អភិបាលខេត្តស្ទឹងត្រែង នាំយកស្បៀងអាហារ និងថវិកាមួយចំនួន ជូនដល់ក្រុមគ្រួសារវីរកងទ័ពជួរមុខ
ខេត្តស្ទឹងត្រែង ៖ នាថ្ងៃទី១១ ខែសីហា ឆ្នាំ២០២៥ លោក សរ សុពុត្រា រួម និងថ្នាក់ដឹកនាំ…
ខេត្តស្ទឹងត្រែង ៖ នាថ្ងៃទី១១ ខែសីហា ឆ្នាំ២០២៥ លោក សរ សុពុត្រា រួម និងថ្នាក់ដឹកនាំ នៃរដ្ឋបាលក្រុងស្រុក ឃុំសង្កាត់ ក្នុងខេត្តស្ទឹងត្រែង បាននាំយកនូវស្បៀងអាហារ និងថវិកាមួយចំនួន ទៅសួរសុខទុក្ខ និងលើកទឹកចិត្តដល់ក្រុមគ្រួសារវីរកងទ័ពជួរមុខ ដែលត្រូវបានទាហានចោរឈ្លានពានថៃចាប់ខ្លួនកាលពីព្រឹកថ្ងៃទី២៩ ខែកក្កដា ឆ្នាំ២០២៥ (ក្រោយបទឈប់បាញ់ បានចូលជាធរមាន) នៅលំនៅដ្ឋានសង្កាត់ស្រះឬស្សី ក្រុងស្ទឹងត្រែង និងឃុំអូររៃ-ឃុំថាឡាបរិវ៉ាត់ ស្រុកថាឡាបរិវ៉ាត់ ។
ក្នុងឱកាសនោះ លោកអភិបាលខេត្ត បានពាំនាំពីសុខទុក្ខវីរកងទ័ពជួរមុខ កំពុងនៅប្រទេសថៃ គឺមានសុខភាពល្អ និងសុខសុវត្ថិភាព។ ទោះជាស្ថានការណ៍មានការវិវត្តប្រែប្រួលយ៉ាងណា ក៏រាជរដ្ឋាភិបាលកម្ពុជា នៅតែបន្តតាមដានដោយយកចិត្តទុកដាក់បំផុត ចំពោះសុវត្ថិភាពរបស់យោធាកម្ពុជាចំនួន ១៨រូប ដែលកំពុងស្ថិតក្នុងការឃុំខ្លួនរបស់អាជ្ញាធរថៃ ចាប់តាំងពីថ្ងៃទី២៩ ខែកក្កដា ឆ្នាំ២០២៥ និងកំពុងចាត់វិធានការតាមយន្តការចាំបាច់ផ្សេងៗ ដើម្បីឱ្យមានការដោះលែងយោធាកម្ពុជាឱ្យបានឆាប់បំផុត និងមានសុវត្ថិភាព ។
លោកអភិបាលខេត្ត បានផ្តាំផ្ញើដល់ក្រុមគ្រួសារកងទ័ពទាំង ៣គ្រួសារ កុំឱ្យមានការជឿលើការញុះញង់ពីក្រុមណាមួយឱ្យសោះ ដោយប្រមូលអារម្មណ៍ទាំងអស់គ្នាជឿជាក់លើរាជរដ្ឋាភិបាលកម្ពុជា។ គូរបញ្ជាក់ថា ៖ រយៈពេល១៣ថ្ងៃ មកហើយ ដែលកងកម្លាំងកម្ពុជា ត្រូវបានភាគីថៃចាប់ខ្លួនទៅដោយខុសច្បាប់ គឺមិនទាន់ដោះលែងមកវិញនៅឡើយទេ។ កម្ពុជានៅតែបន្តទាមទារឱ្យភាគីថៃ ត្រូវប្រញាប់បញ្ជូនអ្នកទាំងនោះមកវិញឱ្យបានឆាប់កុំពន្យារពេល ។ អ្នកនាំពាក្យក្រសួងការពារជាតិ លោកជំទាវ ឧត្តមសេនីយ៍ឯក ម៉ាលី សុជាតា បានលើកឡើងនៅវេលាថ្ងៃត្រង់ទី១១ ខែសីហានេះថា គិតតាំងពីថ្ងៃទី២៩ ខែកក្កដា ឆ្នាំ២០២៥ ក្រោយបទឈប់បាញ់ចូលជាធរមាន កងកម្លាំងកម្ពុជា ដែលត្រូវបានទាហានថៃចូលមកចាប់ខ្លួនដោយខុសច្បាប់ មកទល់ពេលនេះ មានរយៈពេល១៣ថ្ងៃមកហើយ គិតត្រឹមថ្ងៃទី១១ ខែសីហានេះ ។ ក្នុងន័យនេះ កម្ពុជាបន្តស្នើភាគីថៃ ឆាប់បញ្ជូនកងកម្លាំងទាំង១៨រូប ឱ្យត្រឡប់មកវិញជាបន្ទាន់ ស្របតាមច្បាប់មនុស្សធម៌អន្តរជាតិ និងស្របទៅតាមការអំពាវនាវយ៉ាងទទូចរបស់បណ្ដាប្រទេសដៃគូ និងអង្គការអន្តរជាតិជាច្រើន ។
លោកជំទាវ ម៉ាលី សុជាតា បាននិយាយថា ក្រសួងការពារជាតិ និងកងយោធពលខេមរភូមិន្ទកម្ពុជា ព្រមទាំងសហគមន៍អន្តរជាតិនៅតែបន្តទាមទារ រហូតដល់ថៃបំពេញកាតព្វកិច្ចរបស់ខ្លួន ក្រោមច្បាប់អន្តរជាតិ។ ជាថ្មីម្ដងទៀត អ្នកនាំពាក្យក្រសួងការពារជាតិកម្ពុជា ក៏បញ្ជាក់ពីការមិនទុកចោល នូវសមាជិកយោធារបស់ខ្លួនណាម្នាក់ឡើយ ពោលគឺកម្ពុជានៅតែទទូចឱ្យភាគីថៃប្រញាប់បញ្ជូនអ្នកទាំងនោះត្រឡប់មកវិញ ។
គួរជម្រាបថា តាមការអះអាងរបស់កាកបាទក្រហមអន្តរជាតិ ដែលបានជួបសួរសុខទុក្ខទាហានកម្ពុជា ទាំង១៨នាក់ ដែលត្រូវបានភាគីថៃចាប់ខ្លួនដោយខុសច្បាប់ ក្រោយបទឈប់បាញ់ចូលជាធរមាននោះ គឺមានសុវត្ថិភាព ៕
ចែករំលែកព័តមាននេះ