លោក ឃួង ស្រេង អំពាវនាវឱ្យម្ចាស់បុរី ខុនដូ និងសណ្ឋាគារ សហការលុបបំបាត់បទល្មើស Scams Online ក្នុងរាជធានីភ្នំពេញ
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានសូមឱ្យបងប្អូនជាម្ចាស់ទីតាំង បុរី ខុនដូរ…
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានសូមឱ្យបងប្អូនជាម្ចាស់ទីតាំង បុរី ខុនដូរ អាផាតមិន សណ្ឋាគារ អគារសហកម្មសិទ្ធិ និងលំនៅឋានស្នាក់នៅប្រមូលផ្តុំ ក្នុងភូមិសាស្ត្ររាជធានីភ្នំពេញ ចូលរួមសហការជាមួយអាជ្ញាធរមានសមត្ថកិច្ច ដើម្បីឈានទៅលុបបំបាត់បទល្មើស Scams Online នៅទូទាំងរាជធានីភ្នំពេញ។ បើបទល្មើសទាំងនេះ ត្រូវបានលុបបំបាត់ អ្នកដែលទទួលបានផលប្រយោជន៍ច្រើនជាងគេ គឺបងប្អូននេះហើយ ។
ការលើកឡើងខាងលើនេះរបស់លោក ឃួង ស្រេង បានធ្វើឡើងក្នុងពិធីផ្សព្វផ្សាយច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា និង “អនុក្រឹត្យ លេខ ០៣ អនក្រ.បក របស់រាជរដ្ឋាភិបាលកម្ពុជា ស្តីពីការគ្រប់គ្រងសន្តិសុខ សុវត្ថិភាព តាមទីតាំងរស់នៅប្រមូលផ្តុំ” ទៅដល់ម្ចាស់ទីតាំង បុរី ខុនដូរ អាផាតមិន សណ្ឋាគារ អគារសហកម្មសិទ្ធិ និងលំនៅឋានស្នាក់នៅប្រមូលផ្តុំ ក្នុងភូមិសាស្ត្ររាជធានីភ្នំពេញនានា នៅរសៀលថ្ងៃទី០៧ ខែឧសភា ឆ្នាំ២០២៦នេះ នៅសាលារាជធានីភ្នំពេញ ។
លោក ឃួង ស្រេង បានបន្តថា ក្នុងនាមអាជ្ញាធរដែលជាអាណាព្យាបាលរបស់បងប្អូនប្រជាពលរដ្ឋ តែងការពារ និងគិតគូរពីផលប្រយោជន៍បងប្អូន។ ភ្ញៀវបរទេស ដែលមកស្នាក់នៅកម្ពុជាស្របច្បាប់ មិនបង្ករបទល្មើសផ្សេងៗ យើងស្វាគមន៍ពួកគាត់។ តែបើពួកគាត់មកកម្ពុជា ដើម្បីបង្កបទល្មើស ប្រទេសកម្ពុជាយើងក៏មានច្បាប់ ដើម្បីអនុវត្តទោសទណ្ឌពួកគាត់ដែរ។ យើងត្រូវរួមគ្នា ដើម្បីធ្វើយ៉ាងណាឱ្យប្រទេសកម្ពុជា គ្មានបទល្មើស Scams Online ដើម្បីឱ្យកម្ពុជាសម្រេចបាន នូវចក្ខុវិស័យ ក្លាយជាប្រទេស ដែលមានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០ ។
លោក ឃួង ស្រេង ក៏បានណែនាំឱ្យអាជ្ញាធរខណ្ឌទាំង១៤ បង្កើតគ្រូបតេឡេក្រាមមួយ ជាមួយម្ចាស់ទីតាំង បុរី ខុនដូរ អាផាតមិន សណ្ឋាគារ អគារសហកម្មសិទ្ធិ និងលំនៅឋានស្នាក់នៅប្រមូលផ្តុំ ក្នុងភូមិសាស្ត្ររបស់ខ្លួន ដើម្បីងាយស្រួលទំនាក់ទំនងគ្នា ជាពិសេស គឺអាចផ្តល់ព័ត៌មាន ឬរាយការណ៍ជូនអាជ្ញាធរមូលដ្ឋានអំពីភាព មិនប្រក្រតី ឬបទល្មើស Scams Online បានគ្រប់ពេលវេលា ។
លើសពីនេះទៀត លោកអភិបាលក៏បាន ណែនាំដល់អាជ្ញាធរ និងកងកម្លាំងទាំងអស់ មិនត្រូវពាក់ព័ន្ធ ឬទារលុយកាក់ពីម្ចាស់ទីតាំងដាច់ខាត គឺត្រូវបំពេញការងារ ដោយស្មារតីទទួលខុសត្រូវខ្ពស់ ។
កម្មវិធីផ្សព្វផ្សាយខាងលើ ប្រព្រឹត្តទៅដោយមានការចូលរួមពីសំណាក់តំណាងម្ចាស់ទីតាំង បុរី ខុនដូរ អាផាតមិន សណ្ឋាគារ អគារសហកម្មសិទ្ធិ និងលំនៅឋាន ស្នាក់នៅប្រមូលផ្តុំ ក្នុងភូមិសាស្ត្ររាជធានីភ្នំពេញ ចំនួនជាង៤០០នាក់ ជាមួយនឹងការធ្វើបទបង្ហាញពីសំណាក់លោក ហ៊ុន សុរិទ្ធី អភិបាលរង រាជធានី និងលោកប្រធានការិយាល័យជនបរទេស នៃស្នងការដ្ឋាននគរបាលរាជធានីផងដែរ ។
លោក ហ៊ុន សុរិទ្ធី បានលើកឡើងថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា មាន៩ទំព័រ ៥ជំពូក និង២៤មាត្រា ហើយក្នុងច្បាប់នេះ លោកបានលើកឡើងតែចំនួន៦មាត្រា តែប៉ុណ្ណោះ ដើម្បីពន្យល់បន្ថែមដល់ម្ចាស់ទីតាំង បុរី ខុនដូរ អាផាតមិន សណ្ឋាគារ អគារសហកម្មសិទ្ធិ និងលំនៅឋានស្នាក់នៅប្រមូលផ្តុំឱ្យបានយល់ដឹងបន្ថែម។ ទោះបីជាយ៉ាងណាក្តី អភិបាលរងរូបនេះ បានជម្រុញឱ្យបងប្អូនទាំងអស់ពិនិត្យច្បាប់នេះឱ្យបានលម្អិតល្អន់ ជៀសវាងមានបញ្ហា ឈានទៅមានទោសទណ្ឌ ដោយគិតមកដល់ពេលនេះ កម្លាំងគណៈបញ្ជាការឯកភាពរាជធានីភ្នំពេញ បានបង្ក្រាបបទល្មើស Scams Online នេះបានចំនួន១៤២ទីតាំងហើយ ។
មុននឹង បញ្ចប់ អង្គពិធីបានផ្តល់ឱកាសជូនតំណាងម្ចាស់ទីតាំងដែលចូលរួមអាចលើកឡើងពីចំណាប់អារម្មណ៍ ឬសំណួរ-ចម្ងល់ផ្សេងៗ ហើយ ចម្ងល់ទាំងនោះត្រូវបានធ្វើការបកស្រាយ និងពន្យល់លម្អិតដោយវាគ្មិន ព្រមទាំងការពន្យល់បន្ថែមដោយអភិបាលរាជធានីភ្នំពេញផងដែរ ។
ក្រោយពីបានស្តាប់ការបកស្រាយរួចមក តំណាងម្ចាស់ទីតាំង ដែលបានចូលរួមទាំងអស់មានក្តីសប្បាយរីករាយ ដោយបង្ហាញនូវការប្តេជ្ញាចិត្តចូលរួមគាំទ្រ និងសហការជាមួយអាជ្ញាធរ ក្នុងការទប់ស្កាត់រាល់បទល្មើសនានា ជាពិសេសបទល្មើសឆបោកតាមប្រព័ន្ធបច្ចេកវិទ្យានេះឱ្យបានល្អប្រសើរ ៕
ចែករំលែកព័តមាននេះ