរ ចូលរួមចំណែកក្នុងការឱ្យបរទេសគេបានឃើញអំពីវប្បធម៌ ដ៏ល្អផូរផង់ រុងរឿងរបស់យើង។ និងកូនកាត់ខ្មែរកូរ៉េ តាមវិទ្យាសាស្ត្រឱ្យដឹងថាកូនកាត់មានខួរក្បាលឆ្លាតណាស់ អ៊ីចឹងយើងចង់ឱ្យគាត់ចេះភាសាទាំងពីរ ព្រោះទៅថ្ងៃអនាគត គាត់នឹងក្លាយទៅជាគ្រាប់ពូជ ដែលជួយអភិវឌ្ឍក្នុងសង្គមជាតិទាំងកូរ៉េ និងខ្មែរផងដែរ»។ សូមជម្រាបថា គម្រោងនេះជាគម្រោងសាកល្បងមួយដែលស្ថានទូត ចាប់ផ្តើមជាមួយទីក្រុងសុងណាំសិន ដែលទីក្រុងនេះនៅមិនឆ្ងាយពីទីក្រុងស៊េអ៊ូនោះទេ ដោយមានចម្ងាយត្រឹមតែ ៣០គីឡូម៉ែត្រប៉ុណ្ណោះ៕ ដោយ ៖ ស្រី គំនិត
ចែករំលែកព័តមាននេះ