រាជធានីភ្នំពេញ ៖ បើទោះជាក្លិបហាត់ប្រាណដំណើរការឡើងវិញ ក៏អ្នកហាត់ប្រាណនាពេលបច្ចុប្បន្ននៅតែមានការញញើតខុសពីមុន ដោយពួកគេភាគច្រើនបានងាកមកហាត់ប្រាណដោយជិះកង់វិញ ។ អ្នកទាំងនោះបានទាំងចាត់ទុកថា ការជិះកង់ជាមធ្យោបាយសុវត្ថិភាពនៅក្នុងអំឡុងពេលកូវីដ-១៩ រាតត្បាត និងជាការធ្វើឱ្យស្រឡះខួរក្បាល ព្រោះតែមិនស្មុគដូចការបញ្ចេញញើសនៅក្នុងក្លិបនោះផង។
ការប្រែប្រួលនេះ គឺស្របនឹងការពន្យល់របស់អ្នកជំនាញសុខភាព គ្រូពេទ្យកីឡា និងគ្រូពេទ្យ ផ្នែកឆ្អឹង ដែលសុទ្ធតែចាត់ទុកថា ការជិះកង់នៅក្នុងបរិយាកាសធម្មជាតិ ជាឱសថមិនចេះរីង
ស្ងួតសម្រាប់សុខភាពនោះផង។
យោងតាមការពន្យល់របស់អ្នកជំនាញសុខភាពកន្លងមក អ្នកដែលសម្រេចចិត្តជិះកង់ គឺជា អ្នកដែលចេះថែសុខភាពខ្លួនឯង ។ មិនថាការធាក់កង់បែបបុរាណ កង់អាគុយ ឬកង់ កីឡាធាក់ក្នុងផ្ទះទេ គុណប្រយោជន៍ នៃការធាក់កង់ចំពោះសុខភាព មិនមែនជាអ្វីដែលត្រូវ ប្រឹងវែកញែកទេ ។ ទាំងអ្នកវិទ្យាសាស្ត្រ ក៏បានបញ្ជាក់យ៉ាងច្រើនផងដែរពាក់ព័ន្ធនឹងអត្ថប្រយោជន៍ដែលទទួលបានពីការធាក់កង់ ។
អ្នកជំនាញសុខភាពថា ធាក់កង់ក្នុងផ្ទះ(កង់កីឡា)មិនចេះដួល គ្មានគ្រោះថ្នាក់ចរាចរណ៍ តែមិនបានស្រូបខ្យល់អាកាសធម្មជាតិ និងត្រូវកម្តៅថ្ងៃ ។ ឯកង់អាគុយផ្តល់គុណប្រយោជន៍ ដល់សុខភាពដូចកង់បូរាណដែរ តែជាការជួយលើកទឹកចិត្តមនុស្សឱ្យជិះកង់បានឆ្ងាយនិងបានយូរ ។
ដូច្នេះហើយទើបបានជាការធាក់កង់់ ឬជិះកង់កម្សាន្តត្រូវបានគេចាត់ទុកថាគឺជាកីឡាសុខភាពដ៏មានប្រយោជន៍ដល់មនុស្សគ្រប់ រូបមិនថានៅក្រុងឬនៅស្រែ ក្មេង ចាស់ ប្រុស ស្រី ធាត់ ស្គម ទេ ។ កីឡានេះ គឺអាចធ្វើបានទាំងអស់គ្នា ដែលខុសពីការហាត់ប្រាណផ្សេងៗដែលត្រូវការកម្លាំង និងការព្យាយាមខ្លាំងនោះ។ តែកីឡានេះ សម្រាប់មនុស្សធាត់លើសទម្ងន់ គឺមិនគួរប្រតិបត្តិឡើយ ព្រោះខ្លាចមាន បញ្ហានៅ កជើង នៅជង្គង់ ឬនៅខ្នង ។
មនុស្សចាស់ជរា ពិបាកដើរក៏អាចធាក់កង់បានយ៉ាងស្រួល ដើម្បីជួយសម្រួលសន្លាក់ជើង និងត្រគាក ធ្វើចលនាដោយគ្មានការរំខាន ។ ជិះកង់ជាការបង្រៀនបេះដូងឱ្យចេះសម្របចង្វាក់ ស៊ូខ្លាំងនៅពេលប្រឹងលោតយឺតៗវិញនៅពេល សម្រាក ។ ការចេះសម្របនេះជួយយើងឱ្យកម្ចាត់ស្រេ្តសបាន ។
លើកលែងតែយកការជិះកង់ធ្វើជាកីឡាអាជីព ការជិះកង់កម្សាន្ត ឬជា មធ្យោបាយធ្វើដំណើរគ្មានជាប់បម្រាមឬ ហាមឃាត់ អ្វីជាពិសេសឡើយ ។ ប៉ុន្តែប្រសិនបើអ្នកមានអាយុចាប់ពី៤០ឆ្នាំឡើងហើយ ទើបចង់ផ្តើម ជិះកង់ សូមជួបពិគ្រោះជាមួយគ្រូពេទ្យ គ្រួសារ ឬអ្នកជំនាញបេះដូងសិន ឬក៏ត្រូវចាប់ផ្តើមដោយ សន្សឹមៗបំផុត និងបន្តិចម្តងៗ ក្នុងរយៈពេល មួយខែដំបូងសិន ។ បើចំពោះអ្នកដែលធ្លាប់ជិះ ជាប្រចាំ តែអាយុលើសពី៤៥ឆ្នាំឡើងទៅ ក៏គួរ តែទៅពិនិត្យកម្លាំងបេះដូងជារៀងរាល់ឆ្នាំម្តងដែរ ដើម្បីជៀសវាងផលប៉ះពាល់។
អ្នកជំនាញសុខភាពបានពន្យល់ដដែលជាដដែលថា ការជិះកង់តែងនាំមកនូវគុណប្រយោជន៍ដ៏ចំបាច់ចំពោះសុខភាព ទាំងផ្នែករាងកាយ និងផ្លូវចិត្ត ។ បុគ្គលណាដែលបានអនុវត្ត ការជិះកង់ជាប្រចាំ រមែងមានរូបរាងកាយក្មេង ជាងអាយុ១០ឆ្នាំ ព្រោះតួនាទីរបស់បេះដូង និង សាច់ដុំ នឹងមានភាពប្រសើរមុនគេ ដោយសារតែចលនាធាក់កង់ ។ សកម្មភាពប្រឹងធាក់កង់រយៈពេលវែង នឹងក្លាយជាការកាត់បន្ថយគ្រោះហានិភ័យទាំងឡាយដែលនាំឱ្យមានរោគសរសៃឈាមបេះដូង ដូចជាធាត់ជ្រុល ខ្លាញ់ក្នុងឈាម កូឡេស្តេរ៉ូល លើសឈាម និងស្ត្រេស ។
ជិះកង់ក៏ត្រូវគេចាត់ទុកជាឱសថព្យាបាលរោគមួយចំនួន ជាក់ស្ដែងធាក់កង់ គឺជាថ្នាំបញ្ចុះទម្ងន់ ដែលគ្រូពេទ្យបារាំងបានកំណត់ឱ្យអនុវត្តពីរឬបីដងក្នុង១សប្តាហ៍រយៈពេលពីរម៉ោង ដោយត្រូវធាក់ក្នុងល្បឿនល្មមៗ ហើយបើអ្នកធាត់លើសទម្ងន់ អាចសម្រកខ្លាញ់បាន ដោយគ្មានប៉ះទង្គិច ដល់សរីរាង្គណាមួយដូចប្រឹងធ្វើកីឡារត់នោះទេ។
អ្នកជំនាញសុខភាពបន្តថា ការធាក់កង់គឺមានប្រយោជន៍ធ្វើឱ្យអត្រាកូឡេស្តេរ៉ូល នីទ្រីក្លីសេរីដ និងសម្ពាធឈាមធ្លាក់ចុះ ។ នៅពេលយើងប្រឹង ធាក់កង់ ខ្លួនប្រាណនឹងទៅស្រូបយកថាមពល ដែលស្តុកទុកក្នុងទម្រង់ជាជាតិស្ករ ហេតុដូច្នេះ ហើយបានជាកីឡាជិះកង់ ត្រូវបានគេចាត់ទុក ជាទម្រង់ នៃការព្យាបាលជំងឺទឹកនោមផ្អែម ។ ធាក់កង់៣០នាទីក្នុងមួយថ្ងៃ ដោយមិនបាច់ ប្រឹង ត្រូវខ្យល់ ត្រូវពន្លឺអុលត្រាវីយូឡេ ជួយ ពង្រឹងកោសិកាឆ្អឹង ជួយសម្រួលចរន្តឈាម បង្កើនកម្លាំងឱ្យសាច់ដុំ សម្រួលលំនឹង សម្របសម្រួលសរីរាង្គឱ្យបានទន់ភ្លន់ ជួយឱ្យយើង ធន់នឹងភាពនឿយហត់ សម្រួលដំណេក និងពង្រឹងប្រព័ន្ធការពារខ្លួន ។
តួលេខពីអ្នកជំនាញបង្ហាញថា ការធាក់កង់អាចកាត់បន្ថយជំងឺសរសៃឈាមកូរ៉ូណែបាន៣០% ជំងឺសរសៃឈាមក្នុងខួរក្បាល បាន២៤% ជំងឺទឹកនោម ផ្អែមប្រភេទទីពីរ បានជិត២០% ជំងឺមហារីក ដោះ ជិត១៥% និងជំងឺមហារីកពោះវៀនធំ បានជិត៤០% ។ ក្នុងនោះដែរ ការសិក្សារបស់ វិទ្យាស្ថានស្ថិតិបារាំង កាលពីឆ្នាំ២០១៧ ដែលបានចេញផ្សាយ និងត្រូវបានចែកចាយ ក៏បាន បង្ហាញថា បុគ្គលិកក្រុមហ៊ុនដែលជិះកង់មកការិយាល័យធ្វើការ មានសុខភាពល្អជាងអ្នកជិះរថយន្ត ។ លើផ្នែកចិត្តសាស្ត្រវិញ ការជិះកង់កម្សាន្ត ក៏ត្រូវគេជឿថា នឹងនាំមកនូវភាពធូរស្បើយក្នុងចិត្ត ជួយបណ្តេញស្ត្រេសឱ្យចេញ អស់ពីខ្លួនផងដែរ ៕
ចែករំលែកព័តមាននេះ