សហរដ្ឋអាមេរិក ៖ អភិបាលរដ្ឋវីស្កុនស៊ីន កាលពីថៃ្ងទី២៤សីហាបានបញ្ជាឲ្យដាក់ពង្រាយកងកម្លាំងឆ្មាំជាតិ នៅទីក្រុងកេណូសា ខណៈការប៉ះទង្គិចគ្នានានា កើតមានរវាងកងកម្លាំងប៉ូលិសនិងពួកបាតុករ ២យប់ជាប់ៗគ្នារួចមកហើយ បន្ទាប់ពីប៉ូលិសបានបាញ់ប្រហារជាច្រើនគ្រាប់សំដៅខ្នងបុរសស្បែកខ្មៅម្នាក់កាលពីថ្ងៃទី២៣សីហាមក។
ពេលប្រកាសពីការដាក់ពង្រាយកងឆ្មាំជាតិនោះអភិបាលរដ្ឋវីស្កុនសីុនលោកTONY EVERS បានបរិហារចំពោះអ្វីដែលលោកហៅថា ការប្រើកម្លាំងជ្រុលហួសហេតុ ក្នុងពេលបាញ់ប្រហារនោះហើយអំពាវនាវ ឲ្យបើកកិច្ចប្រជុំវិសាមញ្ញមួយរបស់សភា សំដៅធ្វើការកែទម្រង់កងកម្លាំងប៉ូលិស។
ប្រមាណជា១ម៉ោងបន្ទាប់ពីនោះ អភិបាលក្រុងកេណូសាស្ថិតនៅមាត់ទន្លេមីជីហ្គេន ចម្ងាយ៦៥គីឡូម៉ែត្រពីទីក្រុងMILWAUKEE បានប្រឈមមុខជាមួយបាតុករច្រើនសឹបនាក់ ដែលទាមទារឲ្យចាប់ខ្លួនបណ្ដាប៉ូលិសដែលចូលរួមក្នុងការបាញ់ប្រហារនោះ។
បាតុករមួយចំនួនប៉ុនប៉៉ងលុកចូលក្នុងអគារសាលាក្រុង ហើយអភិបាលក្រុងលោកJOHN ANTARAMIAN បានរត់គេចខ្លួន ប្រឈមមុខនឹងបាតុករដែលពោរពេញដោយកំហឹង។ ពេលរាត្រីកាលចូលមកដល់ ពួកបាតុករបានបំពានបម្រាមគោចរណ៍ហើយលើកគ្នាទៅប្រមូលផ្ដុំ នៅមុខតុលាការដោយស្រែកពីកំហឹងឈឺចាប់របស់ពួកគេ ហើយគប់ដបទឹកដាក់ប៉ូលិសដែលតបតវិញដោយបាញ់ឧស្ម័នបង្ហូរទឹកភ្នែក។
ឆាកនៃការបាញ់ប្រហារកាលពីថ្ងៃទិ២៣សីហានោះ ត្រូវបានថតដោយអ្នកដើរម្នាក់ ជាមួយទូរស័ព្ទដៃរបស់គេ។ លើកនេះបណ្ដារូបភាព បង្ហាញបុរសស្បែកខ្មៅអាយុ២៩ឆ្នាំលោកJACOB BLAKEត្រូវពួកប៉ូលិសស្បែកសព័ទ្ធចាប់ដោយភ្ចុងកាំភ្លើងលើគេ។
បុរសនោះមិនព្រមធ្វើតាមបញ្ជាប៉ូលិស ហើយប៉ុនប៉ងឡើងលើរថយន្តរបស់គេ។ ពេលគេបើកទ្វាររថយន្តបំរុងឡើងជិះ ប៉ូលិសម្នាក់បាញ់លើគេចំខ្នងដល់ទៅ៧គ្រាប់។ កូនរបស់បុរសនោះ៣នាក់បានឃើញឪពុកគេដួល។ កូនគេទាំង៣នាក់នោះជិះនៅផ្នែកខាងក្រោយនៃរថយន្ត។ បុរសនោះត្រូវបានបញ្ជូនតាមឧទ្ធម្ភាគចក្រហើយស្ថានភាពគេពិតជាធ្ងន់ធ្ងរក្នុងមន្ទីរពេទ្យ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ