រាជធានីភ្នំពេញ ៖ អ្នកនាំពាក្យក្រសួងការបទេសកម្ពុជាបានបញ្ជាក់ថា លទ្ធផលនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC)ប្រព្រឹត្តទៅនៅប្រទេសម៉ាឡេស៊ី ដែលទើបបានបញ្ចប់ទៅថ្ងៃទី០៧ ខែសីហា ឆ្នាំ២០២៥ កន្លងមកនេះ ប្រតិកម្មជារួមរបស់ពិភពលោកចំពោះលទ្ធផលនៃកិច្ចប្រជុំជាទូទៅ…
រាជធានីភ្នំពេញ ៖ អ្នកនាំពាក្យក្រសួងការបទេសកម្ពុជាបានបញ្ជាក់ថា លទ្ធផលនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC)ប្រព្រឹត្តទៅនៅប្រទេសម៉ាឡេស៊ី ដែលទើបបានបញ្ចប់ទៅថ្ងៃទី០៧ ខែសីហា ឆ្នាំ២០២៥ កន្លងមកនេះ ប្រតិកម្មជារួមរបស់ពិភពលោកចំពោះលទ្ធផលនៃកិច្ចប្រជុំជាទូទៅ គឺមានភាពជាវិជ្ជមាន ។
ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានលើកឡើងក្នុងសន្និសីទសារព័ត៌មាន នាព្រឹកថ្ងៃទី០៨ សីហា ឆ្នាំ២០២៥ថា បណ្តាប្រទេសក្នុងតំបន់បណ្តាស្ថាប័នរបស់អាស៊ានបានអបអរសាទរចំពោះកិច្ចព្រមព្រៀង និងយន្តការអ្នកសង្កេតការណ៍ថា ជាជំហានឈានឆ្ពោះទៅរកកាត់បន្ថយភាពតានតឹងដោយសន្តិវិធី ។
ប្រព័ន្ធឃោសនាអន្តរជាតិ និងអ្នកការទូតបង្ហាញនូវសុទិដ្ឋិនិយម ហើយនិងព្រមទាំងការយកចិត្តទុកដាក់ខ្ពស់។ ការផ្សាយនៃប្រព័ន្ធឃោសនាដោយសង្កត់ធ្ងន់លើកិច្ចព្រមព្រៀងក្នុងការកាត់បន្ថយភាពតានតឹង ដើម្បីធ្វើឱ្យមានភាពធូរស្រាលនៃជម្លោះ។
ទោះបីយ៉ាងណា តាមរបាយការណ៍បានកត់សម្គាល់ឃើញថា ក្នុងពេលដែលមានការរីកចម្រើននេះក៏មានការព្រួយបារម្ភខ្លះ ពិសេសគឺពាក់ព័ន្ធនឹងជោគវាសនាយោធិនកម្ពុជាទាំង១៨រូប ដែលកំពុងស្ថិតនៅក្នុងការគ្រប់គ្រងរបស់យោធាថៃនៅមិនទាន់ដោះស្រាយ ។
អ្នកនាំពាក្យក្រសួងការបរទេសបានបង្ហាញប្រតិកម្មមួយចំនួនរបស់ប្រទេសម៉ាឡេស៊ី ជាប្រធានអាស៊ាន សហរដ្ឋអាមេរិក និងរបស់ប្រទេសចិនជាដើម ។ ចំពោះប្រទេសម៉ាឡេស៊ីបានបង្ហាញថាកិច្ចប្រជុំ GBC នៅទីក្រុងកូឡាំឡាំពួរ បានប្រព្រឹត្តិទៅស្ថាបនា និងវិជ្ជមាន ដែលនាំមកនូវកិច្ចព្រមព្រៀងចំនួន១៣ចំណុច។ ប្រទេសម៉ាឡេស៊ីក៏បានផងដែរ ក្នុងការសម្របសម្រួលរៀបចំក្រុមអ្នកសង្កេតការណ៍បណ្តោះអាសន្ន ដែលជាផ្នែកមួយនៃកិច្ចខិតខំប្រឹងប្រែងរបស់អាស៊ានដើម្បីត្រួតពិនិត្យបទឈប់បាញ់ ។
ជាមួយគ្នានេះ ឯកឧត្តម ជុំ សុន្ទរី បានបញ្ជាក់ដែរថា ចំពោះប្រទេសសហរដ្ឋអាមេរិកវិញបានហៅ លទ្ធផលកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC)ថា ជារបត់ដ៏សំខាន់មួយ និងបានគូសបញ្ជាក់ថា ការសម្រេចបាននូវបទឈប់បាញ់ ស្ថិតស្ថេរចិរកាលគឺនៅតែជាគោលដៅដ៏សំខាន់។
វត្តមានរបស់សហរដ្ឋអាមេរិក គឺមានសារសំខាន់ ដែលអាចបញ្ជាក់ពីការបន្តចូលរួមរបស់ទីក្រុងវ៉ោស៊ីនតោន ហើយនិងការគាំទ្ររបស់អាមេរិកចំពោះ កិច្ចខិតខំប្រឹងប្រែងដែលសម្របសម្រួល និងដឹកនាំដោយអាស៊ាន ។
អ្នកនាំពាក្យក្រសួងការបរទេសប្រទេសចិនបានស្វាគមន៍ចំពោះលទ្ធផលិច្ចប្រជុំរបស់គណៈកម្មាធិការព្រំដែនទូទៅកម្ពុជា-ថៃ (GBC) ហើយនិងយន្តការដែលកំពុងត្រូវបានបង្កើតឡើងដើម្បីឱ្យបទឈប់បាញ់។ អ្នកនាំពាក្យចិនរូបនេះបានបញ្ជាក់ថា ប្រទេសចិនបន្តការគាំទ្រសន្តិភាពដែលដឹកនាំដោយអាស៊ាន និងប្រកាន់តូនាទីស្ថាបនាមួយក្នុងការស្តារមកវិញនូវទំនាក់ទំនងរវាងកម្ពុជានិង
ថៃ៕
ចែករំលែកព័តមាននេះ