រាជធានីភ្នំពេញ ៖ តារាចម្រៀង ហេង ពិទូ ដែលមួយរយៈពេលចុងក្រោយនេះហាក់ស្ងប់ស្ងាត់ជាមួយនឹងការងារសិល្បៈ ស្រាប់តែបង្ហោះសារប៉ុន្មានប្រយោគរៀបរាប់អំពីបែបផែនជីវិតមនុស្សថា ត្រូវចេះស្រលាញ់ជីវិតសាមញ្ញ ព្រោះបើសិនជាជីវិតមានអំណាចពិតជាក្តីសុខមែននោះ មិនមែនអ្នកមាន និងអ្នកមានអំណាចខ្លះត្រូវមានអ្នកការពារនោះទេ ។
លោក ហេង ពិទូ តារាចម្រៀងដែលបានខំប្រឹងបញ្ចេញសមត្ថភាពនៃការនិពន្ធបទថ្មីនេះ អស់ជាច្រើនឆ្នាំ ទម្រាំមានការទទួលស្គាល់ស្នាដៃក្នុងវិថីសិល្បៈ បានបង្ហោះសារដែលចាក់ចោទចំបេះដូងអ្នកគាំទ្រ ដោយលោកបានធ្វើការប្រៀបធៀបជីវិតរបស់មនុស្សម្នាក់ៗដែលហាក់មិនចេះស្កប់ស្កល់នឹងអ្វីដែលខ្លួនមាន ។
លោកបានសរសេរសារបង្កប់ខ្លឹមសារអប់រំយ៉ាងដូច្នេះថា ពេលខ្លះ អ្នកមិនពេញចិត្តនឹងបែបផែនជីវិតរបស់អ្នក ខណៈដែលមនុស្សជាច្រើនក្នុងលោកកំពុងស្រមៃចង់បានជីវិតដូចជាអ្នក… ។ ក្មេងរត់លេងតាមវាលស្រែឃើញយន្តហោះនៅលើ មេឃ ក៏ស្រមៃចង់ហោះហើរ ប៉ុន្តែអ្នកបើកបរយន្តហោះ ឃើញផ្ទះកសិករ ក៏ស្រមៃចង់វិលត្រឡប់មកផ្ទះវិញ» ។
លោកបានបន្ថែមទៀតថា «ជីវិតគឺបែបនេះឯង! សូមរីករាយនឹងបែបផែនជីវិតរបស់អ្នក! ប្រសិនបើទ្រព្យសម្បត្តិជាកូនសោរទៅរកសុភមង្គល នោះអញ្ចឹងប្រហែលអ្នកមាននាំគ្នារាំសប្បាយតាមដងផ្លូវទៅហើយ ។ ប៉ុន្តែ តាមពិតមានតែក្មេងៗក្រីក្រទេដែលនាំគ្នាធ្វើបែបនោះ» ។
លោក ហេង ពិទូ ក៏បានបន្តថា «ប្រសិនបើមានអំណាចពិតជាមានសន្តិសុខមែននោះ ប្រហែលជាមន្ត្រីធំៗនាំគ្នាទៅណាមកណាដោយគ្មានអ្នកការពារទៅហើយ ។ តាមពិត មានតែអ្នករស់នៅដោយសាមញ្ញទេ ដែលគេងបានលក់ស្រួលនោះ ។ ប្រសិនបើសម្រស់ និងកេរ្តិ៍ឈ្មោះសុទ្ធតែនាំមកទំនាក់ទំនងដ៏ល្អឥតខ្ចោះនោះ តារាល្បីឈ្មោះទាំងឡាយ ប្រហែលជាមានជីវិតអាពាហ៍ពិពាហ៍ដ៏ល្អប្រសើរទៅហើយ ។
សូមអ្នករស់នៅដោយភាពសាមញ្ញ ធ្វើដំណើរទៅណាមកណាដោយភាពដាក់ខ្លួន ស្រឡាញ់ដោយក្តីបរិសុទ្ធ នោះអ្វីៗដែលល្អនឹងកើតមានចំពោះលោកអ្នកមិនខាន !» ៕
ចែករំលែកព័តមាននេះ