រាជធានីភ្នំពេញ ៖ មកទល់ពេលនេះ កីឡាករ ម៉ឺន មេឃា កាន់តែកសាងកេរ្តិ៍ឈ្មោះខ្ទរខ្ទារនៅក្នុងពិភពប្រដាល់ ជាពិសេសបន្ទាប់ពីកីឡាករវ័យក្មេងរូបនេះ មានឱកាសដណ្ដើមបានខ្សែក្រវាត់ជើងឯកនៅទូរទស្សន៍CNC និងបានចេញប្រកួតតំណាងប្រទេសនៅលើសង្វៀនក្បាច់គុនចម្រុះដែលមានឈ្មោះថា Thai Fight។
ភាពល្បីល្បាញរបស់កីឡាកររូបនេះ អ្នកខ្លះមិនដឹងថា លោកគឺជាកូនប្រុសបង្កើតរបស់លោក អេ ភូថង នោះផង ដោយសារតែលោកបានប្ដូរឈ្មោះដើម និងមិនដាក់ត្រកូលឪពុក ដូចកូនៗផ្សេងទៀតរបស់លោក អេ ភូថង ។ ពាក់ព័ន្ធនឹងបញ្ហានេះ ភរិយារបស់លោក គឺអ្នកស្រី សាំង សុម៉ាលី និងលោកផ្ទាល់បានចេញមុខបញ្ជាក់ពីមូលហេតុ ដែលសម្រេចដាក់ឈ្មោះកូនខុសគេ ធ្វើឱ្យមានការយល់ច្រឡំថា ម៉ឺន មេឃា មិនមែនជាកូនបង្កើតរបស់លោក អេ ភូថង នេះ។
អ្នកស្រី សាំង សុម៉ាលី បញ្ជាក់ថា មនុស្សមិនតិចទេងឿងឆ្ងល់ចំពោះអ្នកស្រី និងគ្រួសារ បន្ទាប់ពីកូនប្រុសរបស់អ្នកស្រី ម៉ឺន មេឃា កាន់តែមានកេរ្តិ៍ឈ្មោះបោះសំឡេងក្នុងស្រទាប់មហាជន ។ អ្នកស្រីថា អ្នកខ្លះប្រកែកគ្នាថា ម៉ឺន មេឃា គ្រាន់តែជាកូនសិស្សរបស់លោក អេ ភូថង និងមិនមែនជាកូនបង្កើតឡើយ ដោយសារតែត្រកូលស្វាមីរបស់អ្នកស្រីក៏ល្បីឈ្មោះដែរនៅក្នុងពិភពប្រដាល់ បើពិតជាកូនបង្កើតមែន គឺពិតជាប្រើត្រកូលអេ ដើម្បីឱ្យកាន់តែមានអ្នកស្គាល់ថែមទៀតទៅហើយ ។
អ្នកស្រីបញ្ជាក់ថា កូនប្រុសទី២នេះ គឺមានឈ្មោះថា អេ វិរៈខាំឈិត ភូថង វ័យ១៨ឆ្នាំ ។ ពេលកូនប្រុសរបស់អ្នកស្រីរូបនេះចូលប្រកួត ក៏អ្នកស្រី និងស្វាមី រក្សាឈ្មោះកំណើតនេះ ដាក់ឱ្យកូនរាល់ពេលប្រកួតនេះផងដែរ ។ អ្នកស្រីថា ឈ្មោះ ម៉ឺន មេឃា នេះ គឺទើបតែបានប្ដូរនៅក្នុងសង្វៀនប្រដាល់នៅប៉ុន្មានឆ្នាំចុងក្រោយនោះទេ ហើយក៏ដូចជាផ្ដល់ហុងស៊ុយឱ្យកូនតែម្ដង ព្រោះតាំងពីដាក់ឈ្មោះនេះមក គឺកូនល្បីតែម្ដងនៅក្នុងពិភពប្រដាល់។
អ្នកស្រីថា ហេតុផលនៃការដាក់ឈ្មោះ ថា ម៉ឺន មេឃា នេះ គឺដោយសារតែលោក តែម ម៉ឺន ប្រធានសហព័ន្ធកីឡាប្រដាល់ ជាអ្នកផ្ចុងផ្ដើមគ្រួសារខ្លួននៅក្នុងស្ថាប័នកងយោធពលខេមរភូមិន្ទ បាននិយាយថា ដាក់ត្រកូលម៉ឺនរបស់លោកម្ដងទៅ ដើម្បីឱ្យពីរោះស្ដាប់បន្តិច ហើយដោយអ្នកស្រី និងស្វាមី ក៏យល់ថា ឈ្មោះដើមរបស់កូនរាងវែង និងពិបាកហៅនៅក្នុងការប្រកួតម្ដងៗផង ទើបសម្រេចយកត្រកូលម៉ឺន ហើយដាក់ឈ្មោះថ្មីឱ្យថា មេឃា តែម្ដង ។
ម្យ៉ាងមកពីអ្នកស្រីចង់សងគុណដល់លោក តែម ម៉ឺន ដែលជាអ្នកមានគុណ និង ជាមេនោះផង ទើបអ្នកស្រីយល់ថា ការដាក់ឈ្មោះកូន ត្រកូលម៉ឺន ហើយស្រាប់តែកូនបានល្បី ដោយមិនល្បីត្រកូលរបស់ប្ដី ក៏អ្នកស្រី និង ស្វាមី មិនដែលគិតដែរ ។ អ្នកស្រីថា បើទោះជាមហាជនភាគច្រើនដែលស្គាល់ម៉ឺន មេឃា អាចមិនចាប់អារម្មណ៍ថា ជាកូនរបស់អ្នកស្រី ប៉ុន្តែសម្រាប់អ្នកក្នុងវិស័យកីឡា គឺមិនមានអ្នកណាមិនដឹងនោះទេ ទើបអ្នកស្រីមិនមានគម្រោងប្ដូរឈ្មោះកូន ពីម៉ឺន មេឃា មកឈ្មោះដើមវិញ។
លោក អេ ភូថង ធ្លាប់បានបញ្ជាក់ថា សប្បាយចិត្តដែលកូនប្រុសទី២បានក្លាយជាអ្នកស្នងតំណែង ហើយបើទោះជាភាពល្បីល្បាញរបស់កូន គឺល្បីដោយប្រើត្រកូលផ្សេង ក៏នៅតែជាមោទនភាពរបស់គ្រួសារលោកនោះដែរ ជាពិសេសនៅពេលដែលលោកយល់ថា ការដាក់ត្រកូលមេ ហើយស្រាប់តែកូនបានល្បី មិនខុសពីដឹងគុណមេ គឺលោក តែម ម៉ឺន ដែលជាអ្នកគួរឱ្យគោរពនៅក្នុងអាជីពរបស់លោកនេះ ។
លោកថា ខ្លួន និងកូនប្រុស ម៉ឺន មេឃា សុទ្ធតែជាទាហាននៅក្នុងវិស័យកីឡាពេញសិទ្ធិរបស់ ខេមរៈភូមិន្ទទាំងអស់ ដោយក្នុងពេលនេះ គឺលោក និងកូនប្រុស គឺសុទ្ធតែជាមន្ត្រីរាជការក្នុងជួរទាហាន ដែលមានលោក តែម ម៉ឺន គឺមេកោយ ។ លោកថា កូនប្រុសរបស់លោក ក៏ជាជម្រើសជាតិនៅក្នុងសហព័ន្ធវ៉ូវីណាម ផងដែរ ដោយក្នុងពេលនេះ កូនប្រុសរបស់លោកកំពុងរៀនថ្នាក់ទី១១នៅវិទ្យាល័យបាក់ទូក ។
លោកបញ្ជាក់ថា ក្រោយពេលរៀនចប់ កូនប្រុសរបស់លោក នឹងកាន់តែសកម្មនៅក្នុងវិស័យប្រដាល់ និងវ៉ូវីណាម។ លោកបន្តថា ថៃនៅតែចង់បាន ម៉ឺន មេឃា ឱ្យហ្វឹកហាត់ក្បាច់គុនចម្រុះនៅក្នុងប្រទេសថៃ ដើម្បីឡើងរេញ Thai Fight ឱ្យបានច្រើន តែលោក និងភរិយាមិនឱ្យទៅទេ ព្រោះបើឱ្យទៅមែន គឺពិតជាត្រូវដើរប្រកួតតែតាមកម្មវិធីរបស់ថៃ ហើយពិបាកមកជួយនៅក្នុងសហព័ន្ធក្នុងស្រុក ។ ម្យ៉ាងលោកមិនចង់ឱ្យកូនខកខានរៀនសូត្រផង ទើបលោកមិនឱ្យកូនទៅ៕
ចែករំលែកព័តមាននេះ