រាជធានីភ្នំពេញ ៖ ដើម្បីឆ្លើយតបទៅនឹងការកុំម៉ង់ក៏ដូចជាត្រៀមខ្លួនលក់អំណោយជាកាដូសម្រាប់ជូនទៅបងប្អូន ឬជូនទៅមនុស្សជាទីគោរពក្នុងឱកាសបុណ្យចូលឆ្នាំថ្មីប្រពៃណីចិន គេសង្កេតឃើញហាងលក់
រាជធានីភ្នំពេញ ៖ ដើម្បីឆ្លើយតបទៅនឹងការកុំម៉ង់ក៏ដូចជាត្រៀមខ្លួនលក់អំណោយជាកាដូសម្រាប់ជូនទៅបងប្អូន ឬជូនទៅមនុស្សជាទីគោរពក្នុងឱកាសបុណ្យចូលឆ្នាំថ្មីប្រពៃណីចិន គេសង្កេតឃើញហាងលក់អំណោយកាដូមួយចំនួននៅរាជធានីភ្នំពេញបានត្រៀមខ្លួនជាស្រេចក្នុងការវេចខ្ចប់កាដូសម្រាប់លក់ជូនអតិថិជនដែលក្នុងអំណោយកាដូនោះ មានស្រាល្អ ភេសជ្ជៈ និងនំជាច្រើនមុខផ្សេងទៀត ។
លោក ពេជ្រ សេរី បុគ្គលិកផ្នែកគណនេយ្យប្រចាំហាងផ្លែឈើស្រីមុំ ស្ថិតនៅតាមបណ្តោយមហាវិថីព្រះសីហនុ បានឲ្យដឹងថា នៅឆ្នាំនេះសម្រាប់ហាងផ្លែឈើស្រីមុំ មានគម្រោងវេចខ្ចប់អំណោយកាដូលក់ជូនអតិថិជនសរុបជាង៣ពាន់កាដូ ដើម្បីឆ្លើយតបទៅនឹងតម្រូវការរបស់អតិថិជន ហើយចំនួននេះបើប្រៀបធៀបទៅឆ្នាំមុន យើងបានរៀបចំកាដូបានប្រមាណ២ពាន់កាដូ ។ លោកបន្តថា ក្នុងអំណោយកាដូជាង៣ពាន់នេះ យើងបែងចែកជាពីរប្រភេទ ដែលប្រភេទទី១ យើងវេចខ្ចប់ដាក់ក្នុងកាដូនូវស្រាវីស្គី ភេសជ្ជៈរួមនឹងនំផ្សេងជាច្រើនមុខទៀត។ ចំណែកប្រភេទកាដូទី២ យើងរៀបចំដាក់ភេសជ្ជៈមានដូចជាទឹកត្រចៀកកាំ និងនំប៉ុណ្ណោះ សម្រាប់យកជូនមនុស្សចាស់ដើម្បីបំប៉នសុខភាព។ លោកថា ចំពោះកាដូទាំងពីរប្រភេទនេះសម្រាប់កាដូទី១ គឺយើងទទួលបានការកក់មុនពីខាងក្រុមហ៊ុនមានចំនួនច្រើន រីឯតម្លៃមានចាប់ពី២៥ដុល្លារដល់៦០ដុល្លារក្នុងមួយកាដូ ឬលើសពីនេះទៅតាមការកំុម៉ង់របស់អតិថិជនជាក់ស្តែង ។
លោកបន្ថែមថា ក្រៅពីកាដូទាំងពីរប្រភេទខាងលើនេះ ហាងផ្លែឈើស្រីមុំនៅទទួលការកុំម៉ង់ពីខាងក្រុមហ៊ុនផ្សេងៗនូវផ្លែក្រូចឃ្វិចជាង២០០កេសបន្ថែមទៀត សម្រាប់ឱកាសបុណ្យចូលឆ្នាំថ្មីប្រពៃណីចិននេះផងដែរ ។
អ្នកស្រី ម៉េង លីដា ម្ចាស់ហាងវ៉ី ថរី លក់ភេសជ្ជៈ និងកាដូមានទីតាំងស្ថិតនៅតាមបណ្តោយមហាវិថីព្រះមុនីវង្ស បានឲ្យដឹងថា មុនចូលឆ្នាំថ្មីឆ្នាំនេះ ហាងអ្នកស្រីបានរៀបចំគំរូកាដូជាង១០០កាដូ ដែលក្នុងនោះ មានអំណោយកាដូជាស្រា និងកាដូជាភេសជ្ជៈ ដែលមានតម្លៃចាប់ពី១៥ដុល្លារទៅ៥០០ដុល្លារ ក្នុងមួយកាដូ ។
អ្នកស្រីបន្តថា នៅឆ្នាំនេះការលក់អំណោយកាដូសម្រាប់ហាងអ្នកស្រីរំពឹងថា អាចលក់បានប្រហែល២០០ទៅ៣០០កាដូដូចឆ្នាំមុនដែរ ព្រោះតែមុខរបរនេះបច្ចុប្បន្នមានការប្រកួតប្រជែងគ្នាទាំងតម្លៃ និងគុណភាព ហើយម្យ៉ាងទៀត នៅជិតហាងអ្នកស្រី គឺមានគេរៀបចំលក់កាដូដូចជាហាងអ្នកស្រីមានចំនួនច្រើនដែរ៕
ចែករំលែកព័តមាននេះ