ខេត្តស្វាយរៀង ៖ បុរសជាកសិករឈ្មោះហង្ស ហុក អាយុ៤៨ឆ្នាំ បានប្តូរមុខរបរពីធ្វើស្រែមកដាំដំណាំដូងក្រអូប នៅលើផ្ទៃដី៧ហិកតា៧០អា រហូតមកដល់ខែសីហា ឆ្នាំ២០២០នេះដូងមួយចំនួនចាប់ផ្តើមចេញផ្កា និងក្តិបជាបណ្តើរៗហើយ…
ខេត្តស្វាយរៀង ៖ បុរសជាកសិករឈ្មោះហង្ស ហុក អាយុ៤៨ឆ្នាំ បានប្តូរមុខរបរពីធ្វើស្រែមកដាំដំណាំដូងក្រអូប នៅលើផ្ទៃដី៧ហិកតា៧០អា រហូតមកដល់ខែសីហា ឆ្នាំ២០២០នេះដូងមួយចំនួនចាប់ផ្តើមចេញផ្កា និងក្តិបជាបណ្តើរៗហើយ នឹងអាចប្រមូលផលរយៈពេល៣ខែខាងមុខទៀតប៉ុណ្ណោះ ។ នេះគឺជាភាពជោគជ័យសម្រាប់កសិករស្រុកកំពង់រោទ៌រូបនេះដែលជ្រើសរើសដាំដូងក្រអូប។
កសិករហង្ស ហុក មានទីលំនៅភូមិបាវិតកណ្តាល សង្កាត់បាវិត ក្រុងបាវិត មានស្រុកកំណើតនៅក្នុងភូមិរាមជោ ឃុំស្វាយតាយាន ស្រុក កំពង់រោទិ៍ ខេត្តស្វាយរៀង បានប្រាប់ឱ្យដឹងថា គាត់មានដីស្រែចំនួន២ហិកតាសម្រាប់ធ្វើស្រែ ក្រោយមកគាត់បានប្រមូលទិញដីនៅជិតដីស្រែរបស់គាត់ក្នុងភូមិរាមជោ បាន៥ហិកតា៧០អាទៀត ។
កសិករខាងលើបានបន្តថា គាត់ និងភរិយាឈ្មោះស្រីណេ បានសម្រេចចិត្តប្តូរមុខរបរពីធ្វើស្រែមកដាំដូងក្រអូបវិញ ។ ដោយសារតែគាត់មើលឃើញនូវទីផ្សារដូងក្រអូបដែលមានហាងឆេងលក់បានថ្លៃ និងងាយរកទីផ្សារនោះ ទើបលោកចំណាយថវិកាអស់យ៉ាងច្រើនដាក់ដាំដូងក្រអូបប្រមាណជា២.០០០ដើម លើផ្ទៃដីជិត៨ហិកតា ដោយគិតពូជដូង និងឈ្នួលកម្មករដាំក្នុង១ដើមចំណាយថវិកា៧ដុល្លារ៥កាក់។
កសិករខាងលើបានបន្តទៀតថា ការដាំដូងក្រអូបមិនងាយស្រួលនោះទេ និងចំណាយដើមទុនអស់ច្រើនណាស់ បើទិញពូជដូងក្រអូបខុស ឬការថែទាំមិនបានដិតដល់ហើយគ្មានបច្ចេកទេសដាំ វាអាចខូច(ងាប់) ចំពោះពូជដូងក្រអូបនេះ គាត់បានទិញពីប្រទេសវៀតណាម មកដាំដំបូងចំនួន២ហិកតា ដោយលើកជារងនិងធ្វើប្រឡាយទឹកទទឹងមួយម៉ែត្រអមរងដូង តាមចន្លោះដើមដូង ហើយត្រូវជីកជាប្រឡាយមេជុំវិញចំការ។
កសិករខាងលើបានបន្តទៀតថា ការដាក់ដើមដូងដាំ ត្រូវជីកដីមួយម៉ែត្រទៅមួយម៉ែត្រកន្លះបួនជ្រុង ជម្រៅក៏ដូចគ្នាដែរ និងត្រូវដាក់គម្លាតគ្នាពីមួយដើមទៅមួយដើម៥ម៉ែត្រពីគ្នា បន្ទាប់មកយកជីកំប៉ុស្ត៍ធម្មជាតិដាក់ទ្រាប់បាតពេញរណ្តៅ រួចយកកូនដូងដែលផ្សាំមកដាក់ដាំ ដោយដាក់ចំតិតគូទដូងឡើងលើ ដាក់ដើមដូងឲ្យដេកទៅទឹសខាងកើតរកព្រះអាទឹត្យរយៈពេល៣ខែ ដូងឡើងដើមត្រង់វិញធ្វើបែបនេះដូងដុះល្អនិងឆាប់ទទួលផល។
កសិករខាងលើបានបន្តទៀតថា ធ្វើទំនប់ឲ្យមានផ្លូវទឹកអាចហូរចេញនៅរដូវវស្សាកុំអោយជោគជាំពេក ព្រោះធ្វើអោយដើមដូងងាប់បាន ។ ក្នុងទរទឹក ឬប្រឡាយ បើមានទឹកច្រើនពេកក៏មិនបានដែរ ត្រូវបូមចេញវិញ។
កសិរកខាងលើបានបញ្ជាក់ថា ដើមដូងដាំលូតលាស់ធំបានបន្តិច ត្រូវដើរវែកមើលបណ្តូលដូង ឬដើមដូង ក្រែងមានសត្វមមាចត្នោត និងសត្វកាចែស៊ី បើមានសត្វស៊ី ហើយមើលមិនទាន់ធ្វើអោយដើមដូងងាប់បាន ដើមដូងប្រឈមជាមួយសត្វមមាចត្នោតស៊ីស្លឹក សត្វកាចែ ឬសត្វដួងស៊ីបណ្តូលដូង ដូច្នេះត្រូវការថែទាំជាប្រចាំដែរ។
ក្រៅពីដាំដូងក្រអូប លោកក៏បានដាំឈើហូបផ្លែ ដាំបន្លែនិងដំណាំរួមផ្សំ ជាច្រើនមុខបន្ថែមនៅតាមចន្លោះដើមដូង ហើយប្រឡាយទឹកក៏មានត្រីស្រែចូលមកច្រើនផងដែរមិនតែប៉ុណ្ណោះគឺគាត់ចិញ្ចឹម សត្វគោ មាន់ ទា រាប់សិបក្បាលថែមទៀតដើម្បីយកលាមកធ្វើជាជីកំប៉ុស្ត៍ធម្មជាតិសម្រាប់ដាក់ដំណាំដូងក្រអូបដែលត្រូវការជីកំប៉ុស្ត៍។
ដូងក្រអូបបច្ចុប្បន្នគឺឈ្មួញនាំចូលពីប្រទេសវៀតណាមលក់នៅលើទីផ្សារក្នុងមួយផ្លែតម្លៃ៣.៥០០រៀល ដូច្នេះនៅឆ្នាំ២០២១ កសិករខាងលើនឹងមានដូងក្រអូបលក់នៅលើទីផ្សារនិងអាចផ្តល់ការងារឲ្យប្រជាពលរដ្ឋធ្វើចំនួន៧នាក់ផងដែរ។
សូមបញ្ជាក់ផងដែរថា ការដាំដូងក្រអូបជាលក្ខណៈគ្រួសារទ្រង់ទ្រាយចំការច្រើនហិកតាបែបនេះពុំមានច្រើនប៉ុន្មាននោះទេនៅលើភូមិសាស្ត្រទឹកដីខេត្តស្វាយរៀងគឺមានដាំត្រឹមកន្លះហិកតាទៅ១ហិកតាប៉ុណ្ណោះ៕ (កែសម្រួលដោយ ៖ ធីតា)
ចែករំលែកព័តមាននេះ