ទីក្រុងកៀវ៖ កិច្ចព្រមព្រៀងសន្តិភាពដែលតម្រូវឱ្យអ៊ុយក្រែនដូរទឹកដីគ្នាជាមួយរុស្ស៊ីមិនត្រឹមតែប្រជាជនអ៊ុយក្រែនមិនគាំទ្រប៉ុណ្ណោះទេ ប៉ុន្តែក៏ជាទង្វើខុសច្បាប់ផងដែរដោយយោងទៅតាមរដ្ឋធម្មនុញ្ញអ៊ុយក្រែន។ មូលហេតុនេះហើយទើបបានជាលោកហ្សេឡិនស្គីច្រានចោលទុកជាមុននូវលទ្ធភាពនៃការដូរទឹកដីគ្នា។ ការថ្លែងដូច្នេះបន្ទាប់ពីលោកត្រាំបង្ហើបឱ្យដឹងថាតាមមើលទៅប្រទេសទាំង២ប្រហែលជាត្រូវដូរដីគ្នាដើម្បីពន្លឿនការចរចា។ លោក និងលោកពូទីននឹងជួបគ្នាកម្រិតកំពូលនៅថ្ងៃសុក្រសប្ដាហ៍នេះ។
លោកហ្សេឡិនស្គីថ្លែងថាអ៊ុយក្រែនមិនព្រមកាត់ទឹកដីខ្លួនទៅឱ្យរុស្ស៊ីជាដាច់ខាត។ លោកចាត់ទុកថាធ្វើដូច្នេះប្រៀបបាននឹងការប្រគល់ពានរង្វាន់ជូនទៅអ្នកឈ្លានពាន។ សម្រាប់លោកហ្សេឡិនស្គី កិច្ចព្រមព្រៀងដែលធ្វើឱ្យបាត់បង់ទឹកដីរបៀបនេះជាវិនាសកម្មសម្រាប់របបដឹកនាំរបស់គាត់។ ធ្វើសង្គ្រាមជាងបីឆ្នាំអត់ចំណេញបានអីក្រៅពីស្លាប់យុទ្ធជន និងជនស៊ីវិលយ៉ាងរង្គាល, ជំពាក់លុយបរទេស, កាត់ទឹកដីឱ្យរុស្ស៊ី, មនុស្សរត់ភៀសខ្លួនរាប់លាននាក់។ល។ និង។ល។ ម៉្លោះហើយ លោកមិនចង់លេងចូលក្នុងសេណារីយោនេះទេ។
ឧបមាថាបើមានកិច្ចព្រមព្រៀងកាត់ទឹកដីខ្លួនឯងដើម្បីជាថ្នូរនឹងសន្តិភាព លោកហ្សេឡិនស្គីក៏គ្មានសិទ្ធិចុះហត្ថលេខាលើកិច្ចព្រមព្រៀងនោះទៅទៀតព្រោះរដ្ឋធម្មនុញ្ញបានចងជាប់ត្រង់ចំណុចនេះ «ការកែប្រែបន្ទាត់ព្រំដែនអ៊ុយក្រែនឆ្នាំ១៩៩១ជាការផ្ទុយពីស្មារតីនៃរដ្ឋធម្មនុញ្ញ»។ សម្រាប់ពេលនេះ អ្វីដែលគេមើលឃើញទាំងអស់គ្នាគឺថាបំណងប្រាថ្នារបស់ប្រជាជនអ៊ុយក្រែនគឺបញ្ចប់សង្គ្រាមនៅគ្រប់សមរភូមិទាំងអស់។
ឆ្លើយតបទៅនឹងចំណុចដែលលោកហ្សេឡិនស្គីថាគាត់ធ្វើមិនបានទេត្រង់ចំណុចដែលត្រូវដូរដីគ្នាជាមួយរុស្ស៊ីនោះព្រោះត្រូវឆ្លងកាត់ការអនុម័តយល់ព្រមពីរដ្ឋធម្មនុញ្ញា លោកត្រាំនិយាយបែបស៊កសៀតសម្ដីទៅវិញថាហ្សេឡិនស្គីបានទទួលការអនុម័តយល់ព្រមដើម្បីធ្វើសង្គ្រាម និងសម្លាប់មនុស្សគ្រប់គ្នា (ទ័ពរុស្ស៊ី)។ ប៉ុន្តែគាត់ត្រូវឆ្លងកាត់ការអនុម័តយល់ព្រមដើម្បីដូរដីគ្នា។
ទន្ទឹមនឹងគម្រោងជួបគ្នានៅអាឡាស់ស្កា រុស្ស៊ីក៏កំពុងចល័តកងទ័ពយ៉ាងសម្បើមដើម្បីត្រៀមបើកយុទ្ធនាការយោធាថ្មីទៀត។ នេះបើយោងតាមការអះអាងរបស់លោកហ្សេឡិនស្គីដែលទទួលបានព័ត៌មានសម្ងាត់ពីសមរភូមិមុខ។ លោកសង្ឃឹមថាជំនួបកំពូលនៅអាឡាស់ស្កាអាចធ្វើឱ្យមានសន្តិភាពនៅអ៊ុយក្រែន។ ប៉ុន្តែលោកថាលោកពូទីនហាក់ដូចជាគ្មានចិត្តចង់បញ្ចប់សង្គ្រាមទាល់តែសោះ។ ហេតុនេះហើយលោកកំពុងដាក់ជាចម្ងល់ថាតើជំនួបកំពូលនោះអាចនឹងមានលទ្ធផលដែរឬទេ?
ចំណុចដែលច្បាស់ត្រង់ថាគម្រោងជួបគ្នានោះគឺគ្មានវត្តមានរបស់លោកហ្សេឡិនស្គី និងសហភាពអឺរ៉ុបចូលរួមទេ។ ប៉ុន្តែលោកត្រាំបញ្ជាក់ថានៅក្នុងគម្រោងជួបគ្នាលើកក្រោយទៀតអាចនឹងចេញសេណារីយោជួបគ្នាផ្ទាល់ទ្វេភាគីរវាងលោកហ្សេឡិនស្គី និងលោកពូទីន ឬអាចនឹងជួបគ្នាត្រីភាគីរវាងលោក លោកពូទីន និងលោកហ្សេឡិនស្គី។ នេះបើយោងតាមទីភ្នាក់ងារព័ត៌មានអេភី (AP) និងប្រភពដទៃទៀត៕
ចែករំលែកព័តមាននេះ