ទីក្រុងញូយ៉ក៖ ក្រោយការវាយប្រហារស្លាប់អ្នកសារព័ត៌មាន៦នាក់ពីសំណាក់យោធាអ៊ីស្រាអែលកាលពីយប់ថ្ងៃអាទិត្យ អង្គការសហប្រជាជាតិប្រកាសថ្កោលទោសជាទម្ងន់។ ការិយាល័យសិទ្ធិមនុស្សរបស់អង្គការសហប្រជាជាតិចាត់ទុកថានេះជាការរំលោភច្បាប់មនុស្សធម៌អន្តរជាតិ។ នៅក្នុងចំណោមអ្នកស្លាប់ទាំងនោះ គ្រាន់តែទូរទស្សន៍អាល់ចាស៊ីរ៉ាស្លាប់អ្នកសារព័ត៌មានរបស់ខ្លួន៥នាក់។ ក្នុងនោះមានអ្នកសារព័ត៌មានល្បីឈ្មោះ លោកអាណាស់ អាល់សារីហ្វ(Anas al-Sharif) ម្នាក់ផងដែរ។
យោធាអ៊ីស្រាអែលទទួលស្គាល់ថាការវាយប្រហារនេះជាស្នាដៃរបស់ខ្លួនពិតមែន ប៉ុន្តែអ៊ីស្រាអែលថាខ្លួនគ្មានបំណងសម្លាប់មនុស្សច្រើនសន្ធឹកសន្ធាប់ដល់ថ្នាក់នេះទេ។ ខ្លួនមានបំណងសម្លាប់តែលោកអាល់សារីហ្វម្នាក់ប៉ុណ្ណោះដែលអ៊ីស្រាអែលចោទប្រកាន់ថាគាត់ជាមនុស្សរបស់ក្រុមហាម៉ាស់។ អ៊ីស្រាអែលថាខ្លួនមានឯកសារបញ្ជាក់ថាអាល់សារីហ្វពិតជាសមាជិកក្រុមហាម៉ាស់។ ក្នុងនោះមានបញ្ជីបុគ្គលិក, ឈ្មោះរបស់គាត់នៅក្នុងបញ្ជីហ្វឹកហ្វឺនរបស់ក្រុមភេរវកម្ម, លេខទូរស័ព្ទ និងបញ្ជីបើកប្រាក់ខែ។
ទោះជាមានការបកស្រាយបែបនេះក្ដី ការិយាល័យសិទ្ធិមនុស្សរបស់អង្គការសហប្រជាជាតិនៅតែមិនគាំទ្រការវាយប្រហារនោះទេ។ ការិយាល័យនេះបង្ហោះសារនៅលើបណ្ដាញអ៊ិចថាអ៊ីស្រាអែលត្រូវតែគោរព និងការពារជនស៊ីវិលគ្រប់រូប រួមទាំងអ្នកសារព័ត៌មានផងដែរ។ យើងយល់ថាអ្នកសារព័ត៌មានទាំងអស់ត្រូវតែមានសិទ្ធិចូលតំបន់ហ្កាហ្សាដោយគ្មានការរារាំង។
ក្រុមការពារសិទ្ធិអ្នកសារព័ត៌មាន និងប្រទេសមួយចំនួនប្រកាសថ្កោលទោសទង្វើរបស់អ៊ីស្រាអែល។ អ្នកនាំពាក្យនាយករដ្ឋមន្ត្រីអង់គ្លេសថ្លែងថារដ្ឋាភិបាលរបស់ខ្លួនព្រួយបារម្ភយ៉ាងខ្លាំងចំពោះបញ្ហានេះ និងសូមអំពាវនាវឱ្យស៊ើបអង្កេតសំណុំរឿងនេះដោយឯករាជ្យ។ អ្នកនាំពាក្យរូបនេះយល់ថាអ៊ីស្រាអែលគួរធានាឱ្យបានថាអ្នកសារព័ត៌មានអាចបំពេញការងាររបស់ខ្លួនដោយសុវត្ថិភាព និងដោយគ្មានការភ័យខ្លាច។
ថ្ងៃនេះ បុគ្គលិករបស់ទូរទស្សន៍អាល់ចាស៊ីរ៉ាបានជួបជុំគ្នាដើម្បីគោរពវិញ្ញាណក្ខន្ធមិត្តរួមការងាររបស់ខ្លួនទាំង៥នាក់។ ប្រភពខ្លះឱ្យដឹងថាអ្នកសារព័ត៌មានឈ្មោះអាល់សារីហ្វធ្លាប់ត្រូវអ៊ីស្រាអែលគំរាមចង់សម្លាប់ជាច្រើនដងមកហើយ។ អ៊ីស្រាអែលថាគាត់ជាអ្នកដឹកនាំកម្លាំងក្រុមហាម៉ាស់ និងធ្លាប់ចូលរួមនៅក្នុងការវាយប្រហារដោយគ្រាប់រ៉ុកកែតទៅលើអ៊ីស្រាអែល។
ទូរទស្សន៍អាល់ចាស៊ីរ៉ាផ្ដល់ថវិកាផ្សាយដោយរដ្ឋាភិបាលប្រទេសកាតា។ ទូរទស្សន៍នេះបានចេញមុខច្រានចោលការចោទប្រកាន់របស់អ៊ីស្រាអែលត្រង់ចំណុចដែលថាអ្នកសារព័ត៌មានរបស់ខ្លួនជាបក្សពួកក្រុមហាម៉ាស់។ កាលពីពេលកន្លងមក លោកអាល់សារីហ្វក៏ធ្លាប់បដិសេធការចោទប្រកាន់នេះផងដែរ។ ឥឡូវនេះ ការពិតយ៉ាងណានៅមិនទាន់ដឹងនៅឡើយទេ ទាល់តែរង់ចាំការស៊ើបអង្កេត។ ខាងលើនេះជាការដកស្រង់ប្រភពពីប៊ីប៊ីស៊ី និងរ៉យទ័រ៕
ចែករំលែកព័តមាននេះ