រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កម្លាំងព្រហ្មទណ្ឌកំរិតស្រាលសហការជាមួយនឹងកម្លាំងអន្តរាគមន៍ពិសេសបានធ្វើការឆ្មក់ចូលទៅបង្ក្រាបទីតាំងខារ៉ាអូខេ Go18 មួយកន្លែង ដែលមានមនុស្សប្រុសស្រីចូលទៅប្រើប្រាស់ថ្នាំក្រវីផង និងជួញដូរគ្រឿងញៀនផងចំនួន៩៣នាក់ បង្កឱ្យមានការភ្ញាក់ផ្អើលកាលពីម៉ោង1និង15នាទីរំលងអធ្រាត្រឈានចូលថ្ងៃទី26 ខែសីហា…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កម្លាំងព្រហ្មទណ្ឌកំរិតស្រាលសហការជាមួយនឹងកម្លាំងអន្តរាគមន៍ពិសេសបានធ្វើការឆ្មក់ចូលទៅបង្ក្រាបទីតាំងខារ៉ាអូខេ Go18 មួយកន្លែង ដែលមានមនុស្សប្រុសស្រីចូលទៅប្រើប្រាស់ថ្នាំក្រវីផង និងជួញដូរគ្រឿងញៀនផងចំនួន៩៣នាក់ បង្កឱ្យមានការភ្ញាក់ផ្អើលកាលពីម៉ោង1និង15នាទីរំលងអធ្រាត្រឈានចូលថ្ងៃទី26 ខែសីហា ឆ្នាំ2020 តាមបណ្តោយផ្លូវ206កែងផ្លូវ219 នៅម្តុំផ្សារដេប៉ូ ស្ថិតក្នុងសង្កាត់ផ្សារដេប៉ូ1 ខណ្ឌទួលគោក ។
តាមប្រភពពីសមត្ថកិច្ចបានអោយដឹងថា ដោយមានបទបញ្ជាដោយផ្ទាល់ពីលោកស្នងការ ឧត្តម សថេត ស្នងការនគរបាលរាជធានីភ្នំពេញ បានបញ្ជាអោយកម្លាំងជំនាញគ្រប់ផ្នែក ជាពិសេសលោកវរសេនីយ៍ឯក ប៊ុនសត្យា ប្រធានការិយាល័យព្រហ្មទណ្ឌកំរិតស្រាលអោយធ្វើការស្រាវជ្រាវ ទើបឈានទៅដល់ធ្វើការបង្ក្រាបនៅទីតាំងខារ៉ាអូខេខាងលើ (ដែលជាអតីត ឌឹកព្រីវេ) តែបច្ចុប្បន្នបែរជាបើកមានបង្កប់ទៅដោយកន្លែងប្រើប្រាស់នៃថ្នាំក្រវីទៅវិញ ។
ក្នុងនោះសមត្ថកិច្ចបញ្ជាក់ផងដែរថា ប្រតិបត្តិការខាងលើនេះ បានឃាត់ខ្លួនមនុស្សទាំងអស់ចំនួន៩៣នាក់ ស្រី40នាក់ និងប្រុស53នាក់ ដោយក្នុងនោះមានទាំងខ្មែរ ទាំងចិន រួមទាំងបុគ្គលិកដែលធ្វើការក្នុងខារ៉ាអូខេផងដែរ។ ចំណែកឯរថយន្តវិញមានគ្រប់ប្រភេទចំនួន18គ្រឿង ថ្នាំញៀនជាច្រើនកញ្ចប់ រួមទាំងដបក្រវី និងថ្នាំក្រវីជាច្រើនទៀតផង ។
ប្រភពដដែលបន្តថា ជនសង្ស័យប្រុសស្រីទាំង៩៣នាក់ ដែលត្រូវសមត្ថកិច្ចឃាត់ខ្លួនបានទាំងអស់ខាងលើនេះ ត្រូវបានកម្លាំងជំនាញធ្វើការដឹកបញ្ជូននទៅកាន់ស្នងការរាជធានីភ្នំពេញ ដើម្បីចាត់ការទៅតាមនីតិវិធីផ្លូវច្បាប់ហើយ។
គួរបញ្ជាក់ថា ទីតាំងខារ៉ាអូខេខាងលើនេះធ្លាប់ត្រូវបានសមត្ថកិច្ចចុះបិទម្តងរួចមកហើយ ព្រោះតែមិនស្តាប់តាមការណែនាំរបស់រាជរដ្ឋាភិបាល ដែលបានឱ្យម្ចាស់ទីតាំងធ្វើកិច្ចសន្យាផ្លាស់ប្តូរពីខារ៉ាអូខេទៅជាភោជនីយដ្ឋានវិញ ហើយម្ចាស់ទីតាំងក៏បានសុំច្បាប់កែប្រែពីខារ៉ាអូខេទៅបើកជាភោជនីយដ្ឋាន Go18 ប៉ុន្តែស្រាប់តែលើកនេះ នៅតែបើកខារ៉ាអូខេដដែល ថែមទាំងមានការជួញដូរគ្រឿងញៀនជាច្រើនកញ្ចប់ និងប្រើប្រាស់ថ្នាំក្រវីទៀតផង៕
ចែករំលែកព័តមាននេះ