រាជធានីភ្នំពេញ ៖ អគ្គនាយកដ្ឋានគយ និងរដ្ឋករកម្ពុជា បានជម្រាបទៅកាន់លោក លោកស្រី ប្រធានលេខាធិការដ្ឋាន នាយកដា្ឋន សាខា និងការិយាល័យគយនិងរដ្ឋករ…
រាជធានីភ្នំពេញ ៖ អគ្គនាយកដ្ឋានគយ និងរដ្ឋករកម្ពុជា បានជម្រាបទៅកាន់លោក លោកស្រី ប្រធានលេខាធិការដ្ឋាន នាយកដា្ឋន សាខា និងការិយាល័យគយនិងរដ្ឋករ ស្តីពីការពង្រឹងប្រសិទ្ធភាព ក្នុងការគ្រប់គ្រងការនាំចូលផ្លែទុរេនស្រស់ពីថៃ ។
បើតាមលិខិតរបស់ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានជម្រាបមកលោក លោកស្រី ជ្រាបថា ផ្លែទុរេនស្រស់ ដែលមានដើមកំណើតពីប្រទេសថៃ ជាទំនិញហាមឃាត់ដាច់ខាត លើការនាំចូល។ ក្នុងន័យនេះ ដើម្បីចូលរួមទប់ស្កាត់ការនាំចូលដោយខុសច្បាប់ នូវផ្លែទុរេនស្រស់ អគ្គនាយកដ្ឋានគយ និងរដ្ឋាករកម្ពុជា សូមធ្វើការណែនាំដូចខាងក្រោម ៖
ត្រូវតាមដាន និងទប់ស្កាត់ឱ្យបានម៉ឹងម៉ាត់ នូវរាល់ការប៉ុនប៉ងលួចនាំចូលផ្លែទុរេនស្រស់ ដែលមានដើមកំណើតពីប្រទេសថៃ មកកាន់ប្រទេសកម្ពុជា តាមគ្រប់មាត់ច្រកព្រំដែន រាប់បញ្ចូលទាំងច្រករបៀង, កំពង់ផែ, និងការដឹកជញ្ជូនឆ្លងកាត់តាមប្រទេសឡាវ ឬប្រទេសវៀតណាម ផងដែរ ។
ដោយឡែក ចំពោះការនាំចូលផ្លែទុរេនស្រស់ ដែលមានដើមកំណើតពីប្រទេសដទៃ ត្រូវអនុវត្តឱ្យបានខ្ជាប់ខ្ជួន នូវខ្លឹមសារលិខិតលេខ ២១០៧/២៥ អគរ ចុះថ្ងៃទី១៣ ខែឧសភា ឆ្នាំ២០២៥ ជាពិសេស ការតម្រូវឱ្យមានភ្ជាប់មកជាមួយ នូវវិញ្ញាបនបត្រភូតគាមអនាម័យពីប្រទេសនាំចេញ ។
ទទួលបានសេចក្ដីណែនាំនេះ សូមលោក លោកស្រី ចាត់ចែងផ្សព្វផ្សាយ និងអនុវត្តឱ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់ ៕
ចែករំលែកព័តមាននេះ