រាជធានីភ្នំពេញ ៖ កម្មករសំណង់បុរីមួយកន្លែង ជាជនជាតិបង់ក្លាដេសប្រមាណជាង៧០នាក់ បានផ្ទុះការតវ៉ា ដើម្បីទាមទារប្រាក់ខែចំនួន៤ខែ ដែលក្រុមហ៊ុនមិនបានបើកប្រាក់ខែអោយ។ ការប្រមូលផ្តុំគ្នាតវ៉ារបស់ក្រុមកម្មករខាងលើនេះបានផ្ទុះឡើងកាលពីវេលាម៉ោងប្រមាណ១០ព្រឹកថ្ងៃទី២៧ ខែសីហា ឆ្នាំ…
រាជធានីភ្នំពេញ ៖ កម្មករសំណង់បុរីមួយកន្លែង ជាជនជាតិបង់ក្លាដេសប្រមាណជាង៧០នាក់ បានផ្ទុះការតវ៉ា ដើម្បីទាមទារប្រាក់ខែចំនួន៤ខែ ដែលក្រុមហ៊ុនមិនបានបើកប្រាក់ខែអោយ។
ការប្រមូលផ្តុំគ្នាតវ៉ារបស់ក្រុមកម្មករខាងលើនេះបានផ្ទុះឡើងកាលពីវេលាម៉ោងប្រមាណ១០ព្រឹកថ្ងៃទី២៧ ខែសីហា ឆ្នាំ ២០២០ ដោយកម្មករទាំងនោះបានជួបប្រមូលម្តុំគ្នា នៅមុខ បុរីមួយកន្លែង ដែលស្ថិតនៅតាមផ្លូវជាតិលេខ៦ ក្នុងភូមិខ្ទរ សង្កាត់ព្រែកលៀប ខណ្ឌ ជ្រោយចង្វារ រាជធានីភ្នំពេញ ។
តាមប្រភពពីជនជាតិបង់ក្លាដេសដែលមកធ្វើការតវ៉ាបានអោយដឹងថា ពួកគាត់ចំនួន ៧៣នាក់ ដែលបានធ្វើការជាកម្មករសំណង់បុរីខាងលើ អស់រយៈពេល៤ខែមកហើយ ពុំត្រូវបានបើកប្រាក់ខែអោយនោះទេ ដោយមេការប្រាប់ថា ក្រុមហ៊ុនមិនទាន់បើកប្រាក់អោយ។ ដោយសារតែធ្វើការ អត់បានប្រាក់ ទើបពួកគាត់នាំគ្នាជួបប្រមូលផ្តុំនាំគ្នាតវ៉ា ទាមទារប្រាក់ខែតែម្តង ។
តាមប្រភពព័ត៌មានបានអោយដឹងថា បន្ទាប់ពីមានកម្មករជាជនជាតិបង់ក្លាដេសបានធ្វើការតវ៉ារួចមក ខាងតំណាងក្រុមហ៊ុនបុរី ក៍បានចេញមកបំភ្លឺថា មិនបានពាក់ព័ន្ធនឹងបុរីនោះទេ គឺក្រុមហ៊ុនបានបើកប្រាក់ថ្លៃពលកម្មកម្មករអោយទៅមេការអស់ហើយ។
នៅព្រឹកនោះដែរ អាជ្ញាធរ និងសមត្ថកិច្ច សង្កាត់ខណ្ឌជ្រោយចង្វារ ក៍បានចុះទៅសួរនាំ និងជួយសម្របសម្រួល ដោយហៅមេការសំណង់ និងជាងសំណង់ទៅជួបដោះស្រាយនៅស្នាក់ការប៉ុស្តិ៍ ព្រែកលៀប ។
តាមប្រភពព័ត៌មានបានអោយដឹងថា នៅក្នុងការជួបដោះស្រាយខាងលើនោះ ខាងមេការសំណង់ដែលនាំជនជាតិបង់ក្លាដេសខាងលើនោះមកធ្វើការនៅប្រទេសកម្ពុជា ក៍បានសន្យាថា នឹងបើកប្រាក់ខែអោយកម្មករសំណង់នៅថ្ងៃទី១០ ខែកញ្ញាខាងមុខនេះ ហើយកម្មករក៍បានឯកភាព និងទះដៃអបអរផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ