ម៉ិកស៊ិក ៖ ក្រសួងសុខាភិបាលរបស់ប្រទេសម៉ិកស៊ិក បានរាយការណ៍កាលពីថ្ងៃអង្គារ៍ថា បុគ្គលិកថែទាំសុខភាពជាង១៣០០នាក់ ត្រូវបានបាត់បង់ជីវិតដោយសារតែជំងឺកូវីដ១៩ នៅក្នុងប្រទេសម៉ិកស៊ិក ចាប់តាំងពីការចាប់ផ្តើមរាតត្បាតជំងឺនេះ។
ក្រសួងក៏បានរាយការណ៍ពីករណីឆ្លងកូវីដ១៩ ចំនួន ៤,៩១៦ករណីកាលពីថ្ងៃអង្គារ៍ ដែលធ្វើឱ្យចំនួនសរុបដែលត្រូវបានបញ្ជាក់នៅក្នុងប្រទេសកើនឡើងដល់ ៥៦៨,៦២១ករណី។
ចំនួនអ្នកបាត់បង់ជីវិត ៦៥០នាក់ទៀត ក៏ត្រូវបានបញ្ជាក់ផងដែរ ដោយបានធ្វើឱ្យចំនួនអ្នកបាត់បង់ជីវិតទាក់ទងនឹងជំងឺកូវីដ១៩ សរុបនៅក្នុងប្រទេសកើនដល់ ៦១,៤៥០នាក់ ក្នុងនោះមានបុគ្គលិកសុខាភិបាលចំនួន ១,៣២០នាក់។
កាលពីថ្ងៃច័ន្ទ អនុរដ្ឋមន្ត្រីក្រសួងសុខាភិបាល លោក Hugo López-Gatell បាននិយាយថា ប្រទេសគួរតែរំពឹងថានឹងមានការកើនឡើងគួរឱ្យកត់សម្គាល់ នៅក្នុងករណីប្រចាំថ្ងៃថ្មី បន្ទាប់ពីការពង្រីកលក្ខណៈវិនិច្ឆ័យសម្រាប់ការស្វែងរកជំងឺកូវីដ១៩ ពីករណីសង្ស័យ។
លោក López-Gatell បាននិយាយថា ចាប់ផ្តើមពីថ្ងៃអង្គារ៍ អ្នកជំងឺត្រូវរាយការណ៍ពីរោគសញ្ញាកូវីដ១៩ តែមួយគត់ ដើម្បីត្រូវបានកំណត់ថា ជាករណីសង្ស័យ។ រោគសញ្ញាថ្មីៗបន្ថែមលើលក្ខណៈវិនិច្ឆ័យ រួមមានការបាត់បង់ក្លិន ការបាត់បង់រសជាតិ និងរាគ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ