ខេត្តពោធិ៍សាត់ ៖ ក្នុងឱកាសដែលរាជរដ្ឋាភិបាលឲ្យឈប់សម្រាកចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ដើម្បីសងថ្ងៃបុណ្យចូលឆ្នាំថ្មីប្រពៃណីជាតិ ដែលខកខានដោយសារតែជំងឺកូវីដ១៩ អុកឡុកកន្លងមកនេះ គេសង្កេតឃើញថា…
ខេត្តពោធិ៍សាត់ ៖ ក្នុងឱកាសដែលរាជរដ្ឋាភិបាលឲ្យឈប់សម្រាកចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ដើម្បីសងថ្ងៃបុណ្យចូលឆ្នាំថ្មីប្រពៃណីជាតិ ដែលខកខានដោយសារតែជំងឺកូវីដ១៩ អុកឡុកកន្លងមកនេះ គេសង្កេតឃើញថា មន្ត្រីរាជការ ក៏ដូចប្រជាពលរដ្ឋមកពីគ្រប់ទិសទី បានចូលមកលេងកំសាន្ដនៅតាមរមណីយដ្ឋាននានាក្នុងទឹកដីខេត្តពោធិ៍សាត់ គួរឲ្យកត់សម្គាល់ ទាំងរមណីយដ្ឋានធម្មជាតិ រមណីយដ្ឋានវប្បធម៌ប្រវត្តិសាស្ត្រ និងរមណីយដ្ឋានកែច្នៃជាដើម។ចំណែកសណ្ឋាគារ និងផ្ទះសំណាក់ពេញស្ទើរតែទាំងអស់។
ភ្ញៀវទេសចរណ៍មកពីរាជធានីភ្នំពេញ និងតាមបណ្ដាខេត្តនានា ពេលមកលេងខេត្តពោធិ៍សាត់ ប្រាកដជាដាក់ចិត្តមុនគេ គឺសំដៅទៅមើលទេសភាពភ្នំ១៥០០ ស្រុកវាលវែង ជាក់ជាមិនខាន ព្រោះភ្នំ១៥០០បានល្បីរន្ទឺពេញផ្ទៃប្រទេស បន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រសិទ្ធនាមថា (ជាផ្លូវបុប្ផាលាក់ខ្លួន, សំណាងថ្មដា វាសនាវាលវែង។ ហើយរឹតតែបន្តសុសសាយទៀតនោះ គឺតាមរយៈបណ្ដាញសង្គមហ្វេសប៊ុកដែលតែងតែបង្ហោះរូបភាពផ្លូវក្រវិចក្រវៀនដូចអន្ទង់អាំង និងទេសភាពព្រៃភ្នំ ដែលមើលទៅគួរឲ្យទាក់ទាញបំផុត។
លោក សំ ឃីម ប្រធានមន្ទីរទេសចរណ៍ខេត្តពោធិ៍សាត់ បានឲ្យដឹងថា រមណីយដ្ឋានក្នុងខេត្តពោធិ៍សាត់សរុបមានចំនួន៣៤កន្លែង ភ្ញៀវទេសចរណ៍បានទៅលេងកំសាន្ដស្ទើរតែគ្រប់កន្លែង ប៉ុន្តែរមណីយដ្ឋានធម្មជាតិទឹកធ្លាក់ច្រកល្អៀង គឺជារមណីយដ្ឋានមួយឈានមុខគេ ក្នុងចំណោមរមណីយដ្ឋានទាំងអស់។ មានចំងាយប្រមាណ៧៤គមពីទីរួមខេត្ត និង៤១គមពីផ្សារសាមគ្គីក្រគរ។ មានទីតាំងស្ថិតក្នុងភូមិបំណក់ ឃុំឈើតុំ ស្រុកក្រគរ ដោយធ្វើដំណើរតាមផ្លូវកៅស៊ូយ៉ាងរលោងស្រិល ពីចំណុចផ្លូវជាតិលេខ៥ រហូតដល់ផ្សារបំណក់ នៅសល់ប្រមាណតែ០៧គីឡូម៉ែត្រទៀតប៉ុណ្ណោះជាផ្លូវក្រួសក្រហម ។
ក្នុងថ្ងៃឈប់សម្រាកសងបុណ្យចូលឆ្នាំថ្មីនេះ ភ្ញៀវទេសចរណ៍បានសម្រុកទៅលេងកំសាន្ដនៅទីនោះយ៉ាងច្រើនកុះករ ហើយយើងបានតម្រូវឲ្យភ្ញៀវទេសចរណ៍ពាក់ម៉ាស់ លាងដៃនឹងអាល់កុលជាមុនសិន ដើម្បីការពារជំងឺកូវីដ១៩ទាំងអស់គ្នា។ រមណីយដ្ឋានធម្មជាតិទឹកធ្លាក់ច្រកល្អៀង មានចំណតរថយន្ដធំទូលាយ មានទីធ្លាលាតសន្ធឹងតាមល្បាក់ជ្រោះវែងអន្លាយបង្កលក្ខណៈឲ្យភ្ញៀវទេសចរណ៍ទៅលេងបានច្រើន ហើយទឹកជ្រោះមានទាំងប្រាំងនិងវស្សា។
កន្លងមក ភ្ញៀវទេសចរណ៍ទៅលេងរមណីយដ្ឋានធម្មជាតិទឹកធ្លាក់ច្រកល្អៀងនេះជារៀងរាល់ថ្ងៃ ពិសេសថ្ងៃសៅរ៍ និងថ្ងៃអាទិត្យ ហើយបើថ្ងៃចូលឆ្នាំខ្មែរ ចូលឆ្នាំចិន និងបុណ្យភ្ជុំបិណ្ឌវិញ គឺមនុស្សច្រើនណាស់មកពីគ្រប់ទីកន្លែង មានទាំងភ្ញៀវបរទេសទៀតផង។ ភ្ញៀវទេសចរណ៍ទៅទីនោះនឹងបានងូតទឹកជ្រោះធ្លាក់ពីលើភ្នំថ្លាយង់ត្រជាក់ដូចទឹកអម្រឹត មានផ្ទាំងថ្មតូចធំដូចក្បាច់ចំលាក់, មានដើមឈើជាម្លប់ដ៏ត្រឈឹងត្រឈៃសំរាប់ភ្ញៀវទេសចរណ៍ជ្រកកោន និងទទួលទានអាហារ។
នៅទីនោះមានលក់ម្ហូបអាហារឆ្ងាញ់ៗដូចជាមាន់ដុត ប្រហុកអាំង ត្រីអាំង…ជាដើម ដោយតម្លៃសមរម្យ និងមានអនាម័យ។ យើងរៀបចំកន្លែងលក់ដូរយ៉ាងមានរបៀបរៀបរយ កសាងជណ្ដើរចុះ ស្ពានឆ្លងពីម្ខាងទៅម្ខាង បន្ទប់ទឹក ធុងសម្រាម ដាក់ស្លាកសញ្ញា រៀបជារោង ជារាន និងខ្យូសសម្រាប់ភ្ញៀវអង្គុយលេង និងធានាសុវត្ថិភាពទៀតផង។
មណីយដ្ឋានទឹកធ្លាក់ច្រកល្អៀងមាន៨ដំណាក់ គឺដំណាក់យាយចំអន់តា ដំណាក់ទឹកឈូរ ដំណាក់មនោរម្យ ដំណាក់ថ្មសណ្ដូន ដំណាក់ព្រះ ដំណាក់ជ្រៃក្រឹម ដំណាក់សុបិន្ត និង ដំណាក់ទឹកធ្លាក់។ ភ្ញៀវដែលទៅលេងកំសាន្តគិតត្រឹមមនុស្សពេញវ័យឡើងទៅម្នាក់១.០០០រៀល ថ្លៃផ្ញើម៉ូតូ២.០០០រៀល និងរថយន្តពី៥.០០០ទៅ១០.០០០រៀល។ មិនអនុញ្ញាតឲ្យភ្ញៀវយកភេសជ្ជៈប្រភេទដបចូលទៅទេ និងបានណែនាំឲ្យទុកដាក់កាកសំណល់នៅក្នុងធុងសំរាមឲ្យបានត្រឹមត្រូវចៀសវាងបោះចូលក្នុងទឹកនាំឲ្យខូចអនាម័យនិងប៉ះពាល់បរិស្ថាន។
លោកប្រធានមន្ទីរបានសំណូមពរដល់ភ្ញៀវទេសចរណ៍ដែលមកលេងកំសាន្ដនៅរមណីយដ្ឋានធម្មជាតិទឹកធ្លាក់ច្រកល្អៀងក៏ដូចតាមរមណីយដ្ឋាននានា មេត្តាចូលរួមថែរក្សាអនាម័យបរិស្ថានឲ្យបានល្អ, ទុកដាក់កាកសំណល់ឲ្យបានត្រឹមត្រូវក្នុងធុងសម្រាម, ត្រូវចេះការពារជំងឺកូវីដ១៩រៀងៗខ្លួន និងសូមចូលរួមគោរពច្បាប់ចរាចរណ៍ទាំងអស់គ្នាក្នុងការបើកបរ។
ភ្ញៀវទេសចរណ៍ដែលបានទៅលេងកំសាន្ដនៅទីនោះបានវាយតំលៃថា រមណីយដ្ឋានទឹកធ្លាក់ច្រកល្អៀងស្រុកក្រគរខេត្តពោធិ៍សាត់នេះ មានលក្ខណៈនិងសក្ដានុពលល្អជាងរមណីយដ្ឋាននានាក្នុងប្រទេសកម្ពុជា។ ជារមណីយដ្ឋានធម្មជាតិមានទឹកធ្លាក់ខួបប្រាំង ខួបវស្សាមិនដែលដាច់សោះឡើយ បង្កលក្ខណៈងាយស្រួលឲ្យបងប្អូនភ្ញៀវទេសចរមកងូតទឹកលេងកំសាន្តបានគ្រប់ពេលវេលា។ ដោយសារផ្លូវធ្វើដំណើរស្រួល ធ្វើឲ្យភ្ញៀវទេសចរណ៍ក្នុងខេត្ត ក្រៅខេត្ត មកពីភ្នំពេញ និងភ្ញៀវទេសចរណ៍បរទេសមួយចំនួន បានទៅលេងកំសាន្ដនៅទីនោះច្រើនមែនទែន ដែលធ្វើឲ្យជីវភាពប្រជាពលរដ្ឋនៅផ្សារបំណក់ ឃុំឈើតុំ ស្រុកក្រគរនោះ មានការប្រែប្រួលគួរឲ្យកត់សម្គាល់ពីមួយឆ្នាំទៅមួយឆ្នាំ។
លោកឲ្យដឹងថា ក្នុងឱកាសថ្ងៃឈប់សម្រាកសងចូលឆ្នាំរយៈពេល០៥ថ្ងៃនេះ ភ្ញៀវទេសចរណ៍មកលេងខេត្តពោធិ៍សាត់សរុបមានចំនួន ៥៩.៤០២នាក់ ក្នុងនោះភ្ញៀវអន្ដរជាតិ៣៤នាក់ សុវត្ថិភាពទាំងស្រុង ពុំមានគ្រោះថ្នាក់អ្វីកើតឡើងនោះទេ ទាំងនៅកន្លែងលេង ទាំងការធ្វើដំណើរទៅមក៕
ចែករំលែកព័តមាននេះ