ទីក្រុងកៀវ៖ លោកត្រាំថ្លែងថាលោកត្រូវតែជួបលោកពូទីនឱ្យបានទោះបីលោកពូទីនមិនទាន់មានអារម្មណ៍ចង់ជួបលោកហ្សេឡិនស្គីក៏ដោយ។ នៅក្នុងកិច្ចជំនួបរវាងប្រេសិតពិសេសរបស់លោកត្រាំ (លោកស្ទីវវីតខូស) ជាមួយលោកពូទីននៅវិមានក្រឹមឡាំងកាលពីថ្ងៃពុធ លោកវីតខូសក៏បានស្នើឱ្យមានកិច្ចជំនួបត្រីភាគីរវាងលោកត្រំា លោកពូទីន និងលោកហ្សេឡិនស្គីដែរ។ ប៉ុន្តែសំណើនេះត្រូវទុកចោលដោយគ្មានចម្លើយ។ មានន័យថារុស្ស៊ីបដិសេធក៏មិនបដិសេធ ហើយគាំទ្រក៏មិនគាំទ្រ។
អ្នកសារព័ត៌មានបានសួរលោកត្រាំថាតើលោកពូទីននឹងជួបលោកហ្សេឡិនស្គីដែរឬទេ? លោកត្រាំឆ្លើយថាអត់ទេ គាត់នឹងមិនជួបទេ។ លោកពូទីនថ្លែងកាលពីល្ងាចម្សិលមិញថាប្រទេសអារ៉ាប់រួមជាទីកន្លែងដែលស័ក្ដិសមសម្រាប់ការជួបគ្នា។ ជំនួយការរបស់លោកពូទីនគឺលោកអ៊ូសាកូស (Yuri Ushakov) បញ្ជាក់ថានៅក្នុងគម្រោងជួបគ្នារវាងលោកត្រាំ និងលោកពូទីននោះក៏មានការពិភាក្សាគ្នាអំពីបទឈប់បាញ់ផងដែរ។
ទោះបីលោកត្រាំនិយាយព្រលយពាក្យថាបើបានលោកហ្សេឡិនស្គីចូលរួមនៅក្នុងកិច្ចជំនួបនេះមិនដឹងជាល្អយ៉ាងណាទេ។ ប៉ុន្តែលោកអ៊ូសាកូសថ្លែងថានៅក្នុងការជួបគ្នារវាងប្រេសិតលោកត្រាំ និងលោកពូទីននោះមិនបាននិយាយអំពីចំណុចនេះទេ។ ភាគីទាំង២បានឯកភាពគ្នារួចហើយថានឹងជួបគ្នានៅទីកន្លែងណា។ ប៉ុន្តែលោកសូមមិនទាន់ប្រកាសឱ្យដឹងនៅពេលនេះទេ ហើយទុកលទ្ធភាពនេះជូនប្រេសិតលោកត្រាំពាំនាំដំណឹងទៅជម្រាបជូនថ្នាក់លើរបស់គាត់ចុះ។
នៅក្នុងព្រឹត្តិការណ៍មួយទៀត លោកហ្សេឡិនស្គីកំពុងសណ្ដោងរយោងសហភាពអឺរ៉ុបឱ្យមានចំណែកនៅក្នុងការចរចាគ្នានេះដែរទោះបីខ្លួនលោកផ្ទាល់មិនទាន់ដឹងថាលោកពូទីនយល់ព្រមជួបជាមួយឬអត់ផង។ ថ្ងៃនេះ លោកហ្សេឡិនស្គីថ្លែងថាពួកអឺរ៉ុបត្រូវតែមានចំណែកចូលរួមនៅក្នុងការចរចាសន្តិភាពជាមួយរុស្ស៊ី។ លោកថ្លែងដូច្នេះបន្ទាប់និយាយទូរស័ព្ទជាមួយអធិការបតីអាល្លឺម៉ង់ លោកហ្វ្រីតរីច ម៊ែក (Friedrich Merz)។
មុនពេលមានកិច្ចជំនួបកំពូលរវាងលោកត្រាំ និងលោកពូទីននៅសប្ដាហ៍ក្រោយ លោកហ្សេឡិនស្គីក៏ប្រញាប់ទាក់ទងទៅថ្នាក់ដឹកនាំនៅសហភាពអឺរ៉ុបដើម្បីជជែកគ្នាអំពីបញ្ហានេះ។ បន្ទាប់ពីទទួលដំណឹងថារុស្ស៊ីមិនចង់ជួបគ្នាត្រីភាគី លោកហ្សេឡិនស្គីថ្លែងថាអ៊ុយក្រែនគ្មានចិត្តកំសាកមិនហ៊ានជួបគ្នានោះទេ។ លោកចង់ឱ្យរុស្ស៊ីធ្វើចិត្តក្លាហានទទួលយកសំណើនេះ។
ប្រធានគណៈកម្មការអឺរ៉ុប លោកស្រីឡីយឹន (Leyen)ថ្លែងថាលោកស្រីទើបតែនិយាយទូរស័ព្ទជាមួយលោកហ្សេឡិនស្គីដើម្បីពិភាក្សាអំពីស្ថានការណ៍វិវត្តថ្មីៗនារយៈពេលប៉ុន្មានថ្ងៃចុងក្រោយនេះ, ពិភាក្សាអំពីការចរចាសន្តិភាព, ការទទួលយកអ៊ុយក្រែនជាសមាជិកសហភាពភាពអឺរ៉ុបនាពេលអនាគត និងការកសាងប្រទេសអ៊ុយក្រែនឡើងវិញក្រោយពេលចប់សង្គ្រាម។
ប្រធានាធិបតីបារាំង លោកម៉ាក្រុង បញ្ជាក់ថារដ្ឋាភិបាលរបស់លោកគាំទ្រយ៉ាងពេញទំហឹងចំពោះបទឈប់បាញ់ដែលអាចនឹងកើតមាននាពេលអនាគត។ លោកក៏គាំទ្រផងដែរចំពោះគម្រោងពិភាក្សាគ្នាដើម្បីសម្រេចឱ្យបានសន្តិភាពដ៏ច្បាស់លាស់ និងយូរអង្វែង។ លោកថ្លែងដូច្នេះបន្ទាប់ពីពិភាក្សាគ្នាជាមួយលោកហ្សេឡិនស្គី និងថ្នាក់ដឹកនាំអឺរ៉ុបដទៃទៀត។ ខាងលើនេះជាការដកស្រង់ប្រភពពីសារព័ត៌មានដឹ ហ្កាឌាន (Then Guardian), ដឹ អ៊ីនឌីផឹនដឹន (The Independent) និងប្រភពដទៃទៀត៕
ចែករំលែកព័តមាននេះ